Read Time:5 Minute, 12 Second
(ފޮޓޯ ކްރެޑިޓްސް: ރޮއިޓާރސް)
ޔަހޫދީން އީރާނަށް ޙަމަލާ ދޭން ފަށައިފިއެވެ. ޔަހޫދީން އީރާނަށް ޙަމަލާ ދޭން ފަށާފައި ވަނީ ދަންވަރުގެ ވަގުތެއްގައެވެ. އެ ޙަމަލާތައް އަމާޒު ކުރަމުން ދަނީ މައިގަނޑުގޮތެއްގައި އީރާނުގެ އަސްކަރީ މަރުކަޒުތަކަށާއި ނިއުކްލިޔަރ މަރުކަޒުތަކަށެވެ. އީރާނުގެ ނަތަންޒް ނިއުކްލިޔަރ މަރުކަޒަށް ވެސް ޙަމަލާ ދީފައިވެއެވެ. އީރާނުގެ ވެރިރަށް ތެހްރާނުގެ އެކި ސަރަޙައްދުތަކުން ގޮވުންތަކުގެ އަޑު އިވެމުންދާ ކަމަށް ޚަބަރުތަކުގައި ވަނި ރިޕޯޓު ކޮށްފައެވެ. އޭގެ އިތުރުން އާންމުން ދިރިއުޅޭ ބައެއް ސަރަޙައްދުތަކަށް ވެސް ޙަމަލާ ދީފައިވާ ކަމަށްވެއެވެ.
ޔަހޫދީންގެ ޙަމަލާތަކުގައި އީރަނުގެ އިންޤިލާބީ ފައުޖުގެ އިސްވެރިޔާ، ޙުސައިން ސަލާމީ ވަނީ ޝަހީދުވެފައެވެ. އޭގެ އިތުރުން އީރާނުގެ އިސް ނިއުކްލިޔަރ ސައިންޓިސްޓުން ކަމަށްވާ ފެރޭދޫން ޢައްބާސީ ދަވާނީއާއި މުޙައްމަދު މަޙްދީ ތެހްރާންޗީ ވެސް ވަނީ ޝަހީދު ކޮށްލައިފައެވެ. ޙަމަލާތަކާ ގުޅިގެން އީރާނުގެ ރޫހީ ވެރިޔާ އާޔަތުالله ޢަލީ ޚަމަނާއީ ވިދާޅުވީ ޔަހޫދީން އީރާނަށް ޙަމަލާ ދިނުމަކީ އެ މީހުންގެ އަމިއްލަ ނެތިދިއުމަށް ތައްޔާރުވުން ކަމަށެވެ. އޭނާ ވިދާޅުވީ އީރާނާ ދެކޮޅަށް ޔަހޫދީން ދެމުންދާ ޙަމަލާތަކާއި ހިންގަމުންދާ ޖަރީމާތަކުން އެމީހުންގެ ނުބައި ނުލަފާ، ލެއިން ތަަތްތެޅިފައިވާ އަތް ދައްކަމުންދާ ކަމަށެވެ. އެ މީހުންގެ ނުބައި ޢަމަލުގެ ސަބަބުން ވަަރުގަދަ އަދަބެއް ދޭނެ ކަމުގެ އިންޒާރު އޭނާ ވަނީ ދެއްވައިފައެވެ. އޭނާ އިތުރަށް ވިދާޅުވީ ޙަމަލާތަކުގެ ބަދަލުގައި އީރާނުން ދޭ އަދަބު ވެގެން ދާނީ ހަރުކަށި އަދަބެއް ކަމަށެވެ.
ޔަހޫދީންގެ ޙަމަލާތަކުގެ ސަބަބުން އީރާނުގެ ވައިގެ ސަރަޙައްދުގެ ބައެއް ވަނީ ބަންދު ކޮށްފައެވެ. އެމެރިކާއާއި އިތުރު އެހެން ޤައުމުތަކުން ވަނީ އީރާނުގައި ތިބި އެ ޤައުމުތަކުގެ މުވައްޒަފުން އަނބުރާ ޤައުމަށް ގެންދަން ފަށައިފައެވެ. ޔަހޫދީން ވަނީ އީރާނުން ބަދަލުގައި ދީފާނެ ޙަމަލާއަކަށް ތައްޔާރުވުމުގެ ގޮތުން އެ ޤައުމުގައި ކުއްލި ޙާލަތު އިޢުލާނު ކޮށްފައެވެ. ޔަހޫދީ މަދަރުސަތަކާއި ފިރާތައް ބަންދު ކޮށް ދަތުރުފަތުރު ކުރާ ނިޒާމުތައް ވެސް ވަނީ ހުއްޓުމަކަށް ގެނެސްފައެެވެ. ޔަހޫދީން އީރާނަށް ދެމުންދާ ޙަމަލާތަކާ ގުޅިގެން އެމެރިކާއިން ވަނީ އެ ޙަމަލާތަކުގައި އެ ޤައުމުގެ ބައިވެރިވުމެއް ނެތް ކަމަށް ބުނެފައެވެ. މި ވަގުތު އެމެރިކާއިން އެންމެ ބޮޑަށް އިސްކަން ދޭނީ އެމެރިކާގެ ރައްޔިތުން ރައްކާތެރި ކުރުމަށް ކަމަށް އެ ޤައުމުން ވަނީ ބުނެފައެވެ.
ތެހްރާން އާއި ނަތަންޒަށް ދީފައިވާ ޙަމަލާތަކުގެ އިތުރުން ޔަހޫދީން ވަނީ ތެހްރާންގެ ހުޅަނގު އުތުރުގައި އޮންނަ ތަބްރީޒްގައި ހުންނަ ނިއުލްކިޔަރ ރިސާޗު ސެންޓަރަކަށާއި ދެ އަސްކަރީ މަރުކަޒަކަށް ޙަމަލާ ދީފައެވެ. އޭގެ އިތުރުން އިސްފަހާން އާއި އަރާކްއަށާއި ކަރުމާންޝާހަށް ވެސް ވަނީ ޙަމަލާ ދީފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0