Read Time:2 Minute, 59 Second
މާޒިޔާ ސްޕޯޓްސް އެންޑް ރެކްރިއޭޝަނުން ވަނީ އަންހެން ލީގުގެ ޝީލްޑް ސަޕޯޓަރުންގެ ހިތްވަރާއެކު އުފުލާލާނެ ކަމަށް ބުނެފައެވެ. އޮޑިއަކީ ވަރުގަދަ ޓީމެއްކަން ދަނެގެން ކުޅެ ލީގު ކާމިޔާބުކުރާނެ ކަމަށް މާޒިޔާގެ ކުޅުންތެރިންނާއި ކޯޗު ބުނެއެވެ. މާޒިޔާގެ ކެޕްޓަން ބުނީ މިއީ ސީދާ ތައްޓަށް އަމާޒުހިފައި ނިކުތް ޓީމެއް ކަމަށާއި، ލީގުގެ ފަހު މެޗުވެސް މާޒިޔާއިން ކާމިޔާބުކުރާނެ ކަމަށެވެ. ގައުމީ ޓީމުގެ ތަޖުރިބާކާރު ކުޅުންތެރިޔާ އައިޝަތު މާހީން ވިދާޅުވީ އޮޑިއާ ދެކޮޅަށް ވަރުގަދަ ފައިޓެއް ދިނުމަށް ފުރިހަމައަށް ތައްޔާރަށް ތިބި ކަމަށެވެ.
މާޒިޔާ އަންހެން ފުޓުބޯޅަ ޓީމުގެ ހެޑް ކޯޗު އަހުމަދު އަހުސަން ފާހަގަކުރެއްވީ ލީގު ހީވެސް ނުކުރާހާ ފޯރިގަދަވެގެން ދިޔަ ކަމަށާއި، މިއަދުގެ މެޗު ވަރަށް ވާދަވެރިވާނެ ކަމަށެވެ. މި މުހިންމު މެޗަށް ވީހާވެސް ގިނަ ސަޕޯޓަރުން ދަނޑަށް އައިސް ޓީމަށް ހިތްވަރު ދިނުމަށް އޭނާ އެދިލެއްވިއެވެ. އަދި އަންހެން ފުޓުބޯޅަ ކުރިއަރައިގެން ދިޔަކަން މި ލީގުން ފެނިގެންދާ ކަމަށާއި، ބިދޭސީ ކުޅުންތެރިންނާއެކު ޓީމުތައް ވަރުގަދަވެ، މެނޭޖްމަންޓްތަކުގެ ބައިވެރިވުން އިތުރުވެފައިވާކަން އޭނާ ފާހަގަކުރިއެވެ.
އަންހެން ލީގުގެ ފަހު މެޗު މިއަދު ހަވީރު ގަލޮޅު ދަނޑުގައި ކުޅެވޭނެއެވެ. މާޒިޔާގައި ތަޖުރިބާކާރު ގައުމީ ކުޅުންތެރިންނާއި ނޭޕާލުގެ ދެ ކުޅުންތެރިން ހިމެނޭއިރު، އޮޑީގައިވެސް ތިބީ ރާއްޖޭގައި ގުނާލެވޭ ފެންވަރުގެ ކުޅުންތެރިންނެވެ. މި މެޗުން މާޒިޔާއަށް އެއްވަރުކޮށްގެން ވެސް ލީގު ހޯދުމުގެ ފުރުސަތު އޮތް ނަމަވެސް، އޮޑީއަށް ލީގު ކާމިޔާބު ކުރެވޭނީ މި މެޗުން މޮޅުވެގެންނެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0