ކުލަބު ވޯލްޑް ކަޕުން ފައިދާކުރަން ވާނީ މުސްކުޅިންނަށް ވުރެ ޒުވާނުންނަށް: ސުއަރޭޒް

Read Time:3 Minute, 33 Second

އެމެރިކާގައި ބާއްވާ ކުލަބު ވޯލްޑް ކަޕް ފުޓްބޯޅަ މުބާރާތަކީ މުސްކުޅި ކުޅުންތެރިންނަށްވުރެ ޒުވާން ކުޅުންތެރިންނަށް ފައިދާ ހުރި މުބާރާތަކަށް ހަދަން ޖެހޭ ކަމަށް އިންޓަރ މަޔާމީގެ ފޯވާޑް އުރުގުއޭގެ ލުއިސް ސުއަރޭޒް ބުނެފިއެވެ. އޭނާއާއެކު އެމެރިކާގެ މަޔާމީގައި އިސްކޮށް ތިބީ މުސްކުޅި ކުޅުންތެރިންނެވެ. އޭގެ ތެރޭގައި ދުނިޔޭގެ އެންމެ މޮޅު ކުޅުންތެރިޔާ އުމުރުން 38 އަހަރުގެ އާޖެންޓީނާގެ ކެޕްޓަން ލިއޮނެލް މެސީ އާއި ބާސެލޯނާއަށް ކުޅުނު ސާޖިއޯ ބުސްކެޓްސް އާއި ޖޯޑީ އަލްބާ ފަދަ ކުޅުންތެރިން ހިމެނެ އެވެ. އުމުރުން 38 އަހަރުގެ ސުއަރޭޒް ބުނީ އޭނާ ފަދަ މުސްކުޅި ކުޅުންތެރިންނަށް މި މުބާރާތުން ހާސިލުކުރެވޭނެ މާބޮޑު ކާމިޔާބީ އެއް ނެތް ކަމަށެވެ.

“މިއީ ޒުވާން ކުޅުންތެރިން ވިދާލަންވީ މުބާރާތެއް. އެ މީހުން އިތުރު ތަޖުރިބާތާކެއް ލިބި، އެ މީހުން ކުރިއަރަން ލިބޭ ފުރުސަތެއް. އަހަރުމެން ފަދަ ދުވަސްވީ ކުޅުންތެރިންނަށް މި މުބާރާތުން ހާސިލްވާނެ އެއްޗެއް ނެތް. އަހަރުމެންގެ ޒުވާން ދުވަހުގައި އަހަރުމެން މި މުބާރާތުގައި ކާމިޔާބީތަކެއް ހޯދިން. މިއީ އަހަރުމެންގެ ދުވަހެއް ނޫން،” ސުއަރޭޒް ބުންޏެވެ. އޭނާ ބުނީ މުބާރާތް ކާޟިޔާބު ކުރުމުގެ ފުރުސަތު އެންމެ ބޮޑީ ޔޫރަޕުގެ ޓީމުތަކަށް ކަމަށެވެ. ނަމަވެސް ދިގު ސީޒަނެއް ކުޅުމަށްފަހު ގިނަ ކުޅުންތެރިން އަރާމެއް ނެތި މި މުބާރާތް ކުޅެތީވެ އެއީ މިއާމީ ފަދަ ޓީމުތަކަށް ނެގިދާނެ އެޑްވާންޓޭޖެއް ކަމަށެވެ.

“އަހަރުމެންނަށް މި މުބާރާތގެ ދެ ވަނަ ބުރަށް ދެވުނަސް އެ ވާނީ ކާމިޔާބީ އަކަށް. ޔޫރަޕުގެ ޓީމުތައް އެ އަންނަނީ ދިގު ސީޒަނަށް ފަހު ރެސްޓެއް ނެތި. މިހެންވެ އަހަރުމެން މޮޅުވާން އަބަދުވެސް ތައްޔާރަށް ތިބެން ވާނެ. އެއީ ނެގިދާނެ އެޑްވާންޓޭޖެއްކަން ހަނދާނުގައި ބަހައްޓަންވާނެ،” ސުއަރޭޒް ބުންޏެވެ. 32 ޓީމު ބައިވެރިކޮށްގެން ފުރަތަމަ ފަހަރަށް ބާއްވާ މުބާރާތުގެ ފުރަތަމަ މެޗުގައި އިންޓަ މިއާމީ ވާދަ ކުރާނީ މިސުރުގެ އަލް އަހްލީއާ އެވެ.