މޯލްޑިވިއަންގެ ޑޭޝް ފްލީޓު 2027ގެ ކުރިން އޭޓީއާރަށް ބަދަލުކުރެވޭނެ: އިޔާސް

Read Time:5 Minute, 59 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ޤައުމީ އެއަރލައިން، މޯލްޑިވިއަންގެ ފްލީޓުގައި ހިމެނޭ ޑޭޝް8 މަރުކާގެ ހުރިހާ ބޯޓެއް، 2027ވަނަ އަހަރުގެ ކުރިން އޭޓީއާރުގެ ބޯޓުތަކަށް ބަދަލުކުރެވިގެންދާނެކަމަށް އެ ކުންފުނީގެ މެނޭޖިންގ ޑިރެކްޓަރ އިބްރާޙީމް އިޔާސް ވިދާޅުވެއްޖެއެވެ. އިބްރާޙީމް އިޔާސް މިހެން ވިދާޅުވީ، މޯލްޑިވިއަންގެ ފްލީޓަށް 5ވަނަ އޭޓީއާރް ގެނައުމަށް ބޭއްވި ރަސްމިއްޔާތުގައި ދެއްކެވި ވާހަކަފުޅުގައެވެ. ޤައުމީ އެއަރލައިން، މޯލްޑިވިއަންގެ ފްލީޓުގައި ހިމެނޭ ޑޭޝް8 މަރުކާގެ ބޯޓުތައް، އޭޓީއާރުގެ ބޯޓުތަކަށް ބަދަލުކުރުމުގެ މަސައްކަތް އެކުންފުނިން ފަށާފައިވަނީ 2022ވަނަ އަހަރުއެވެ.

މޯލްޑިވިއަންގެ މެނޭޖިންގ ޑީރެކްޓަރ އިބްރާޙީމް އިޔާސް ވިދާޅުވީ، އޭޓީއާރު ފްލީޓަކަށް ބަދަލުކުރަން ނިންމީ، އެ އެއާލައިންގެ އުދުހުންތަކުގައި ބޭނުންކުރަމުން އަންނަ ޑޭޝް8 މަރުކާގެ ބޯޓުތައް ގިނަ ދުވަސްވެ، މެއިންޓެއިން ކުރަން އުނދަގޫވުމުންކަމަށެވެ.

(ފޮޓޯ ކްރެޑިޓްސް: ޕީއެސްއެމް ނިއުސް)

މޯލްޑިވިއަންގެ ފްލީޓު ބަދަލުކުރުމަށް ކުރަމުންދާ މަސައްކަތުގެ ތެރެއިން މިހާތަނަށް އޭޓީއާރު މަރުކާގެ 5 މަތިންދާބޯޓެއް އެ ކުންފުނީގެ ފްލީޓަށް ވަނީ އިތުރުކޮށްފައެވެ. އެއީ:

• ޖަނަވަރީ 2023 – އޭޓީއާރު-72ގެ 2 ބޯޓު
• އެޕްރީލް 2023 – އޭޓީއާރު-42ގެ ބޯޓެއް
• މެއި 2024 – އޭޓީއާރު-42ގެ ބޯޓެއް
• ޖޫން 2025 – އޭޓީއާރު-42ގެ ބޯޓެއް

އިބްރާޙީމް އިޔާސް ވިދާޅުވީ، 2027 ގެ ކުރިން އެ ކުންފުނީގެ ފްލީޓުގައި ހިމެނޭ ޑޭޝް8 މަރުކާގެ ހުރިހާ ބޯޓެއް އޭޓީއާރު ބޯޓުތަކަށް ބަދަލުކުރެވިގެންދާނެކަމަށެވެ. “މި މަސައްކަތް އަޅުގަނޑުމެން ކުރާނަން ޑޭޝް8ގެ ހުރިހާ މަތިންދާބޯޓެއް އޭޓީއާރަށް ބަދަލުކުރެވެންދެން. ލަފާކުރެވެނީ 2027ވަނަ އަހަރު މި މަސައްކަތް އަޅުގަނޑުމެންނަށް ފުރިހަމަކުރެވިދާނެކަމަށް.” އިބްރާޙީމް އިޔާސް ވިދާޅުވިއެވެ.

މޯލްޑިވިއަންގެ ފްލީޓަށް އަލަށް ގެނައި އޭޓީއާރުގެ ސަބަބުން އޮޕަރޭޝަނަށް އަދި އެ އެއަރލައިނުން ޚިދުމަތް ހޯދާ ފަސިންޖަރުންނަށްވެސް ފަސޭހަތަކެއް ލިބިފައިވާކަމަށްވެސް އެމްޑީ އިބްރާޙީމް އިޔާސް ވިދާޅުވިއެވެ. “މި ބްރޭންޑް ނިއު މަތިންދާބޯޓުތައް ގެނެވެމުން އަޅުގަނޑުމެންގެ ޓެކްނިކަލް ރިލައިބިލިޓީ މިވަނީ މިހާރު ވަރަށް ބޮޑަށް އިމްޕްރޫވްކުރެވިފައި. އެއާއެއްކޮށް އަޅުގަނޑުމެންނަށް އޮންޓައިމް ޕާފޯމެންސްވެސް ވަރަށް ބޮޑަށް ރަނގަޅުކުރެވިއްޖެ. މިއީ އެންމެ ޒަމާނީ ޓެކްނޮލޮޖީ ކެބިންއެއްކަމަށް ވުމުން ދަތުރުކުރާ ފަސިންޖަރުންގެ އެކްސްޕީރިއެންސްވެސް ވަރަށް ބޮޑަށް ރަނގަޅުކުރެވިފަ.” އެމްޑީ އިބްރާޙީމް އިޔާސް ވިދާޅުވިއެވެ.

މޯލްޑިވިއަންގެ ފްލީޓުގައި 25 މަތިންދާބޯޓެއް ހިމެނެއެވެ. މީގެ ތެރޭގައި ވައިޑް-ބޮޑީ އެއަރބަސް އޭ330، ނެރޯ-ބޮޑީ އެއަރބަސް އޭ320 މަރުކާގެ މަތިންދާބޯޓަކާއި، އޭޓީއާރު މަރުކާގެ 5 މަތިންދާބޯޓަކާއި، ޑޭޝް 8 މަރުކާގެ 9 މަތިންދާބޯޓާއި، އަދި ޑޭޝް 6 މަރުކާގެ ޓްވިންއޮޓާރ 11 މަތިންދާބޯޓު ހިމެނެއެވެ. މޯލްޑިވިއަންގެ ޚިދުމަތް ފުޅާކޮށް ބައިނަލްއަޤްވާމީ ގިނަ މަންޒިލްތަކަށް ދަތުރުތައް ފެށުމަކީ ސަރުކާރުގެ އަމާޒެކެވެ. އެގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދާއި އެއްގޮތަށް ޤައުމީ އެއަރލައިނަށް އިތުރު ވައިޑް ބޮޑީ އެއަރ ކްރާފްޓެއް ގެނައުމަށް ސަރުކާރުން ދަނީ މަސައްކަތްތަކެއް ކުރަމުންނެވެ.