މޯލްޑިވިއަންގެ ދަތުރުތައް ދެކުނު އެފްރިކާއަށް ފަށަނީ

Read Time:5 Minute, 19 Second

(ފޮޓޯ ކްރެޑިޓްސް: ވަގުތު)

ދިވެހިރާއްޖޭގެ ޤައުމީ އެއާލައިން، (މޯލްޑިވިއަން) އިން މި އަހަރުގެ މެދުތެރޭގައި ދެކުނު އެފްރިކާގެ ޖޮހަނެސްބާގްއަށް ސީދާ ދަތުރުތައް ފަށާނެ ކަމަނެ ކަމަށް އިއުލާނުކޮށްފިއެވެ. މިއީ އެ އެއާލައިނުން ބައިނަލްއަޤްވާމީ މަންޒިލްތަކަށް ދަތުރުތައް ފުޅާކުރުމަށް ގެންގުޅޭ ސިޔާސަތުގެ ދަށުން އަޅާ އިތުރު ފިޔަވަޅެކެވެ. ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުހައްމަދު އަމީން ކުރެއްވި ޓްވީޓެއްގައި ވިދާޅުވެފައިވަނީ ދެކުނު އެފްރިކާއަށް ދަތުރުތައް ފެށިގެން ދިޔުމުން ފަތުރުވެރިކަމަށް ބޮޑު ކުރިއެރުމެއް ލިބިގެން އަންނާނެ ކަމަށާއި އެއީ ފަތުރުވެރިކަމުގެ ދާއިރާއަށް މުހިންމު މާކެޓެއް ކަމަށެވެ.

“މާލެ އާއި ޖޮހަނެސްބާގާ ދެމެދު ކުރާ ފްލައިޓަކުން ރާއްޖޭގެ ޓޫރިޒަމަށް ބޮޑު ކުރިއެރުމެއް އަންނާނެ! ސައުތު އެފްރިކާއަކީ މުހިންމު މާކެޓެކެވެ. ސީދާ މަގަކުން ދަތުރުކުރާ މީހުންގެ ދަތުރުގެ ވަގުތު 24 ގަޑިއިރުން 8 ގަޑިއިރަށް ކުޑަވެގެންދާނެއެވެ.” އަމީން ވިދާޅުވިއެވެ.

މިހާރު ދެކުނު އެފްރިކާއިން ރާއްޖެއަށް އަންނަ ފަތުރުވެރިންގެ އަދަދު ނިސްބަތުން ވަރަށް މަދުކަން ވެސް އޭނާ ފާހަގަކުރެވެއެވެ. މޯލްޑިވިއަން ހިންގާ އައިލެންޑް އޭވިއޭޝަންގެ މެނޭޖިންގ ޑިރެކްޓަރ، އިބްރާހިމް އިލްޔާސް، މީޑިއާއަށް ދެއްވި ޚާއްޞަ އިންޓަވިއުއެއްގައި ވިދާޅުވީ މި ދަތުރުތައް ފުރަތަމަ ފަށާއިރު ހަފްތާއަކު އެއް ދަތުރު ކުރާނެ ކަމަށާއި އުންމީދަކީ އެ ސަރަހައްދުން ރާއްޖެ އަންނަ ފަތުރުވެރިންގެ އަދަދު އިތުރުކުރެވޭނެ ކަމަށެވެ.

މި އަހަރުގެ ކުރީކޮޅު، ޖެނުއަރީ މަހު، މޯލްޑިވިއަނުން ވަނީ އެއަރބަސް އޭ330 ބޯޓެއް ގެނެސް ޗައިނާއަށް ދަތުރުތައް ފަށާފައެވެ. މި ބޯޓަކީ 264 ފަސިންޖަރުން އުފުލޭ ބޯޓެކެވެ. މިހާރު މި ބޯޓުން ޗައިނާގެ ތިން ސިޓީ ކަމަށްވާ ބެއިޖިންގ، ޗެންގްދޫ އަދި ޝަންހާއީއަށް ސީދާ ދަތުރުތައް ކުރަމުން ގެންދެއެވެ. މީގެ އިތުރުން، މޯލްޑިވިއަނުން ވަނީ މި އަހަރު ތެރޭގައި ޖަރުމަނުވިލާތަށް ވެސް ދަތުރުތައް ފަށާނެ ކަމަށް އިޢުލާނުކޮށްފައެވެ. އަދި އިތުރު އޭ330 ބޯޓެއް ގެނެސް ޔޫރަޕްގެ އިތުރު މަންޒިލްތަކަށް ދަތުރުތައް ފެށުމަށް ރާވާފައިވާ ކަމަށް އެ އެއާލައިނުން ބުނެފައިވެއެވެ.

މި ފިޔަވަޅުތަކަކީ ރާއްޖޭގެ ފަތުރުވެރިކަން އިތުރަށް ކުރިއެރުވުމަށާއި، ދިވެހިރާއްޖެއާއި ދުނިޔޭގެ އެހެން ޤައުމުތަކާ ދެމެދު ގުޅުން ބަދަހިކުރުމަށް އެޅޭ މުހިންމު ފިޔަވަޅުތަކެއް ކަމަށް ފާހަގަކުރެވެއެވެ. ފަތުރުވެރިކަމާއި ބެހޭ ވުޒާރާއިން މިއަދު އާއްމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން މި މަހުގެ 12 ވަނަ ދުވަހާ ހަމައަށް ރާއްޖެއަށް، 500،233 ފަތުރުވެރިން އައިސްފައި ވެއެވެ. މިދިޔަ އަހަރުގެ މި މުއްދަތުގައި ރާއްޖެ އައިސްފައި ވަނީ 478،410 ފަތުރުވެރިންނެވެ. މިދިޔަ އަހަރާއި އަޅާ ބަލާއިރު، މި އަހަރުގެ މި މުއްދަތުގައި ރާއްޖެއަށް އައި ފަތުރުވެރިންގެ އަދަދު 4.6 އިންސައްތަ އިތުރެވެ.