ކުރިއަށް އޮތް އަހަރުތަކުގައި ޙައްޖުގެ އިންތިޒާމުތައް އިތުރަށް ފުރިހަމަކުރާނަން: ޝަކީލް

Read Time:5 Minute, 46 Second

ކުރިއަށް އޮތް އަހަރުތަކުގެ ޙައްޖުގެ އަޅުކަމަށްވެސް މިއަހަރަށްވުރެ އިންތިޒާމުތައް އިތުރަށް ފުރިހަމަކުރުމަށް އިސްކަންދެއްވާނެކަމަށް ޙައްޖު ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ޝަކީލް ވިދާޅުވެއްޖެއެވެ. ޝަކީލް މިހެން ވިދާޅުވީ، ދިވެހި ޙައްޖުވެރިން، މައްކާއިން މަދީނާއަށް ފުރަތަމަ ފަހަރަށް ހައި ސްޕީޑް ޓްރެއިންގައި ދަތުރުކުރުމާއި ގުޅިގެން ޕީއެސްއެމް ނިއުސްއަށް ދެއްވި އިންޓަރވިއުއެއްގައެވެ. ފުރަތަމަ ފަހަރަށް ދިވެހި ޙައްޖާޖީން ހައި ސްޕީޑު ޓްރެއިންގައި މައްކާއިން މަދީނާއަށް ދަތުރުކުރުމުގެ ފުރުޞަތު ފަހިވެގެންދިޔަ ދިއުމަށް އިޝާރާތްކުރައްވައި މޯލްޑިވްސް ޙައްޖު ކޯޕަރޭޝަންގެ މެނޭޖިންގ ޑިރެކްޓަރު މުޙައްމަދު ޝަކީލް ވިދާޅުވީ، މައްކާއިން މަދީނާއަށް ކުރި ދަތުރާމެދު ހުރިހާ ޙާޖީންވެސް ހިތްހަމަޖެހިފައި ތިބިކަމަށެވެ. މައްކާއިން މަދީނާއަށް ކުރާ ދަތުރަށް ގެނައި ބަދަލަކީ، ސީދާ ރައީސުލްޖުމްހޫރިއްޔާގެ އެންގެވުމަށް ގެންނެވި ބަދަލެއްގެ ގޮތުގައި ޝަކީލް ފާހަގަކުރެއްވިއެވެ.

ޝަކީލް ވިދާޅިވީ ޙައްޖުގެ އިންތިޒާމުތައް ހަމަޖެއްސިއިރު، މައްކާއިން މަދީނާއަށް ކުރާ ދަތުރު އެކުންފުނިން ހަމަޖެއްސީ ބަހުގައި ކުރުމަށްކަމަށާއި، ނަމަވެސް ފަހުވަގުތު އިންތިޒާމްތައް ހަމަޖެހިފައިވާގޮތް ސާފުކުރައްވައި، ކަންކަން ރަނގަޅުކުރައްވާއިރު ޙައްޖާޖީންނަށް ދަތުރުތައް ލުއިވާނެގޮތަށް ހަމަޖެއްސުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިރުޝާދުދެއްވިކަމަށް ޝަކީލް ވިދާޅުވިއެވެ. “މިގޮތުން މައްކާއިން މަދީނާއަށް ދަތުރުކުރާއިރު ޙައްޖުވެރިންނަށް ވީހާވެސް ލުއިފަސޭހަ ގޮތްތަކަށް ހަމަޖެއްސުމުގެ ގޮތުން ހައި ސްޕީޑް ޓްރެއިންގައި އިންތިޒާމުކޮށްދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެދިވަޑައިގެން އަޅުގަނޑުމެން މި އިންތިޒާކޮށްދިނީ. އެހެންކަމުން ޙައްޖުވެރިންގެ ނަމުގައި ރައީސުލްޖުމްހޫރިއްޔާއަށް ޚައްޞަ ޝުކުރެއް ދަންނަވަން.” މުޙައްމަދު ޝަކީލް ވިދާޅުވިއެވެ.

ޝަކީލް ވިދާޅުވީ، ކުރިއަށް އޮތް އަހަރުތަކުގެ ޙައްޖުގައިވެސް މަސައްކަތްކުރާނީ މިފަހަރު ކަނޑައެޅި އިންތިޒާމުތަކަށްވުރެ ރަނގަޅު އިންތިޒާމުތަކެއް ހަމަޖެއްސުމަށްކަމަށެވެ. “ކުރިއަށް އޮތް ޙައްޖުތަކަށް ދަންނަވާނަމަ އަޅުގަނޑުމެން ބެންޗުމާކެއް ދެއްތޯ އަޅުގަނޑުމެންނަށް މި ކަނޑައެޅިގެންދިޔައީ. އިރާދަކުރެއްވިއްޔާ އަޅުގަނޑުމެންގެ އުންމީދަކީ އަދި އަޅުގަނޑުމެން މަސައްކަތްކުރާނީވެސް، މިފަހަރު މި ކަނޑައެޅި ބެންޗުމާކް، އެއަށްވުރެވެސް ކަންތައްތައް ރަނގަޅުކުރުމާއި ދެވޭ ޚިދުމަތްތައް އިތުރަށް ރަނގަޅުކުރުމަށް.” ޝަކީލް ވިދާޅުވިއެވެ.

މީގެ ކުރީގެ އަހަރުތަކާއި އަޅާބަލާއިރު، މިއަހަރަކީ ޙައްޖުގެ އިންތިޒާމުތައް އެންމެ ރަނގަޅު އަދި ފުރިހަމަ އަހަރެވެ. އެގޮތުން ރާއްޖެއިން ސަޢުދި ޢަރަބިއްޔާއަށް ދަތުރުކުރުމުގައި މައްކާ ރޫޓު އިނީޝިއޭޓިވް ހަމަޖެއްސުމާއި، މިނާ އަދި ޢަރަފާތުގައި ދިވެހީންނަށް ޚާއްޞަ ފޭލިގެތަކެއް ކަނޑައަޅައި، ފަސޭހައިން އަޅުކަމުގައި ތިބެވޭނެ އިންތިޒާމުތައް ހަމަޖެއްސިއެވެ. ޑޮކްޓަރަށް ދެއްކުމާއި ހިލޭ ބޭސް ލިބޭނެ އިންތިޒާމުވެސް ސަރުކާރުން ހަމަޖެއްސެވިއެވެ.