އިނގިރޭސިވިލާތުގައި އީރާނުގެ ތިން މީހަކާ ދެކޮޅަށް ދައުވާ ކުރުމުން ސަފީރުން ހާޒިރު ކޮށްފި

Read Time:4 Minute, 44 Second

(ފޮޓޯ ކްރެޑިޓްސް: ރޮއިޓާރސް)

އިނގިރޭސިވިލާތުގެ ޤައުމީ ސަލާމަތާބެހޭ ޤާނޫނުގެ ދަށުން އީރާނުގެ ތިން ރައްޔިތުންނާ ދެކޮޅަށް ދައުވާ ކުރުމާ ގުޅިގެން އުފެދުނު އަރައިރުމެއްގައި ދެ ގައުމުން ވެސް ސަފީރުން ހާޒިރު ކޮށްފިއެވެ. އިނގިރޭސިވިލާތުން ބުނީ އެ މައްސަލައިގައި އެ ޤައުމުން އީރާނުގެ ސަފީރު ސަޢީދު ޢަލީ މުސާވީ ހާޒިރު ކޮށްފައިވާ ކަމަށެވެ. އީރާނުން ހާޒިރު ކޮށްފައި ވަނީ އެ ޤައުމުގައި ހުންނަވާ އިނގިރޭސިވިލާތުގެ ޗާޖް ޑީއެފެއާޒްއެވެ. އީރާނުން ބުނީ އެ ޤަުއުމުގެ ތިން ރައްޔިތުންނާ ދެކޮޅަށް ކުރާ ތުހުމަތުުތަކަކީ ހަޤީޤަތެއް ނެތް ތުހުމަތުތަކެއް ކަމަށެވެ.

ނިރުބަވެރިކަމާ ބެހޭ ތަހުޤީޤަކާ ގުޅިގެން ހައްޔަރު ކުރި ތިން މީހުންނާ ދެކޮޅަށް އުފުލާފައި ވަނީ ބޭރުގެ ޖާސޫސީ އިދާރާއަކަށް އެހީތެރިވެދިނުމުގެ ދައުވާއެވެ. އެ މީހުން ޖާސޫސީ އިދާރާއަކަށް އެހީތެރިވެދީފައި ވަނީ 2024ވަނަ އަހަރުގެ އޮގަސްޓު މަހާއި 2025ވަނަ އަހަރުގެ ފެބްރުވަރީ މަހާ ދެމެދު ކަމަށް ދައުވާގައި ބުނެފައިވެއެވެ. އެ ތިން މީހުން ވެސް އެހީތެރިވެދިނީ އީރާނުގެ ޖާސޫސީ އިދާރާއަކަށް ކަމަށް އިނގިރޭސިވުލާތުގެ ފުލުހުން މަޢުލޫމާތު ދެއެވެ. މިދިޔަ މަހުގެ ތެރޭގައި، ތަފާތު މައްސަލައެއްގައި އީރާނުގެ ހަތަރު ރައްޔިތުން ހަމަ އިނގިރޭސިވިލާތުގައި ހައްޔަރު ކޮށްފައިވެއެވެ. އިނގިރޭސިވިލާތުގެ ފުލުހުން ބުނީ އެ މީހުން މިހާރު ދޫކޮށްލާފައިވާ ކަމަށެވެ. ނަމަވެސް ތަހުޤީޤު އަދިވެސް ދަނީ ކުރިއަށެވެ.

އީރާނުގެ ތިން ރައްޔިތަކާ ދެކޮޅަށް ޖާސޫސް ކުރަން އެހީތެރިވެދިން ކަމުގެ ދައުވާ އުފުލާފައި މި ވަނީ އިނގިރޭސިވިލާތުގައި އީރާނުގެ އެހީތެރިކަމާއެކު ހިންގާ ކަމަށް ބެލެވޭ ޙަރަކާތްތަކެއް އެ ޤައުމުން ވަރަށް ގާތުން ބަލަމުންދާ ދަނޑިވަޅެއްގައެވެ. އިނގިރޭސިވިލާތުގެ ބޭރުގެ ނުފޫޒުގެ ދަފްތަރުގައި، އެންމެ މަތީ ފަންތީގައި އީރާން ވަނީ ހިމަނައިފައެވެ. އިނގިރޭސިވިލާތުގެ ޚަރިޖީ އިދާރާއިން ބުނީ އެ ޤައުމުގެ ސަރުކާރުގެ އެންމެ އިސް ޒިންމާއަކީ ޤައުމީ ސަލާމަތް ރައްކާތެރި ކުރުން ކަމަށެެވެ. އީރާނުގެ ޢަމަލުތަކުގެ ޒިންމާ އެ ޤައުމުން ނަގަން ޖެހޭނެ ކަމަށް އެ އިދާރާއިން ބުނެފައިވެއެވެ.

އީރާނުގެ ދައުލަތުގެ މީޑިޔާއިން ބުނީ އެ ޤައުމުގެ ތިން ރައްޔިތުން ހައްޔަރު ކުރި ސަބަބު އޮޅުންފިލުވައި ދިނުމަށް އެ ޤައުމުގައި ހުންނަވާ އިނގިރޭސިވިލާތުގެ ސަފީރު ހާޒިރު ކޮށްފައިވާ ކަމަށެެވެ. އީރާނަށް ޕްރެޝަރު ކުރުމުގެ ގޮތުން، ސިޔާސީ ބޭނުމެއް ޙާޞިލް ކުރުމަށް އަޅާފައިވާ ފިޔަވަޅުތަކާއި އޭގެ ސަބަބުން ނިކުންނަ ނޭދެވޭ އަސަރުތަކުގެ ޒިންމާ އިނގިރޭސިވުލާތުގެ ސަރުކާރުން ނަގަންޖެހޭ ކަމަށް އީރާނުން ވަނީ ބުނެފައެވެ.