މި ސަރުކާރު އައީ ކަންކަން ކުރިއަށް ނުގޮސް ގަލުގައި އެޅީމަ ހައްލުކުރަން: ނާޒިމް

Read Time:6 Minute, 59 Second

(ފޮޓޯ ކްރެޑިޓްސް: ރައްޔިތުންގެ މަޖިލިސް)

ރައީސް ޑރ. މުހައްމަދު މުއިއްޒުގެ ސަރުކާރަކީ ރާއްޖޭގައި މީގެކުރިން އުފެދުނު ސަރުކާރުތަކުން ރައްޔިތުންނަށް ބޭނުންވާ ކަންތައްތައް ނުކޮށް މަސައްކަތްތައް “ގަލު”ގައި އަޅައިގަތުމުން، އެ ކަންތައްތައް ހައްލު ކުރުމަށް އައި ސަރުކާރެއް ކަމަށް ރައްޔިތުންގެ މަޖިލިހުގެ ނައިބު ރައީސް އަހުމަދު ނާޒިމް ވިދާޅުވެއްޖެއެވެ. ރާއްޖޭގެ ޓޫރިޒަމާ ބެހޭ ގާނޫނަށް އިސްލާހު ގެނައުމުގެ ބިލަށް ބަހުސް ކުރައްވަމުން ނާޒިމް ވިދާޅުވީ މި ސަރުކާރުގެ ކުރީގެ ސަރުކާރުތަކުން ރައްޔިތުންނަށް ފޯރުކޮށްދޭން ޖެހޭ ޚިދުމަތްތައް ނުލިބި ކަންތައްތައް ބޮއްސުންލައިގެން ދިޔުމުން އެކަންތައް ހައްލު ކުރުމަށް އައި ސަރުކާރެއް ކަމަށެވެ.

“މި ސަރުކާރަކީ ރައްޔިތުން އެދޭ ކަންތައް ކުރިޔަށް ނުގޮސް ގަލުގައި އެޅީމާ އެކަންތައްތައް ހައްލުކޮށްދޭން އައި ސަރުކާރެއް.” މަޖިލިހުގެ ދިއްގަރު ދާއިރާގެ މެމްބަރު ކަން ވެސް ކުރައްވާ ނާޒިމް ވިދާޅުވިއެވެ.

އެގޮތުން ކައުންސިލްތަކުގެ އިހުތިސާތަކުގައި ހުރި ރަށްތައް ކުރީ ސަރުކާރުތަކުން ޓޫރިޒަމްގެ ބޭނުމަށް ދީފައިވާކަން ފާހަގަކުރައްވަމުން ނާޒިމް ވިދާޅުވީ ދިއްގަރު ފަޅުތެރެއިން 10 ހެކްޓަރުގެ ބިމަކަށް ފަސް ލައްކަ ޑޮލަރު ނެގުމަށްފަހު ރިސޯޓެއް ހެދުމަށް ބަޔަކަށް ދީފައިވާ ކަމަށެވެ. އަދި މ.ވޭވަށު ފަޅުތެރެއިންވެސް 10 ހެކްޓަރުގެ ބިމެއް ފަސް ލައްކަ ޑޮލަރު ނެގުމަށްފަހު ބަޔަކަށް ދޫކޮށްފައިވާ ކަމަށް ނާޒިމް ވަނީ ވިދާޅުވެފައެވެ. ހަމައެއާއެކު މުލަކު ދާއިރާގެ އިހުތިސާސްގައި ހިމެނޭ، ކޮޅުފުށީ އިހުތިސާސްގައި ހިމެނޭ “ދިއްތުނޑި” ކިޔާ ރަށެއްވެސް ވަނީ 1.5 މިލިޔަން ޑޮލަރަށް ޓޫރިޒަމަށް ކުއްޔަށް ދޫކޮށްފައި ކަމަށް ވިދާޅުވިއެވެ.

އަދި ދާދި ފަހުންވެސް ކ. ގާފަރު ކައުންސިލުގެ ފަރާތުން އެރަށުގެ ފަޅުތެރޭ ހިމެނޭ ވެލިފަރު ކިޔާ ވެލިގަނޑެއްގައި ރިސޯޓެއް ހެދުމަށް ހުއްދައަށް އެދުމުން ލޯކަލްް ކައުންސިލް މިނިސްޓްރީން ބަންޑާރަ ނައިބުގެ ލަފައަކަށް އެދި ވަނީ ސިޓީއެއް ހުށަހަޅާފައެވެ.

“ބަންޑާރަނައިބުގެ ލަފާގައި ބަޔާންކޮށްފައި މިވަނީ ކައުންސިލްތަކުގެ އިހުތިސާސްގައި ހިމެނޭ ފަޅުތަކާއި ރަށްތަކާ ޓޫރިޒަމްގެ ބޭނުމަށް ކުއްޔަށް ދިނުމާއި އެކަންކަން ކުރުމުގެ ބާރުވެރިކަން ލޯކަލް ކައުންސިލް ގާނޫނުތަކުން ގާނޫނަށް ލިބިދީފައި ނުވާކަމަށް.” ނާޒިމް ވިދާޅުވިއެވެ.

ބަންޑާރަ ނައިބުގެ ލަފާ މިގޮތަށް އައުމުން މިހާރު މިގޮތަށް ދީފައި ހުރި ހުރިހާ ތަނެއްގެ މަސައްކަތް ހުއްޓިފައިވާ ކަމަށް ނާޒިމް ވިދާޅުވިއެވެ. މެންބަރު ވިދާޅުވި ގޮތުގައި އެ ފަޅުތައް ޓޫރިޒަމަށް ބޭނުން ކުރުމަށް ކައުންސިލްތަކަށް ފައިސާ ދެއްކުމަށްފަހު ކުރެހުންތައް ތައްޔާރުކޮށް ކޮންސެޕްޓުވެސް ޓޫރިޒަމް މިނިސްޓްރީއަށް ވަނީ ހުށަހަޅާފައެވެ. ނަމަވެސް އެހިސާބުން މި މަސައްކަތްވެސް “ގަލު” އަޅާފައިވާ ކަމަށް ވަނީ ވިދާޅުވެފައެވެ.

“ސަބަބަކީ މިކަން ކުރެވޭނެ އެއްވެސް ގޮތެއް ކައުންސިލްތަކާއި ބެހޭ ގާނޫނުގެ ދަށުގައި ނެތް.” ނާޒިމް ވިދާޅުވިއެވެ.

ނާޒިމް ވިދާޅުވި ގޮތުގައި ސަރުކާރުން މި ހުށަހަޅާ އިސްލާހަކީ ކައުންސިލްތަކުގެ އިހުތިސާސްތެރޭގައި އޮތް ކަމެއްގެ ތެރެޔަށް ރައީސުލްޖުމްހޫރިއްޔާ އެބާރު ބޭނުންފުޅުވެގެން ނޫނެވެ. އެހެންނަމަވެސް މި އިސްލާހަކީ މިކަންތައް ވާނެ ގޮތެއް ހަދައި ދިނުމަށްޓަކައި ސަރުކާރުން ހުށަހެޅި އިސްލާހެއް ކަމަށް ވިދާޅުވިއެވެ. މި އިސްލާޙު ފާސްނުވެއްޖެނަމަ އެ ފަރާތްތަކުގެ އަތުން ސަރުކާރަށް ނަގާފައި ހުރި ފައިސާ އަނބުރާ ދައްކަން ޖެހޭ ކަމަށްވެސް ނާޒިމް ވިދާޅުވިއެވެ.

މީގެއިތުރުން ކ.ތުލުސްދޫއިން ފަތުރުވެރިކަމަށް ބިން ދޫކޮށްފައިވާކަން މެންބަރު ފާހަގަކުރެއްވިއެވެ. މީހުން ދިރިއުޅޭ ރަށެއްގެ ފަޅުތެރޭގައި ވޯޓާ ބަންގަލޯސްވެސް އެޅޭ ގޮތަށް ކުއްޔަށް ދޫކުރުމަކީ ރަނގަޅު ކަމެއް ނޫން ކަމަށް ނާޒިމް ވަނީ ވިދާޅުވެފައެވެ.