ރައީސްއާ ކުރިމަތިލާން، ޓާސްޓެގަން ބާސެލޯނާ އަށް

Read Time:4 Minute, 15 Second

ޖަރުމަނުގެ ގައުމީ ކީޕަރު އަދި ބާސެލޯނާގެ ކެޕްޓަން މާކް އަންދްރޭ ޓާސްޓެގަން ގައުމީ ޓީމުގެ ޑިއުޓީ ނިންމައި އެނބުރި ބާސެލޯނާ އަށް ދިޔައީ ކުލަބުގެ ރައީސް ޖޯން ލަޕޯޓާއާ ކުރިމަތިލާން ނިންމައިގެން ކަމަށް ސްޕޭނުގެ މީޑިއާތަކުން ބުނެފި އެވެ. ޓާސްޓެގަން ސްޕޭނަށް ދިޔައީ އިއްޔެގެ ވަގުތެއްގަ އެވެ. އަދި މާދަމާ އޭނާ ބާސެލޯނާގެ ރައީސް އާއި ކޯޗު ހަންސީ ފްލިކާއެކު ބައްދަލުކުރާނެ ކަމަށްވެ އެވެ. މި ބައްދަލުވުމުގައި ޓާސްޓެގަން ރުޅި އިސްކުރާނެ ކަމަށާއި އޭނާގެ ހިތްހަމަނުޖެހުން ފާޅު ކުރާނެ ކަމަށް ވެސް ސްޕޭނުގެ ނޫސްތަކުން ބުނެ އެވެ.

ފާއިތވެދިޔަ 10 އަހަރު ބާސެލޯނާ އަށް ކުޅުނު ކީޕަރު ކުލަބާމެދު ހިތްހަމަ ނުޖެހުނީ އޭނާގެ ބަދަލުގައި އާ ގޯލްކީޕަރަކު ގެނެސް އަންނަ ސީޒަނުގައި ފުރަތަމަ 11އިން ޖާގަ ނުދޭން ނިންމުމުންނެވެ. ބާސެލޯނާއިން މި ގޮތަށް ނިންމީ ފާއިތުވެދިޔަ އަހަރުތަކުގައި ޓާސްޓެގަން މޮޅަށް ކުޅުނަސް އޭނާ އަށް ގާތްގާތުގައި އަނިޔާވާތީ އެވެ. ހާއްސަކޮށް އޭނާގެ ކަކުލަށް ލިބިފައިވާ އަނިޔާ މުޅިން ރަނގަޅު ނުވާތީ އެވެ. މި ގޮތުން ހުސްވި ސީޒަން އެއްކޮށް އޭނާ ހުރީ އަނިޔާގަ އެވެ. މިހެންވެ އުމުރުން 33 އަހަރުގެ ކީޕަރު އަލުން ފުލް ފޯމަށް އަންނާނެ ކަމަށް ބާސެލޯނާއިން ގަބޫލެއް ނުކުރެ އެވެ.

ސްޕޭނުގެ ނޫސްތަކުން ބުނަނީ ޓާސްޓެގަން އާއި ބާސެލޯނާގެ ބައްދަލުވުން ހޫނު ވާނެ ކަމަށެވެ. އަދި ކަންކަން ހައްލު ނުވާނެ ކަމަށް ފެންނަނަމަ ޓާސްޓެގަންގެ ކޮންޓްރެކްޓް ބާތިލް ކުރަން ވެސް ބާސެލޯނާ ވިސްނާ ކަމަށެވެ. އެ ކުލަބާއެކު އޭނާ ހަދާފައިވާ ކޮންޓްރެކްޓްގައި ބާކީ އަދި ދެ އަހަރު އެބައޮތެވެ. ބާސެލޯނާއިން ހުށަހަޅަނީ އެއް އަހަރުގެ މުސާރަ އެއްކޮށްދީފައި ޓާސްޓެގަން ބޭނުން ކުލަބަކަށް ދިއުމަށެވެ. ނަމަވެސް އޭނާ ހުރީ އެހާ ފަސޭހައިން ބާސެލޯނާ އަށް ދޫދޭ ގޮތަކަށް ނޫނެވެ.

ޓާސްޓެގަން އަށް ޝައުގުވެރިވާ ޔޫރަޕުގެ މަޝްހޫރު ކުލަބުތަކެއް އެބަތިއްބެވެ. އެއީ އިނގިރޭސިވިލާތުގެ މެންޗެސްޓާ ޔުނައިޓެޑާއި ޗެލްސީ އާއި އިޓަލީގެ އިންޓަ މިލާނާއި ތުރުކީގެ ގަލަޓަސަރާއީ ހިމެނެ އެވެ.
ބާސެލޯނާ ގަބޫލު ކުރަނީ ކުރިއަށް އޮތް ވޯލްޑް ކަޕް އަހަރު ކަމަށް ވުމުން ފުރަތަމަ 11އިން ޖާގަ ނުދޭނަމަ ޓާސްޓެގަން އެހެން ކުލަބަކަށް ބަދަލުވާނެ ކަމަށެވެ. އެއީ ޖަރުމަނުގެ ގައުމީ ކީޕަރުކަން ކުރުމަށް އޭނާ ކުލަބުގައި ގަވާއިދުން ކުޅެންޖެހޭތީ އެވެ.