Read Time:4 Minute, 59 Second
ރެއާލް މެޑްރިޑުގެ ކުޅުންތެރިން ހިތްހަމަ ނުޖެހުނަސް އެ ޓީމުގެ ކޯޗު ޒަބީ އަލޮންސޯ އޭނާގެ އުސޫލުތައް ބަދަލު ނުކުރުމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ އެދިއްޖެ އެވެ. އަލޮންސޯ އަށް ޖަރުމަނުގެ ބަޔާން މިއުނިކްގައި ކޯޗުކޮށްދިން ސްޕޭނުގެ ކޯޗު މިހެން ބުނީ އަލޮންސޯގެ ޓީމާ ދެކޮޅަށް ޗެމްޕިއަންސް ލީގުގައި އޭނާ މިރޭ ކުޅެން ޖެހޭ މެޗުގެ ކުރިން ވާހަކަ ދައްކަމުންނެވެ. “އަލޮންސޯ އަކޯ މޮޅު ކޯޗެއް. އޭނަ އަށް ރެއާލް މެޑްރިޑުގެ ކޯޗުކަން ކުރެވޭނެ. އޭނާގެ އުސޫލުތައް ބަދަލު ކުރަންޖެހޭ ސަބަބެއްނެތް. އަހަރެން ބުނާނީ އޭނާ އެ ގޮތުގައި ކުރިއަށްދާންވީއޭ،” ގާޑިއޯލާ ބުންޏެވެ. އޭނާ މިހެން ބުނިއިރު މި މެޗަކީ އަލޮންސޯގެ ވަޒީފާއާ ގުޅުން ހުރި މެޗަށްވެފައިވަނިކޮށެވެ. މެޗުން ބަލިވެއްޖެނަމަ އޭނާގެ ވަޒީފާ ގެއްލުން ގާތެވެ. ދުނިޔޭގެ އެންމެ މޮޅު ކޯޗުކަމަށް ގިނަ ބަޔަކު ގަބޫލުކުރާ ގާޑިއޯލާ މިކަމާ ގުޅިގެން ބުނީ މެންޗެސްޓާ ސިޓީގައި ހުސްވި ސީޒަނުގެ މެދުތެރެއިން އޭނާ ތަޖުރިބާ ކުރަން ޖެހުނު ފަދަ ކަމެއް ދިމާވިނަމަ ރެއާލް މެޑްރިޑުން އޭނާ ވެސް ވަކިކުރާނެ ކަމަށެވެ. ސިޓީގައި މިދިޔަ ސީޒަނުގެ މެދުތެރެއިން ގާޑިއޯލާ އަށް ގިނަގުނަ މެޗުތަކަކުން ބަލިވުން ދިމާވި އެވެ.
“ރެއާލް މެޑްރިޑާއި ބާސެލޯނާގެ ކޯޗުކަމަކީ ފަސޭހަ ކަމެއްނޫން. އެ ދެ ކުލަބުން ނަތީޖާ އަށް ބާރު އަޅާނެ. އަހަރެންނަކަށް ނޭނގެ މި މެޗަށް ފަހު އޭނާގެ ވަޒީފާއަށް ވާނެ ގޮތެއް. އަހަރެން (ރެއާލްގެ ރައީސް ފްލޮރެންޓީނޯ) ޕެރޭޒްއާ ވާހަކަ ނުދައްކަން. އެކަމަކު އަލޮންސޯ އަކީ ރެއާލް މެޑްރިޑާއި މި ހާލަތު އެނގޭނެ މީހެއް. އޭނާ އަށް ކުރިއަށް ދެވޭނެ. ވަރަށް ގިނަ ކުޅުންތެރިން ވެސް އެތިބީ އަނިޔާގެ މައްސަލަތަކާއެކު. އަހަރެން މިދިޔަ ސީޒަނުގައި ތަޖުރިބާކުރި ކަމެއް ރެއާލްގައި ދިމާވިނަމަ އެ މީހުން އަހަރެން ވެސް ވަކިކުރާނެ،” ގާޑިއޯލާ ބުންޏެވެ. ރެއާލް މެޑްރިޑުގައި އަލޮންސޯ އަށް ބާރެއް ނެތްކަމަށް ބުނާ ވާހަކަތަކާ މެދު ވެސް ގާޑިއޯލާ ޖަވާބުދިނެވެ.
“އޮތީ ދެ ގޮތް. އެއީ ރެއާލް މެޑްރިޑުގެ އުސޫލު ބައްޓަން ކުރާ ގޮތެއްގެ މައްޗަށް އޮންނާނެ ކަމެއް. އެމީހުން ކޯޗަށް ބާރު ދީފިނަމަ އޭނާ ބާރު ގަދަވާނެ. އެ މީހުން ކުޅުންތެރިންނަށް ބާރު ދީފިނަމަ އެ މީހުން ބާރު ގަދަވާނެ. މިއީ ކުލަބުގެ ނިންމުމެއް. އަލޮންސޯ އަކީ އަހަރެން ދެކޭ ގޮތުގައި ކާމިޔާބު ކޯޗަކަށްވުމަށް ބޭނުންވާ ސިފަތައް ހުރި މީހެއް. އޭނާ އަށް ވާނެ. އަހަރެން އެދެނީ އޭނާ އަށް ކާމިޔާބު ލިބުން. އެކަމަކު މި މެޗުގައި އަހަރެންގެ ވިސްނުން އޮތީ ރެއާލް ބަލިކުރަން،” ގާޑިއޯލާ ބުންޏެވެ. ސްޕޭނުގެ ގިނަ މީޑިއާތަކުން ބުނަނީ މެޗުން ރެއާލް މޮޅުނުވެއްޖެނަމަ އަލޮންސީގެ ބަދަލުގައި އާ ކޯޗެއް ރެއާލް މެޑްރިޑުން ހޯދާނެ ކަމަށެވެ. އެ މީހަކަށް ކުރީގެ ކޯޗު ޒައިނުއްދީން ޒިދާން ވެސް ވެދާނެ ކަމަށެވެ.
Happy
50 %
Sad
50 %
Excited
0 %
Sleepy
0 %
Angry
0 %
Surprise
0 %
0
0