އައު ހޮސްޕިޓަލް އެޅުމަށް ބިން ހުސްކުރަން، ވިލިމާލެ ހޮސްޕިޓަލް އަމާން ހިޔާއަށް ބަދަލު ކުރަނީ

Read Time:3 Minute, 36 Second

(ފޮޓޯ ކްރެޑިޓްސް: ހެލްތް މިނިސްޓްރީ)

ވިލިމާލޭގައި 112 އެނދުގެ ޓާޝަރީ ހޮސްޕިޓަލް އެޅުމަށް ބޭނުންވާ ބިން ހުސްކުރުމަށްޓަކައި، އެ ހޮސްޕިޓަލް ވަގުތީގޮތުން ހިންގުމަށް، ވިލިމާލޭގައި ހުންނަ އަމާން ހިޔާގެ އިމާރާތް ބަދަލު ކުރުމަށް ނިންމައިފިއެވެ. މި އިމާރާތަށް ވިލިމާލެ ހޮސްޕިޓަލް ބަދަލު ކުރުމަށް މިއަަދު ވަނީ ސިއްހީ ވުޒާރާއިން މާލެސިޓީ ގުރޫޕް އޮފް ހޮސްޕިޓަލް އާއި ހަވާލުކޮށްފައެވެ. މިކަމުގެ އިތުރު ތަފްސީލެއް އަދި ނޭނގެއެވެ. އަދި ވިލިމާލެ ހޮސްޕިޓަލް ބަދަލު ކުުރުމުގެ ކަންކަން ފަށާނީ ކޮން އިރަކު ކަމެއްވެސް އަދި ނޭނގެއެވެ.

ވިލިމާލާގައި އައު ހޮސްޕިޓަލް ތަރައްގީ ކުރަނީ ޗައިނާ ސަރުކާރުންނެވެ. އެ ހޮސްޕިޓަލުގެ ނަމަކީ “ޗައިނާ މޯލްޑިވްސް ފްރެންޑްޝިޕް ހޮސްޕިޓަލް”އެވެ. އަދި އެ ހޮސްޕިޓަލް އިމާރާތްކުރުމަށްޓަކައި ލެޓާ އޮފް އެކްސްޗޭންޖުގައި މިހާރު ވަނީ ސޮއިކޮށްފައެވެ. ޗައިނާ ސަރުކާރުގެ އެހީގެ ދަށުން ވިލިމާލޭގައި ހެދުމަށް ހަމަޖެހިފައިވަނީ 112 އެނދުގެ ޖެނެރަލް ހޮސްޕިޓަލެކެވެ. ދެހާސް ހަތާވީސް ވަނަ އަހަރަށް ނިންމުމަށް ކަނޑައަޅާފައިވާ ވިލިމާލޭގައި ހޮސްޕިޓަލް ތަރައްގީ ކުރެވިގެންދާނީ ރައްޔިތުންނަށް ބޭނުންވާ ހުރިހާ ހިދުމަތްތަކެއް އެންމެ އެކަށީގެންވާ ގޮތުގައި ލިބިގެންދާ ގޮތަށް ކަމުގައި ސިއްހަތާ ބެހޭ ވުޒާރާއިން މީގެކުރިން ވިދާޅުވެފައެވެ. އަދި ހޮސްޕިޓަލް ތަރައްގީ ކުރެވިގެންދާނީ ތިމާވެއްޓާ ވެސް ރައްޓެހި ގޮތަކަށް ކަމަށް ވިދާޅުވިއެވެ.

ވިލިމާލެ ހޮސްޕިޓަލަށް މިހާރު 29 އަހަރު ފުރިފައިވާ އިރު، އެންމެ ފުރަތަމަ އެތަން ހިންގަން ފަށާފައި ވަނީ ސިއްހީ މަރުކަޒެއްގެ ގޮތުގައެވެ. އޭރު ތިން ކޮޓަރިއެއްގައި ހަމައެކަނި ރަސްމީ ގަޑިތަކުގައި ހިދުމަތް ދެމުން އައިސް 1999 ވަނަ އަހަރުގެ ޑިސެމްބަރު މަހުގެ ތެރޭގައި ސިއްހީ މަރުކަޒުން 24 ގަޑިއިރު ހިދުމަތް ދޭން ވަނީ ފަށައިފައެވެ. އަދި މިހާރު ވިލިމާލެ ހޮސްޕިޓަލު ހިންގަމުން އަންނަ އިމާރާތަށް އެތަން ބަދަލުކުރީ 15 އޭޕްރީލް 2002 ގައެވެ.