Read Time:5 Minute, 20 Second
އިންޓަރ މަޔާމީ އާއެކު ހަދާފައިވާ އެއްބަސްވުން މި އަހަރުގެ ނިޔަލަށް ހަމަވުމުން ވާދަވެރި ލީގެއްގައި ކުޅެން ބޭނުންވާ ކަމަށް ލިއޮނެލް މެސީއާ ހަވާލާދީ އޭނާގެ ގާތް ބައެއް ނޫސްވެރިން ބުނަން ފަށައިފިއެވެ. އާޖެންޓީނާގެ ކެޕްޓަން މި ފަދައިން ބޭނުންވަނީ އަންނަ އަހަރުގެ ޖޫން މަހު އެމެރިކާގައި ބާއްވާ ފީފާ ވޯލްޑް ކަޕް ފުޓްބޯޅަ މުބާރާތަށް ތައްޔާރުވުމަށެވެ. އުމުރުން 38 އަހަރުގެ މެސީ އަކީ އެންމެ ފަހުގެ ވޯލްޑް ކަޕް ކާމިޔާބުކުރި އާޖެންޓީނާގެ ކެޕްޓަނެވެ. ތަށި ދިފާއުކުރަން އޭނާ ތައްޔާރުވާއިރު ދިމާވެފައިވާ އެންމެ ބޮޑު މައްސަލަ އަކީ އެމެރިކާ ލީގުގައި ހުސް ދުވަސްތައް ގިނަ ވުމެވެ. އިންޓަ މަޔާމީއާއެކު އިތުރު އަހަރެއްގައި ކުޅެން ބޭނުންވި ނަމަވެސް މެސީ މިހާރު ނިންމައިގެން ހުރީ އެއްބަސްވުން އައުކުރުމުގެ ކުރިން ވާދަވެރި ލީގެއްގައި ކުޅުމަށް ފަހު އެކަން ކުރުމަށެވެ. ބައެއް ނޫސްތަކުން ބުނާ ގޮތުގައި މެސީ އޭނާގެ ކުރީގެ ކުލަބު ބާސެލޯނާއާ ވާހަކަ ދެއްކުމަކީވެސް އެކަށީގެންވާ ކަމެއް ކަމަށެވެ. ބާސެލޯނާ އޮތީ މުސާރަ ކުޑަ ކޮށްދޭނަމަ މެސީއަށް ފުރުސަތު ދޭން ތައްޔާރަށެވެ.
އެމެރިކާގައި މިހާރު ކުރިއަށްދާ ކުލަބު ވޯލްޑް ކަޕުގެ ދެވަނަ ބުރުން މަޔާމީ ވަނީ ކަޓައިފަ އެވެ. އެއީ ޔޫރަޕުގެ ޗެމްޕިއަން ފްރާންސްގެ ޕީއެސްޖީ އަތުން 4-0 ގެ ނަތީޖާއަކުން ބަލިވުމުންނެވެ. ޕީއެސްޖީ އަކީ ބާސެލޯނާއަށް ފަހު މެސީ ކުޅުނު ކުލަބެވެ. ނަމަވެސް އެ ކުލަބާއި އޭނާގެ ގުޅުން އެހާ ރަނގަޅު ނުވުމުން މެސީ ޕީއެސްޖީއަށް ދާނެ ކަމަށް ނުބެލެވެ އެވެ.
ޕީއެސްޖީ މެޗަށް ފަހު މެސީ ބުނީ އޭނާ މިހާރު ކުޅެމުންދަނީ 100 އިންސައްތަ ފިޓުވެހުރެ ނޫން ކަމަށާއި، ފިޒިކަލީ އޭނާއަށްވެސް މިހާރު ބައެއް މެޗު ކުޅެން އުނދަގޫތަކެއް ހުންނަ ކަމަށެވެ. އެ ގޮތުން އޭނާ ފާހަގަކުރި އެއް ކަމަކީ އެމެރިކާގައި މެޗުތައް ކުޅެން ދިގު ދަތުރުތަކެއް ކުރަން ޖެހުމެވެ. “ބައެއް މެޗުތައް ކުޅެން އަހަރުމެން ދަތުރު ކުރަން ޖެހޭ ހަތް ގަޑިއިރު ފްލައިޓްގައި. ކުލަބު ވޯލްޑް ކަޕުގައި ކުޅޭ މެޗުތަކަށް އެ ފަދަ ދަތުރުތަކެއް ކުރާކަށް ނުޖެހުނު. އެކަމަކު ލީގު ކުޅެން އެހާ ދިގު ދަތުރުތައް ކުރަން ޖެހުމަކީ ޖިސްމާނީ ގޮތުން ދަތި ކަމެއް،” މެސީ ބުންޏެވެ.
އޭނާ ބުނީ ގިނަ ބަޔަކު ހީކޮށްގެން ތިބީ އިންޓަރ މަޔާމީއަށް ކުލަބު ވޯލްޑް ކަޕުގެ ދެވަނަ ބުރަށްވެސް ނުދެވޭނެ ކަމަށް ކަމަށެވެ. “އެކަމަކު އަހަރުމެން ޔޫރަޕުގެ ޓީމެއް ބަލި ކޮށްފައި ދެ ވަނަ ބުރަށް ދިޔައީ. އެހެންވީމާ އަހަރުމެންގެ ޓާގެޓް ހާސިލް ވެއްޖެ. އެއީ އަހަރުމެން ވިސްނީ ފުރަތަމަ ވެސް ގްރޫޕް ސްޓޭޖް ފަހަނަ އަޅައި ދާން. ދެން ޕީއެސްޖީ އަކީ އެންމެ ފަހުގެ ޔޫރަޕުގެ ޗެމްޕިއަން. އެ މީހުން އަތުން ތަފާތު ބޮޑުކޮށް ބަލިވެދާނެ ކަމަށް ކުރިން ވެސް ބެލެވުނު،” މެސީ ބުންޏެވެ. އަންނަ އަހަރު އެމެރިކާގައި ބާއްވާ ވޯލްޑް ކަޕް ވެގެންދާނީ މެސީގެ ހަ ވަނަ ވޯލްޑް ކަޕަށެވެ. އޭނާ ވަނީ 2014 ވަނަ އަހަރު ބްރެޒިލްގައި ބޭއްވި މުބާރާތުގެ ފައިނަލްގައިވެސް ކުޅެފައެވެ.
Happy
50 %
Sad
0 %
Excited
0 %
Sleepy
0 %
Angry
0 %
Surprise
50 %
0
0