Read Time:4 Minute, 18 Second
މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނަށް ހުށަހެޅޭ ޝަކުވާތަކާއި މައްސަލަތައް ބަލައި ފިޔަވަޅު އެޅުމާ ބެހޭ އައު ގަވާއިދު އެކުލަވައިލައި، މިއަދު ސަރުކާރުގެ ގެޒެޓުގައި ޝާއިޢުކޮށްފިއެވެ. މި ގަވާއިދު ގެޒެޓްކުރުމާ ގުޅިގެން، މިއަދުން ފެށިގެން މި ގަވާއިދަށް ޢަމަލުކުރަން ވަނީ ފަށާފައެވެ. މި ގަވާއިދުގެ މައިގަނޑު މަޤްޞަދަކީ މީޑިއާގެ ވަސީލަތްތަކުން ފަތުރާ ކޮންޓެންޓާ ގުޅިގެން ހުށަހެޅޭ ޝަކުވާތައް އިންސާފުވެރި އަދި ދެފުށް ފެންނަ ނިޒާމެއްގެ ތެރެއިން ބަލައި، ޤާނޫނާއި ގަވާއިދާ ޚިލާފުވާ ހާލަތްތަކުގައި އެކަށީގެންވާ ފިޔަވަޅު އެޅުމެވެ. މި ގަވާއިދުގެ ދަށުން މީޑިއާއާ ގުޅޭ ޝަކުވާ ހުށަހެޅުމުގެ ފުރުޞަތު ކޮންމެ ފަރާތަކަށްވެސް އޮންނާނެއެވެ. މީގެ އިތުރުން، ކޮމިޝަނުގެ އަމިއްލަ އިސްނެގުމުގެ މަތިންނާއި، ދައުލަތުގެ މުއައްސަސާތަކުން ހުށަހަޅާ މައްސަލަތައްވެސް މި ގަވާއިދުގެ ދަށުން ބަލަމުންދާނެއެވެ.
އައު ގަވާއިދުގައިވާ ގޮތުން، ކޮންޓެންޓަކާ ގުޅޭގޮތުން ޝަކުވާއެއް ހުށަހަޅާނަމަ، އެ ކޮންޓެންޓެއް ޝާއިޢުކުރި ނުވަތަ ބްރޯޑްކާސްޓްކުރި ތާރީޚުން ފެށިގެން 45 ދުވަހުގެ ތެރޭގައި ކޮމިޝަނަށް ހުށަހަޅަންޖެހެއެވެ. މައްސަލައިގެ ތަޙުޤީޤު މަރުޙަލާގައި، މައްސަލަ ރައްދުވާ ފަރާތަށް ޖަވާބުދާރީވުމަށް 7 ދުވަހުގެ މުއްދަތެއް ދޭންޖެހޭއިރު، މައްސަލައިގައި ހިމެނޭ ކޮންމެ ފަރާތަކަށްވެސް ޤާނޫނީ ވަކީލަކު އައްޔަންކުރުމުގެ ޙައްޤު ލިބިގެންވެއެވެ. ބްރޯޑްކާސްޓަރުންނާއި، މީޑިއާގައި މަސައްކަތްކުރާ ފަރާތްތަކުގެ އިތުރުން ނޫސްވެރިންގެ ސުލޫކީ މިންގަނޑާ ޚިލާފުވާ ފަރާތްތަކާމެދު އަޅާނެ ފިޔަވަޅުތައް މި ގަވާއިދުގައި ވަނީ ތަފްޞީލުކޮށް ކަނޑައަޅާފައެވެ. މީގެ ތެރޭގައި ކަންކަން އިޞްލާޙުކުރަން އެންގުމާއި، އާންމުކޮށް މަޢާފަށް އެދުމަށް އެންގުމުގެ އިތުރުން އެހެނިހެން އިދާރީ ފިޔަވަޅުތައް ހިމެނެއެވެ.
ކޮމިޝަންގެ ނިންމުމަކާ މެދު ހިތްހަމަނުޖެހޭނަމަ، އެ ނިންމުމެއް ނިންމި ތާރީޚުން ފެށިގެން 7 ދުވަހުގެ ތެރޭގައި އެ ނިންމުން މުރާޖަޢާކޮށްދިނުމަށް އެދި ހުށަހެޅުމުގެ ފުރުޞަތު އޮންނާނެއެވެ. އަދި ކޮމިޝަނުގެ ނިންމުމަކުން އެއްވެސް ފަރާތެއްގެ ޙައްޤަކަށް އުނިކަމެއް ލިބިއްޖެ ކަމަށް ގަބޫލުކުރެވޭނަމަ، 6 މަސްދުވަހުގެ ތެރޭގައި އެ މައްސަލައެއް ކޯޓަށް ހުށަހެޅުމުގެ އިޚްތިޔާރުވެސް މި ގަވާއިދުން ލިބިދެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0