Read Time:4 Minute, 1 Second
(ފޮޓޯ ކްރެޑިޓްސް: ޕީއެސްއެމް ނިއުސް)
ފުލުހުންގެ އެޕްލިކޭޝަން “ޕޮލިސް އެމްވީ” އައު ޚިދުމަތްތަކަކާއި ފީޗާސްތަކަކާއެކު އަލުން އިފްތިތާޙުކޮށްފިއެވެ. މި އެޕްލިކޭޝަން އިފްތިތާޙުކޮށްދެއްވީ ދާޚިލީ ސަލާމަތާއި ފަންނިއްޔާތާ ބެހޭ ވުޒާރާގެ ސްޓޭޓު މިނިސްޓަރ ޑރ. މުޙައްމަދު ކިނާނަތެވެ. ފުލުހުން ވިދާޅުވީ، މޯލްޑިވްސް 2.0 އުސޫލުތަކާ އެއްގޮތަށް އީފާސް މެދުވެރިކޮށް ލޮގިންވެވޭ ގޮތަށް ފަރުމާކޮށްފައިވާ މި އެޕްލިކޭޝަނަކީ ރައްޔިތުންނަށް ދޭ ޚިދުމަތުގެ ދުވެލި ހަލުވިކޮށް، މުޖުތަމަޢުގެ ރައްކާތެރިކަން ކަށަވަރު ކުރުމުގައި ރައްޔިތުންގެ ބައިވެރިވުން އިތުރުކުރާނެ ކަމެއް ކަމަށެވެ.
އައު ޚިދުމަތްތަކުގެ ތެރޭގައި މައްސަލަ ހުށައެޅުމާއި، ތަހުޤީޤު ކުރާ މައްސަލަތަކާ ގުޅޭ ހެކި ހުށަހެޅުމާއި، ދިރިއުޅޭ ވެށީގައި ހިނގާ ކުށްތައް ރިޕޯޓްކުރުމުގެ ފުރުސަތު ހިމެނެއެވެ. މީގެއިތުރުން، މައްސަލަ ތަޙުގީގު ކުރާ އޮފިސަރުގެ މަޢުލޫމާތާއި، އެފަރާތާއި ސީދާ މުއާމަލާތް ކުރެވޭނެ ނިޒާމެއްވެސް އެޕްލިކޭޝަންގެ ތެރެއިން ލިބިގެންދާނެއެވެ. ފުލުހުންގެ ބަންދުގައި ތިބޭ ފަރާތްތަކަށް ޒިޔާރަތް ކުރުމަށް ނުވަތަ ބަންދުގައިވާ މީހެއްގެ ޤާނޫނީ ވަކީލަކަށް އައްޔަންވުމަށް އެދި އޮންލައިންކޮށް އެޕްލައި ކުރެވޭނެއެވެ. އަދި ގެއްލިގެން ރިޕޯރޓް ކޮށްފައިވާ ތަކެއްޗާއި، ޓޯކޮށްފައިވާ އުޅަނދުފަހަރުގެ މަޢުލޫމާތު ބެލޭނެއެވެ. ޕޮލިސް ސެޓްފިކެޓް އަދި ރެކޯޑް ކްލިއަރެންސް ފަދަ ޚިދުމަތްތަކަށް އޮންލައިންކޮށް އެޕްލައިކުރުމާއި ޑިޖިޓަލްކޮށް ޑައުންލޯޑް ކުރުމުގެ ފަސޭހަ މަގެއްވެސް މި އެޕްލިކޭޝަންގައި ޤާއިމުކޮށްފައިވެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާން ކުރައްވާފައިވާ މޯލްޑިވްސް 2.0ގެ ސިޔާސަތުގެ ދަށުން ފުލުހުންގެ ޚިދުމަތް ޑިޖިޓަލީ ޓްރާންސްފޯމް ކުރުމަށް މި އެޕްލިކޭޝަން މުހިންމު ދައުރެއް އަދާކުރާނެ ކަމަށް ފުލުހުން ވިދާޅުވިއެވެ. މި މަސައްކަތަކީ، ރައްޔިތުންނާއި ފުލުހުންނާ ދެމެދު ގާތް ގުޅުމެއް އުފެދި، ރައްކާތެރި މުޖުތަމަޢެއް ޤާއިމު ކުރުމުގައި ކޮންމެ ރައްޔިތަކަށްވެސް ބައިވެރިވެވޭނެ މަގު ތަނަވަސްކޮށްދޭ ކަމެއް ކަމަށް ދިވެހި ފުލުހުންގެ ޚިދުމަތުން އިތުރަށް ވިދާޅުވިއެވެ.
Happy
0 %
Sad
0 %
Excited
0 %
Sleepy
0 %
Angry
100 %
Surprise
0 %
0
0