އަބްދުއްރަހީމް ދުރުކޮށް ޕީއެންސީ ހިންގުން ފަލާހް ހަވާލުކުރި ވާހަކަ ދޮގުކޮށްފި

Read Time:4 Minute, 34 Second

(ފޮޓޯ ކްރެޑިޓްސް: ވަގުތު)

ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ހިންގުން އެ ޕާޓީގެ ޕާލަމެންޓްރީ ގްރޫޕްގެ ލީޑަރު އިބްރާހިމް ފަލާހް އާ ހަވާލުކުރި ކަމަށް ބުނެ، ބައެއް މީޑިއާތަކުން ފަތުރަމުން އަންނަ ވާހަކަތައް އެ ޕާޓީން ދޮގުކޮށްފިއެވެ. ޕީއެންސީގެ ސެކްރެޓަރީ ޖެނަރަލް މުއާޒް ހަލީމް ވިދާޅުވީ ޕީއެންސީގެ ޗެއާޕާސަން ކަމުގެ މަގާމުގައި ހުންނެވި އަބްދުއްރަހީމް އަބްދުﷲ ޕާޓީ ހިންގުމުން ދުރުކޮށް، ޕާޓީ ހިންގުމުގެ ޒިންމާ ފަލާހް އާ ހަވާލުކުރި ކަމަށް ބުނާ ވާހަކަތަކަކީ “ކަނޑައެޅިގެން ބުހުތާނު ދޮގު” ވާހަކަތަކެއް ކަމަށެވެ.

ބައެއް މީޑިއާތަކުން ހަބަރު ފަތުރާފައިވާ ގޮތުން ޕީއެންސީ ހިންގަވަމުން ގެންދެވި އަބްދުއްރަހީމް، މަސްއޫލިއްޔަތުތަކުން ދުރުކުރިކަމާއި ޕާޓީ ހިންގުމުގެ ޒިންމާ ފަލާހް އާ ހަވާލުކުރިކަން ޕާޓީގެ ލީޑަޝިޕްގެ ހުރިހާ ބޭފުޅުންނަށާއި އިދާރީ ބޭފުޅުންނަށް ވަނީ އަންގައިފައެވެ. ނަމަވެސް، މި ވާހަކަތަކަށް ރައްދު ދެއްވަމުން މުއާޒު ހަލީމް ވިދާޅުވީ ޕާޓީ ހިންގުމުގެ ބާރު ފަލާހަށް ދީފައި ނުވާ ކަމަށެވެ.

މި ޚަބަރުތައް ފެތުރުނީ ރައީސް ޑރ. މުހައްމަދު މުއިއްޒު އާއި އަބްދުއްރަހީމްގެ ގުޅުން ގޯސްވެފައިވާ ކަމަށް އަޑުފެތުރިފައިވާތާ ގިނަ ދުވަސްތަކެއް ވުމަށްފަހުގައެވެ. އަދި ޕީއެންސީގެ ހިންގުމުގައި އަބްދުއްރަހީމްގެ ދައުރެއް ނެތް ކަމަށް ވާހަކަ ދެކެވޭތާ ވެސް ދުވަސްތަކެއް ވެފައިވާ ދަނޑިވަޅެއްގައެވެ. އެ އަޑު އެންމެ ގަދަވީ، އަބްދުއްރަހީމްގެ ދަރިކަލުން އަދި ޓޫރިޒަމް މިނިސްޓަރުކަމުން އިބްރާހިމް ފައިސަލް ވަކިކުރި ހިސާބުންނެވެ.

ޑރ. މުއިއްޒާއި އަބްދުއްރަހީމް މަޝްވަރާ ކުރައްވައިގެން ހިޔާލު ތަފާތުވުންތައް މިހާރު ވަނީ ހައްލު ކުރައްވައިފައެވެ. އަދި ޕީއެންސީގެ ރަސްމީ ވަޓްސްއެޕް ގްރޫޕްތަކުގައި އަބްދުއްރަހީމް ގެންދަވަނީ ރައީސް ޑރ. މުއިއްޒުގެ ސިޔާސަތުތަކަށް ވަރަށް ބޮޑަށް ތައުރީފް ކުރައްވައި ތަފާތު އެކިއެކި ވާހަކަފުޅު ދައްކަވަމުންނެވެ. އަބްދުއްރަހީމް ޕީއެންސީގެ ރަސްމީ ވަޓްސްއެޕް ގްރޫޕްތަކުން ބޭރުކުރި އަޑުތަކެއް ވެސް މި ފަހުން ފެތުރުނެވެ. އެކަމަކު، އެއީ ވެސް ހަގީގަތާ ހިލާފު ވާހަކައެއް ކަން ވަނީ އެނގިފައެވެ.

ރައީސް ޑރ. މުއިއްޒާއި އަބްދުއްރަހީމްގެ ގުޅުން ރަނގަޅު ކަން އެނގެނީ ރައްޔިތުންގެ މަޖިލިހުގައި އަބްދުއްރަހީމް ދެއްވި ތަރާވީހުގެ ދައުވަތު ރައީސް ޑރ. މުއިއްޒު ގަބޫލުފުޅު ކުރައްވައި އެ ތަރާވީހަށް ވަޑައިގަތުމުންނެވެ. ޕީއެންސީއަކީ ރާއްޖޭގައި އޮތް އެންމެ މެމްބަރުން ގިނަ ޕާޓީއެވެ.