އައިކާއޯ އޮޑިޓުން %14ގެ ކުރިއެރުމާއެކު ސިނާޢަތް ވަރުގަދަކުރެއްވިއްޖެ: ވަޒީރު އަމީން

Read Time:4 Minute, 3 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުޙައްމަދު އަމީން ވިދާޅުވީ، އައިކާއޯ އޮޑިޓުން ރާއްޖެއަށް 14 އިންސައްތައިގެ ކުރިއެރުމެއް ލިބި، މަދަނީ އުދުހުންތަކުގެ ސިނާޢަތް އިތުރަށް ހަރުދަނާވެފައިވާ ކަމަށެވެ. ބައިނަލްއަޤްވާމީ ވައިގެ ދަތުރުފަތުރުގެ ދުވަހާއި ގުޅިގެން ދެއްވި ޚިޠާބުގައި ވަޒީރު ފާހަގަކުރެއްވީ، 2014 ވަނަ އަހަރުގެ އޮޑިޓަށްވުރެ މިފަހަރު 79 އިންސައްތައިގެ ވަގުތީ ނަތީޖާއެއް ލިބިފައިވާކަމަށާއި، މިއީ ސިނާޢަތުގެ ސަލާމަތާއި ރައްކާތެރިކަން ކަށަވަރުކުރުމަށް ކުރެވުނު މަސައްކަތުގެ ނަތީޖާއެއް ކަމަށެވެ. ރާއްޖޭގެ އޭވިއޭޝަން ސިނާޢަތުގެ މަސައްކަތްތައް ބައްޓަންކުރެވިފައިވަނީ އައިކާއޯގެ “ސޭފް ސްކައިސް އެންޑް ސަސްޓެއިނަބަލް ފިއުޗަރ ފޯ އޯލް” ޝިޢާރާ އެއްގޮތަށް ކަމަށް ވެސް ވަޒީރު ވިދާޅުވިއެވެ. މި މަސައްކަތްތަކުގެ ތެރޭގައި ވެލާނާ އެއަރޕޯޓުގެ އައު ޓަރމިނަލް ބޭނުންކުރަން ފެށުމާއި ހަނިމާދޫ އިންޓަނޭޝަނަލް އެއަރޕޯޓު ހުޅުވުން ފާހަގަކުރެއްވިއެވެ. އަދި މޯލްޑިވިއަންގެ ވައިޑް ބޮޑީ އޮޕަރޭޝަންތައް ފެށުމާއި ގައުމީ އަދި އަމިއްލަ އެއަރލައިންތަކުން ފްލީޓު ބޮޑުކުރުމަށް މަސައްކަތްކޮށްފައިވެއެވެ.

ރާއްޖޭގެ ހުރިހާ ސަރަހައްދެއް ވައިގެ ދަތުރުފަތުރުން ގުޅުވާލުމަށް 8 އަތޮޅެއްގައި 12 އެއަރޕޯޓު ތަރައްޤީކުރުމުގެ މަސައްކަތް ކުރިއަށްދާކަން ވަޒީރު ފާހަގަކުރެއްވިއެވެ. މީގެ އިތުރުން 37 އެއަރ ސާވިސް އެގްރީމެންޓާއި 16 އެމްއޯޔޫގައި ސޮއިކޮށް، ބައިނަލްއަޤްވާމީ ގުޅުންތައް ވަރުގަދަކޮށްފައިވެއެވެ. މި ސިނާޢަތުގައި ދިވެހިންނަށް އެކަނި ހަރަކާތްތެރިވެވޭ ގޮތަށް ޤަވާއިދުތައް ބަދަލުކޮށްފައިވާކަމަށާއި، ފްލޯޓް ޕްލޭން އޮޕަރޭޝަންގައި ރާއްޖެއިން ހޯދާފައިވާ ފަންނީ ތަޖުރިބާ އެހެން ޤައުމުތަކާއި ހިއްސާކުރަމުންދާކަން ވެސް ވަޒީރު ފާހަގަކުރެއްވިއެވެ.

ވަޒީރު މުޙައްމަދު އަމީން ވިދާޅުވީ، މިހާރު ހޯދަމުންދާ ކުރިއެރުންތަކަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ހަރުދަނާ ސިޔާސަތުތަކުގެ ތެރެއިން ކުރެވޭ މަސައްކަތްތަކެއް ކަމަށާއި، މިއަދަށް ވުރެ ފަހި މާދަމާއެއް ހާސިލްކުރުމަށް މަސައްކަތް ކުރަމުންދާ ކަމަށެވެ.