“އިސްރާއީލުން ހީކުރީ އިރާނަކީ އާދައިގެ ގައުމެއް ކަމަށް”

Read Time:3 Minute, 34 Second

އިސްރާއީލުގެ ޔަހޫދީން އިރާނަށް ހަމަލާ ދިނީ އިރާނުގެ އާރާއި ބާރު ކުޑަކޮށް ވެސް ވިސްނާލުމެއް ނެތި ކަމަށް ކުއިންސީ އިންސްޓިޓިއުޓް ފޯ ރެސްޕޮންސިބަލް ސްޓޭޓް ކްރާފްޓްގެ ނައިބު ރައީސް ޓްރިޓާ ޕާސީ ވިދާޅުވެއްޖެއެވެ. ޓްރިޓާ ޕާސީ ސީއެންއެންއަށް ވިދާޅުވީ އީރާނުން އިސްރާއީލަށް ދެމުންދާ މިސައިލް ހަމަލާތަކުން ދައްކުވައިދެނީ އިސްރާއީލުން ފުރަތަމަ ދިން ހަމަލާގައި ގިނަ އަދަދެއްގެ އަސްކަރިއައްޔާގެ ވެރިން އަވަހާރަކޮށްލި ނަމަވެސް އީރާނަށް އަލުން ހަމަލާދެވޭނެ ކަމުގެ ގާބިލްކަން ހުރިކަމެވެ.

“އިސްރާއީލުން އީރާނުގެ އަސްކަރީ އިސް ވެރިންގެ ތެރެއިން ގިނަ ބަޔަކު އަވަހާރަކޮށްލާފައި، އީރާނުގެ ކޮމާންޑް އެންޑް ކޮންޓްރޯލް ނިޒާމު ހަލާކުވެއްޖެ ކަމަށް ގަބޫލުކުރީ. އެކަމަކު އެ ނިޒާމު އަވަހަށް އަލުން އެކުލަވާލެވުނު،” އޭނާ ވިދާޅުވިއެވެ.

ޕާސީ ވިދާޅުވި ގޮތުގައި މިހާރު ފެންނަމުންދަނީ އީރާނުގެ މިސައިލްތައް އިސްރާއީލުގެ ވައިގެ ދިފާއީ ނިޒާމުގެ ހުރިހާ ފަށަލައެއް ފަޅާލައި ވަދެގަންނަ މަންޒަރު ކަމަށެވެ.

ޕާސީ މި ވާހަކަތައް ދެއްކެވި އިރު، އީރާނުން ދަނީ މެދުކެނޑުމެއް ނެތި އިސްރާއީލްގެ އެކި ހިސާބުތަކަށް މިސައިލް ހަމަލާތައް ދެމުންނެވެ. މި ހަމަލާތަކުގައި އިސްރާއީލުގެ އެކި ސަރަހައްދުތަކަށް ވަނީ ބޮޑެތި ގެއްލުންތަކެއް ލިބިފައެވެ. ދެ ގައުމުގެ މެދުގައި ހަމަލާތައް ފުޅާވަމުން ދިއުމާއެކު ދެފަރާތުން މަރުވާ މީހުންގެ އަދަދުވެސް ދަނީ އިތުރުވަމުންނެވެ. އީރާނުގެ ވެރިރަށް ތެހުރާނުގެ ރައްޔިތުން ވަނީ ރައްކާތެރިކަން ހޯދުމަށް އެ ސިޓީން ބޭރަށް ފުރަން ފަށާފައެވެ.

ފާއިތުވި ހަފުތާގައި އިސްރާއީލުން ހިންގި “އޮޕަރޭޝަން ރައިޒިން ލަޔަން” ގައި އީރާނުގެ އެންމެ މަތީ ފަންތީގެ އަސްކަރީ އޮފިސަރުންނާއި، ރިވޮލިއުޝަނަރީ ގާޑްސް ކޯޕްސްގެ އިސްވެރިޔާއާއި، އެއަ ފޯސްގެ އިސްވެރިޔާ އަދި ކުރީގެ ގައުމީ ސަލާމަތީ ވެރިޔާ އަވަހާރަ ކޮށްލާފައިވާ ކަމަށް ރިޕޯޓުތަކުގައި ބުނެފައިވެއެވެ.