ދިވެހި ދައުލަތުގެ މަތިވެރި އިއްޒަތް 4 ބޭފުޅަކަށް

Read Time:3 Minute, 35 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ދިވެހި ދައުލަތުގެ މަތިވެރި ޢިއްޒަތް ކަމަށްވާ “ނިޝާން ޢިއްޒުއްދީނުގެ ޢިއްޒަތުގެ ވެރިކަން” (ނ.ޢ.ޢ.ވ) 4 ބޭފުޅަކަށް މިއަދު އަރުވައިފިއެވެ. މި ޝަރަފު ލިބިވަޑައިގަތް ބޭފުޅުންނަކީ:

ޗަމްޕާ މުޙައްމަދު މޫސާ (އުއްޗު): ވިޔަފާރި، ފަތުރުވެރިކަން، އަދި ދަނޑުވެރިކަމުގެ ދާއިރާއިން ފާހަގަކޮށްލެވޭ ޚިދުމަތްތަކެއް ކުރައްވާފައިވާ ބޭފުޅެކެވެ. އިޤްތިޞާދީ ކުރިއެރުވުމަށާއި، އިޖުތިމާޢީ ކަންކަމަށް “ޢަލިފުޅު ތުއްތު ފައުންޑޭޝަން” މެދުވެރިކޮށް ބޮޑެތި އެހީތަކެއް ވެވަޑައިގަންނަވައެވެ.

(ފޮޓޯ ކްރެޑިޓްސް: ޕީއެސްއެމް ނިއުސް)

ޗަމްޕާ ޙުސައިން ޢަފީފް: ރާއްޖޭގެ ފަތުރުވެރިކަމުގެ ބާނީންގެ ތެރޭގައި ހިމެނިވަޑައިގަންނަވާ، ފަތުރުވެރިކަމާއި، ބޭންކިންގ އަދި ޞިއްޙީ ދާއިރާ ތަރައްޤީކުރުމަށް ބޮޑެތި އިންވެސްޓްމަންޓްތަކެއް ކުރައްވާފައިވާ ބޭފުޅެކެވެ. ޓްރީ ޓޮޕް ހޮސްޕިޓަލާއި ކޮމާޝަލް ބޭންކް އުފެއްދުމުގައި އިސް ދައުރެއް އަދާކުރެއްވިއެވެ.

އަލްއުސްތާޛު އިބްރާހީމް ރަޝީދު މޫސާ: އިސްލާމީ ދީނަށް ހޭލުންތެރިކަން އިތުރުކުރުމާއި، ޢަރަބި އިސްލާމީ ތަޢުލީމު ރާއްޖޭގައި ފުޅާކުރުމަށް 43 އަހަރަށްވުރެ ގިނަ ދުވަހު ޚިދުމަތް ކުރައްވާފައިވާ ޢިލްމުވެރިއެކެވެ. މަޢުހަދާއި ކީރިތި ޤުރުއާނާބެހޭ މަރުކަޒުގެ އިސް މަގާމުތައް ފުރުއްވިއެވެ.

ޑރ. މުޙައްމަދު ލަޠީފް: ތަޢުލީމީ ދާއިރާގައި 40 އަހަރަށްވުރެ ގިނަ ދުވަހު ޚިދުމަތް ކުރައްވައި، އެޑިޔުކޭޝަން މިނިސްޓަރުކަމާއި ޤައުމީ ޔުނިވަރސިޓީގެ ޗާންސެލަރުކަން ކުރެއްވި ބޭފުޅެކެވެ. ރާއްޖޭގެ ތަޢުލީމީ މަންހަޖު އެކުލަވައިލުމާއި މަތީ ތަޢުލީމު ފުޅާކުރުމުގެ މޭސްތިރިއެކެވެ.

މި ބޭފުޅުންނަށް މި ޢިއްޒަތް އަރުވާފައިވަނީ ޤައުމުގެ ކުރިއެރުމަށާއި ރައްޔިތުންގެ ލާބައަށް ދިގު މުއްދަތެއްގައި ކޮށްދެއްވާފައިވާ އަގުހުރި ޚިދުމަތްތަކުގެ އަގުވަޒަންކުރުމުގެ ގޮތުންނެވެ.