ފަނޑިޔާރުންގެ ޤާނޫނަށް ގެންނަ އިޞްލާހާއެކު ފަނޑިޔާރުން ޒިންމާދާރުކޮށް، ޖަވާބުދާރީކުރެވޭނެ: މެންބަރުން

Read Time:5 Minute, 37 Second

(ފޮޓޯ ކްރެޑިޓްސް: ރައްޔިތުންގެ މަޖިލިސް)

ދިވެހިރާއްޖޭގެ ފަނޑިޔާރުންގެ ޤާނޫނު މިހާރު ހުށައަޅާފައިވާ އިޞްލާހުތަކާއެކު، މިހާރަށްވުރެ ބޮޑަށް ފަނޑިޔާރުން ޒިންމާދާރުކޮށް، ޖަވާބުދާރީކުރެވޭނެކަމަށް ރައްޔިތުންގެ މަޖިލީހުގެ މެންބަރުން ވިދާޅުވެއްޖެއެވެ. މެންބަރުން މިހެން ވިދާޅުވީ މަޖިލީހަށް ހުށައަޅާފައިވާ ފަނޑިޔާރުންގެ ޤާނޫނަށް 8 ވަނަ އިސްލާހު ގެނައުމުގެ ބިލަށް ބަހުސްކުރައްވަމުންނެވެ. މި ބިލު ސަރުކާރުގެ ފަރާތުން ހުށައެޅުއްވީ ތިނަދޫ އުތުރު ދާއިރާގެ މެންބަރު ސަޢުދުﷲ ހިލްމީއެވެ. ފަނޑިޔާރުންގެ ޤާނޫނަށް އިޞްލާހު ގެނައުމުގެ ބިލަށް ކުރިއަށްގެންދިޔަ ބަހުސްގައި ވާހަކަދައްކަވަމުން ފޭދޫ ދެކުނު ދާއިރާގެ މެންބަރު އިބްރާހީމް ދީދީ ވަނީ މާޒީގައި ސިޔާސީ ވެރިންގެ ނުފޫޒު ފަނޑިޔާރު ގެތަކަށް ފޯރުވާފައި ހުރިކަމަށް ތުހުމަތުކުރައްވާފައެވެ. އަދި ކޮރަޕްޝަންގެ މައްސަލަތަކުގެ އިތުރުން ނުބެލިވާ އެތައް މައްސަލައެއް އޮތްކަން ފާހަގަކުރައްވަމުން މެންބަރުން ވަނީ އެ ހުރިހާ ކަމަކަށް އައު އިސްލާހާއެކު ފަނޑިޔާރުން ޖަވާބުދާރީކުރެވޭނެކަމަށް ވިދާޅުވެފައެވެ.

“އެތައް އަހަރެއްވާ ފަހުން މައްސަލައެއް މި ބެލެނީ. ބަލާއިރުގައި ބައެއް މީހުންގެ ކުށެއް ނެތްކަމަށްވެސް އެބަ ނިންމާ. މިކަމުގެ ސަބަބުން އޭނާ ބަންދުގައި ހުންނަން ޖެހުމުން ވަރަށް ގިނަ ބައެއްގެ ޙައްޤުތަކެއް އެ ނިގުޅައިގަނެވެނީ. އެހެންވީމަ ފަނޑިޔާރު ގެތައް ހަރުދަނާ ގޮތެއްގައި ހިނގާކަން އަޅުގަނޑުމެން އެބަޖެހޭ ކަށަވަރުކުރަން.” މެންބަރު ވިދާޅުވިއެވެ.