Read Time:3 Minute, 43 Second
ބައިނަލްއަގްވާމީ އެކުވެރިކަމުގެ މެޗުގައި 3-0 ގެ ނަތީޖާއަކުން ރާއްޖޭގެ މައްޗަށް އިންޑިއާ ކުރި ހޯދައިފިއެވެ. އޭއެފްސީ އޭޝިއަން ކަޕް ކޮލިފައިންގެ ކުރިން އިންޑިއާގެ ޝިލޮންގުގެ ޖަވާހިރުލާލް ނެހުރޫ ސްޓޭޑިއަމްގައި މިއަދު ކުޅުނު މެޗަކީ އިންޑިއާ ގައުމީ ޓީމުން އައު ކޯޗު މަަނޯލޯ މާކުއޭޒްގެ އިރުޝާދުގެ ދަށުން ކުޅުނު ފުރަަތަަމަ މެޗެވެ. މި މެޗުގައި އިންޑިއާގެ ކެޕްޓަން ބޭންޑް އަޅައިގެން ކުޅުނީ، އެ ޓީމުން ރިޓަޔާކުރިކަން މިދިޔަ އަހަރުގެ ޖޫން މަހު އިއުލާނުކުރި 40 އަހަރުގެ ފޯވާޑް ސުނިލް ޗެތުރީ އެވެ. މި މެޗުގެ ވަރަށް ކުރީކޮޅު އިންޑިއާއިން ގެންދިޔައީ ރާއްޖެއަށް ޕްރެޝަރު ކުރަމުންނެވެ.
ގިނަ ވަގުތު ރާއްޖޭގެ އޭރިއާ ތެރޭގައި ބޯޅަ ހިފަހައްޓައިގެން ކުޅެމުންދަނިކޮށް ފުރަތަމަ ހާފުގެ 23 ވަނަ މިނެޓުގައި އިންޑިއާއަށް ވަނީ ލަނޑު ޖަހާނެ ރަނގަޅު ފުރުސަތެއް ލިބިފައެވެ. އެގޮތުން ރާއްޖޭގެ އިބްރާހީމް މަހުދީ ހުސެއިން (ފޭދޫ އިއްބެ) ކުރި ފައުލަކާއި ގުޅިގެން އިންޑިއާއަށް ލިބުނު ހިލޭ ޖެހުމެއްގައި ލިސްޓަން ކޮލާސޯ ފޮނުވާލި ބޯޅަ ދިޔައީ ގޯލު ދަނޑީގެ އަރިމަތިން ބޭރަށެވެ.
މި މެޗުގެ ފުރަތަމަ ލަނޑު އިންޑިއާއިން ކާމިޔާބުކުރީ 35 ވަނަ މިނެޓުގައި ކޯނަރަކުން އިންޑިއާގެ ރާހުލް ބޭކޭ ބޮލުން ޖަހައި ގޯލުގެ ތެރެއަށް ފޮނުވާލި ބޯޅައަކުންނެވެ. އަދި އިންޑިއާއިން ލީޑު ފުޅާކޮށްފައިވަނީ މެޗުގެ 66 ވަނަ މިނެޓުގައި މަހޭޝް ސިންގް ނަގައިދިން ބޯޅައަކުން ލިސްޓަން ކާމިޔާބުކުރި ލަނޑުންނެވެ. މި މެޗުގައި އިންޑިއާއިން ކާމިޔާބުކުރި ތިންވަނަ ލަނޑު މެޗުގެ 76 ވަނަ މިނެޓުގައި ލިސްޓަން ނެގި ބޯޅައަކުން ކާމިޔާބުކޮށްދިނީ އެ ޓީމުގެ ކެޕްޓަން ސުނިލް ޗެތުރީއެވެ. މިއީ ޗެތުރީ ރާއްޖެ ކޮޅަށް ޖެހި އަށްވަނަ ލަނޑެވެ. އަދި އޭނާގެ 95 ވަނަ ބައިނަލްއަގުވާމީ ލަނޑެވެ.
މި މެޗަށްފަހު އޭޝިއަން ކަޕް ކޮލިފައިން ފުރަތަމަ މެޗުގައި އިންޑިއާއިން މި މަހު 25 ވަނަ ދުވަހު އަމިއްލަ ދަނޑުގައި ބަންގްލަދޭޝްއާ ދެކޮޅަށް ކުޅޭއިރު، ރާއްޖެއިން އެ ދުވަހު ރަށުންބޭރުގައި ނުކުންނާނީ ފިލިޕީންސްއާ ދެކޮޅަށެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0