އައްޑޫގެ ކަރަންޓު މައްސަލަ: އާ ޖެންސެޓް އައްޑުއަށް ގެންގޮސްފި

Read Time:3 Minute, 43 Second

(ފޮޓޯ ކްރެޑިޓްސް: ހުސެއިން މެޓްރިކްސް)

އައްޑޫއަށް ދިމާވެފައިވާ ކަރަންޓްގެ މައްސަލަ ހައްލު ކުރުމުގެ ގޮތުން އާ ޖެންސެޓެއް އައްޑޫ ސިޓީއަށް ރޭ ގެންގޮސްފިއެވެ. ކަރަންޓުގެ މައްސަ މައްސަލަ ހައްލުކުރުމަށް ފެނަކަ ކޯޕަރޭޝަނާއި ސަރުކާރުން ކުރަމުންދާ މަސައްކަތުގެ ތެރެއިން އެ ސިޓީއަށް ގެންދިޔަ އެއް މެގަވޯޓުގެ ޖެންސެޓު ބެހެއްޓުމުގެ މަސައްކަތް މިހާރު ދަނީ ކުރަމުންނެވެ. މި ޖެންސެޓް ގެނައީ އަވަށްޓެރި އިންޑިއާއިންނެވެ.

މި އާ ޖެންސެޓާއެކު އައްޑޫގެ ކަރަންޓު މައްސަލައިގެ ބޮޑުބައި ހައްލުވެ، ރޯދަމަހު ކަރަންޓު ނުކެނޑި މެނޭޖްކުރެވޭނެ ކަމަށް ފެނަކައިން ހާމަކުރެއެވެ.

(ފޮޓޯ ކްރެޑިޓްސް: ހުސެއިން މެޓްރިކްސް)

އައްޑޫ ސިޓީގައި 1.8 މެގަވޯޓުގެ ޖެނަރޭޓަރު ސެޓެއް އިންސްޓޯލްކޮށް، ކަރަންޓު ކެނޑުމުގެ މައްސަލަ ހައްލުކުރުމަށް ސަރުކާރުން މަސައްކަތްކުރިއެވެ. ފެނަކައިން ކުރިން ވިދާޅުވެފައިވަނީ އައްޑޫ ސިޓީގެ ސެންޓްރަލް ޕަވަރ ސްޓޭޝަންގެ ޖެނެރޭޓަރުތަކަށް މައްސަލަ ދިމާވެފައިވާ ކަމަށާއި، މީގެ ސަބަބުން ކަރަންޓު އުފެއްދުމުގައި ދަތިތަކާ ކުރިމަތިލާންޖެހޭ ކަމަށެވެ. ރޯދަމަހަކީ ކަރަންޓުގެ ބޭނުންކުރުން އިތުރުވާ މަހެއްކަމާއި، އައްޑޫގައި ހިނގަމުންދާ ތަރައްގީގެ މަޝްރޫއުތަކާ ގުޅިގެން ކަރަންޓުގެ ޑިމާންޑް އިތުރުވަމުންދާ ކަމަށް ފެނަކައިން ވިދާޅުވެފައިވެއެވެ.

(ފޮޓޯ ކްރެޑިޓްސް: ހުސެއިން މެޓްރިކްސް)

އައްޑޫގެ ކަރަންޓުގެ މައްސަލައަކީ ޒަމާންތަކަކަށް ދިގުލައިގެން ގޮސްފައިވާ އިހުމާލުތަކެއްގެ ނަތީޖާއެއްކަން ފެނަކައިން ފާހަގަކޮށްފައިވެއެވެ. ފެނަކައިން ވަނީ މެދުކެނޑުމެއްނެތި ކަރަންޓުގެ ޚިދުމަތް ފޯރުކޮށްދިނުމަށް މަސައްކަތްކުރާނެ ކަމުގެ ޔަގީންކަން ދީ، މި މައްސަލައަށް ދާއިމީ ހައްލެއް ހޯދުމަށް މަސައްކަތްކުރަމުންދާ ކަމަށް ވިދާޅުވެފައެވެ. މި ޖެންސެޓު ބެހެއްޓުމުގެ މަސައްކަތް ނިމި، ޚިދުމަތް ދޭން ފެށުމުން އައްޑޫ ސިޓީގެ ކަރަންޓުގެ މައްސަލަ ގިނަ ދުވަސްތަކެއް ނުވެ ހައްލުވެގެންދާނެ ކަމަށް އުންމީދު ކުރެވެއެވެ.