ކާރިސާއިން އަރައިގަތުމަށް ލަންކާއަށް އެންމެ ބޮޑަށް އެހީވީ ރާއްޖެއިން!

Read Time:6 Minute, 45 Second

(ފޮޓޯ ކްރެޑިޓްސް: ރައީސް އޮފީސް)

މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާއިން ހާމަކުރެއްވި ގޮތުގައި، ފަތުރުވެރިކަމުގެ ދާއިރާގެ ތަކެއްޗާއި ޚިދުމަތްތަކުން ނެގޭ ޖީއެސްޓީއާއި ބިން ވިއްކުމާއި ބަދަލު ކުރުމުގެ ފީގެ ގޮތުގައި ލިބޭ އާމްދަނީ އިތުރުވުމުގެ ސަބަބުން ދައުލަތުގެ މާލީ ހާލަތު ވަނީ ވަރަށް ބޮޑަށް ރަނގަޅުވެފައެވެ. މާލީ ވުޒާރާއިން އާންމުކުރެއްވި މިދިޔަ ހަފްތާގެ ‘ވީކްލީ ފިސްކަލް ޑިވެލޮޕްމަންޓް ރިޕޯޓުން’ ދައްކާ ގޮތުގައި، މި އަހަރުގެ ނޮވެމްބަރު މަހުގެ 27 ވަނަ ދުވަހާ ހަމައަށް ދައުލަތަށް ޖުމްލަ 35 ބިލިޔަން ރުފިޔާގެ އާމްދަނީއެއް ލިބިފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު 9.4 އިންސައްތައިގެ ކުރިއެރުމެކެވެ. ޓެކްސް އާމްދަނީ 26 ބިލިޔަން ރުފިޔާއަށް އިތުރުވެފައިވާއިރު، މީގެ ތެރެއިން އެންމެ ބޮޑު އާމްދަނީއެއް ލިބިފައިވަނީ ޖީއެސްޓީއިންނެވެ. ޖީއެސްޓީގެ ގޮތުގައި 14.4 ބިލިޔަން ރުފިޔާ ލިބިފައިވާއިރު، މިއީ 12.4 އިންސައްތައިގެ އިތުރުވުމެކެވެ.

ޓެކްސް ނޫން އާމްދަނީވެސް 8.6 ބިލިޔަން ރުފިޔާއަށް އަރާފައިވާއިރު، ބިން ވިއްކުމާއި ބަދަލު ކުރުމަށް ނެގޭ ފީ 27.7 އިންސައްތަ އިތުރުވެ، 558.3 މިލިޔަން ރުފިޔާއަށް ވަނީ އަރާފައެވެ. މީގެ އިތުރުން، ސޮވެރިން ޑިވެލޮޕްމަންޓް ފަންޑަށް (އެސްޑީއެފް) ޖަމާކުރި ފައިސާ 84.6 އިންސައްތަ އިތުރުވެ، 2.4 ބިލިޔަން ރުފިޔާއަށް އަރާފައިވުމަކީ، ދައުލަތުގެ ބޭރު ފައިސާގެ ލިކުއިޑިޓީ ވަރުގަދަވެ، މުސްތަޤްބަލުގައި ދަރަނި އަދާކުރުމުގެ ޤާބިލުކަން އިތުރުވެފައިވާކަން ދައްކުވައިދޭ ކަމެކެވެ. މިދިޔަ އަހަރާ އަޅާބަލާއިރު، ދައުލަތުގެ ޖުމްލަ ޑެފިސިޓް ވަނީ ބޮޑުތަނުން ކުޑަވެފައެވެ. ބަޖެޓުގެ ޖުމްލަ ބެލެންސް މިދިޔަ އަހަރުގެ 10.2 ބިލިޔަން ރުފިޔާގެ ޑެފިސިޓަކުން 1.4 ބިލިޔަން ރުފިޔާއަށް ތިރިވެފައިވާއިރު، ޕްރައިމަރީ ބެލެންސް ވަނީ 5.9 ބިލިޔަން ރުފިޔާގެ ޑެފިސިޓަކުން 2.8 ބިލިޔަން ރުފިޔާގެ ސަރޕްލަސްއަކަށް ބަދަލުވެފައެވެ. މިއީ، އާމްދަނީގެ ހާލަތު ވަރުގަދަވެ، ޚަރަދުތައް ކޮންޓްރޯލް ކުރެވުމުގެ ނަތީޖާއެއް ކަމަށް މާލީ ވުޒާރާއިން ވިދާޅުވެއެވެ.

މިދިޔަ ހަފްތާގެ ނިޔަލަށް ދައުލަތުގެ ޖުމްލަ ޚަރަދުތައްވެސް ހުރީ މިދިޔަ އަހަރުގެ މި މުއްދަތާ އަޅާބަލާއިރު ދަށްކޮށެވެ؛ ޖުމްލަ ޚަރަދު 42.0 ބިލިޔަން ރުފިޔާއިން 36.4 ބިލިޔަން ރުފިޔާއަށް ދަށްވެފައިވުމަކީ 13.2 އިންސައްތައިގެ ދަށްވުމެކެވެ. މިކަންކަމުން ދައްކައިދެނީ، ސަރުކާރުން މާލީ ދާއިރާ ހަރުދަނާ ކުރުމާއި، މުސާރަ އަދި ޚިދުމަތުގެ އިސްލާޙުތަކާއި، ޤައުމީ ތަރައްޤީއަށް އިންވެސްޓް ކުރުމުގެ މަޤްޞަދުތައް ކާމިޔާބުކަމާއެކު ހާސިލުކުރަމުން އަންނަ ކަމެވެ.

މި މާލީ ހާލަތު ރަނގަޅުވެފައިވަނިކޮށް، ސްރީލަންކާއަށް އަރާފައިވާ ‘ދިތުވާ’ ތޫފާނުގެ ސަބަބުން ލިބުނު ގެއްލުންތަކުން އަރައިގަތުމަށް ބޭރުގެ އެކި ޤައުމުތަކުން ޖުމްލަ 6.59 މިލިޔަން ޑޮލަރުގެ އެހީ ދީފައިވާއިރު، އެންމެ ބޮޑު އެހީއެއް ދީފައިވަނީ ދިވެހިރާއްޖެއިންނެވެ. ލަންކާގެ ނޫސްތަކުން ރިޕޯޓުކުރި ގޮތުގައި، ދިވެހިރާއްޖެއިން ވަނީ 2.4 މިލިޔަން ޑޮލަރު (37 މިލިޔަން ރުފިޔާ) ގެ އެހީ ފޯރުކޮށްދީފައެވެ. މީގެ ތެރޭގައި ދިވެހި ސަރުކާރުން ދެއްވި 50,000 ޑޮލަރާއި 1.2 މިލިޔަން މަސްދަޅު ހިމެނެއެވެ. އަދި ޕީއެސްއެމްގެ އިސްނެގުމާއެކު 37 މީޑިއާ ގުޅިގެން ހިންގި ޓެލެތޯނުން ލިބުނު 800,352 ޑޮލަރު (12.3 މިލިޔަން ރުފިޔާ) ވެސް ލަންކާ ސަރުކާރަށް ހަވާލުކޮށްފައިވެއެވެ. މި އެހީއަކީ ދެ ޤައުމުގެ ގާތް ގުޅުން ހާމަކޮށްދޭ ކަމެއް ކަމަށް ލަންކާގެ މީޑިއާތަކުން ފާހަގަކުރެއެވެ. ތޫފާނާ ގުޅިގެން ސްރީލަންކާގެ މަރުކަޒީ ބޭންކުން ވަނީ ބޭންކުތަކަށް އިންޓްރެސްޓް ދެއްކުން ފަސްކުރުމާއި އިތުރު ލޯނު ދިނުމަށް އިރުޝާދު ދީފައެވެ.