ދަރަނި ދައްކަން ދަތިވާ ގޮތަށް ފްލެޓުތަކުގެ ކުލި/ޖޫރިމަނާ އަށް ލުޔެއް ނުދެން: ރައީސް

Read Time:4 Minute, 42 Second

(ފޮޓޯ ކްރެޑިޓްސް: މިހާރު)

ރައީސް ޑރ. މުހައްމަދު މުއިއްޒު މާލޭގެ އަވަށްތަކާއި ހުޅުމާލެ 1 އަދި 2 ގެ ރައްޔިތުންނާ ބައްދަލުކުރައްވަން ކުރެއްވި ސިލްސިލާ ބައްދަލުވުންތަކުގެ އެންމެ ފަހު ބައްދަލުވުމުގައި، ހުޅުމާލެ 1 ގެ ރައްޔިތުންގެ މައިގަނޑު ކަންބޮޑުވުމަކަށް ވެފައިވަނީ ސަރުކާރުން ދޫކޮށްފައިވާ ފްލެޓުތަކުގެ ކުލި ނުދެއްކުމުން އަރާފައިވާ ޖޫރިމަނާ މާފުކުރުމާ މެދުގަ އެވެ. ބައެއް ފަރާތްތަކުން ވަނީ މިކަމުގެ ސަބަބުން ދައުލަތަށް ގެއްލުންވެ، ކުލި ނުދެއްކުމުގެ ސަގާފަތެއް އުފެދިދާނެ ކަމުގެ ބިރުވެރިކަން ފާޅުކޮށްފަ އެވެ.

މި ކަންބޮޑުވުންތަކަށް ރައީސް ޑރ. މުއިއްޒު ޖަވާބު ދެއްވަމުން ވިދާޅުވީ، ފްލެޓުތަކުގެ ޖޫރިމަނާ މާފުކުރުން ނުވަތަ އެހެން ކަހަލަ ލުޔެއް ދިނުމަކީ، ރާއްޖޭގެ އިގުތިސާދަށް ގެއްލުމެއް ނުވާނެ ގޮތަށް، އަދި ދައުލަތުގެ ދަރަނި ދެއްކުމުގެ ރާވައިފައިވާ ކަންކަމަށް ހުރަހެއް ނާޅާނެ ގޮތަށް، ވަރަށް ބޮޑަށް ދިރާސާ ކުރެއްވުމަށް ފަހު ނިންމަވާ ކަމަށެވެ. ރައްޔިތުންނަށް އޭގެ ބުރައެއް ނުޖެހޭނެ ގޮތަށް، ހަމަހަމަ އުސޫލެއްގެ ތެރެއިން މިކަންކަން ކުރިއަށް ގެންދާނެ ކަމަށް ވެސް ރައީސް ވިދާޅުވި އެވެ. އެގޮތުން، މާލެ ސަރަަހައްދުގައި ދައުލަތުން އަޅައިދީފައިވާ ފްލެޓުތަކެކޭ އެއްގޮތަށް ރަށްރަށުގެ ފްލެޓުތަކުގެ ކުލި ވެސް ވަނީ ކުޑަކޮށްދެއްވާފަ އެވެ.

މިދިޔަ ހަފުތާގައި ސަރުކާރުން ވަނީ ހުޅުމާލޭގެ ބައެއް ފްލެޓުތަކުގެ ކުއްޔާއި ސެކިއުރިޓީ ޑިޕޮޒިޓް ކުޑަކޮށް، އަދި ކުލި ނުދެއްކުމުން އަރާފައިވާ ބައެއް ޖޫރިމަނާތައް މާފުކޮށްދީފަ އެވެ. ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލެ 2 ގައި އިމާރާތް ކޮށްފައިވާ 4،000 ފްލެޓުގެ ދެ ކޮޓަރީގެ ކުލި 7،000ރ. އިން 6،000ރ. އަށް، އަދި ތިން ކޮޓަރީގެ ކުލި 9،000ރ. އިން 8،500ރ. އަށް ވަނީ ކުޑަކޮށްފަ އެވެ. މެއިންޓަނެންސް ފީގެ ގޮތުގައި ނަގާ 1،000ރ. އަށް ބަދަލެއް ނާންނާނެ އެވެ. އަދި ދެ ކޮޓަރީގެ ފްލެޓުގެ ސެކިއުރިޓީ ޑިޕޮޒިޓް 15،000ރ. އިން 6،000ރ. އަށް، އަދި ތިން ކޮޓަރީގެ ފްލެޓުގެ ޑިޕޮޒިޓް 25،000ރ. އިން 8،500ރ. އަށް ވަނީ ކުޑަކޮށްފަ އެވެ.

މީގެ އިތުރުން، ހުޅުމާލެ 2 ގައި ހުންނަ ހިޔާ ފްލެޓުތަކުގެ ކުލި ނުދައްކައިގެން މި އަހަރުގެ ނޮވެމްބަރު މަހުގެ ނިޔަލަށް އަރާފައިވާ ހުރިހާ ޖޫރިމަނާއެއް ވެސް ވަނީ މާފުކޮށްދީފަ އެވެ. 2023 ވަނަ އަހަރުގެ ޖޫރިމަނާތައް މީގެ ކުރިން ވެސް މާފުކޮށްދީފައިވާ އިރު، މިފަހަރު މާފުކޮށްދިނީ 2024 ވަނަ އަހަރުގެ ޖެނުއަރީ 1 އިން ފެށިގެންނެވެ. ހިޔާ ފްލެޓުތަކުގެ މަހު ކުއްޔަކީ 3،984ރ. ކަމަށް ވާއިރު، މެއިންޓަނެންސް ފީއާ އެކު ކޮންމެ މަހަކު އެޗްޑީސީއަށް ދައްކަން ޖެހެނީ 4،984ރ. އެވެ.