ޓެކްސީ ލައިންގެ ޚިދުމަތް ލަސްވެގެން ޖެނުއަރީ މަހު ފަށާނަން: ވަޒީރު އަމީން

Read Time:4 Minute, 54 Second

(ފޮޓޯ ކްރެޑިޓްސް: އެމްޓީސީސީ)

ޓެކްސީ ލައިންގެ ޚިދުމަތް އަންނަ ޖެނުއަރީގެ ނިޔަލަށް ފަށާނެކަމަށް ދަތުރުފަތުރާ މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވިއެވެ. ސަރުކާރުން ޓެކްސީ ލައިނެއް ތަޢާރަފުކުރުމަށް ނިންމީ، ޓެކްސީ ހޯދުމުގައި އާއްމުންނަށް ދިމާވާ ދަތިތައް ޙައްލުކޮށް، ބަރޯސާވެވޭ ލުއިފަސޭހަ ޚިދުމަތްތަކަށް އެ ޚިދުމަތް ހެދުމަށެވެ. ސަރުކާރުން ކުރިން ނިންމާފަވަނީ މިއަހަރުގެ އޮގަސްޓް މަހު ޓެކްސީ ލައިންގެ ޚިދުމަތް ފެށުމަށެވެ. މި ޚިދުމަތް ދިނުމަށް ސަރުކާރުން ހަވާލުކޮށްފަވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީއާއެވެ. ރައްޔިތުންގެ މަޖިލީހުގައި މެންބަރަކު ކުރެއްވި ސުވާލަކަށް ޖަވާބުދެއްވަމުން ދަތުރުފަތުރާ މަދަނީ އުފެއްދުންތަކާ ބެހޭ ވަޒީރު މުޙައްމަދު އަމީން ވިދާޅުވީ ރާއްޖެއިން ގެންނަން ނިންމާފައިވަނީ އިލެކްޓްރޯނިކް (އީވީ) ކާރުތަކަކަށްވުމާއެކު، އެ އުޅަނދުތައް ރާއްޖޭގެ މާޙައުލާ ބީރައްޓެހި ގޮތަކަށް ފަރުމާކޮށް ގެނެސްފިނަމަ ގިނަ މައްސަލަތަކެއް ކުރިމަތިވާނެކަން އެ ކާރުތައް އުފައްދާ ކުންފުނިންވެސް ފާހަގަކޮށްފަވާކަމަށެވެ.

މި ކާރުތައް ދުއްވަނީ މޫދާ ކައިރި މާޙައުލަކަށްވުމާއެކު، ލޮނުގެ އަސަރު ކުޑަވާނެގޮތަށް ކާރުތަކަށް ބައެއް މޮޑިފިކޭޝަންތައް ނުވަތަ ބަދަލުތައް ގެންނަންޖެހޭކަމަށް ވަޒީރު ވިދާޅުވިއެވެ. މިއީ މި ޚިދުމަތް ފެށުމަށް ލަސްވަމުންދާ މައިގަނޑު ސަބަބުކަމަށާއި ނަމަވެސް އެ ބަދަލުތަކާއެކު އުޅަނދުތައް ހެދުމުގެ މަސައްކަތް މިހާރު ކުރިއަށްދާކަމަށް ވިދާޅުވިއެވެ. ވަޒީރު ވިދާޅުވީ ކުރިއަށްއޮތް 3 މަހުގެ ތެރޭގައި އުޅަނދުތައް ގެނެސް ޚިދުމަތް ފެށޭވަރަށް މަސައްކަތްތައް ގެންދަމުންދާކަމަށެވެ. “އީވީ ވެހިކަލްވީމަ އެކި ކަހަލަ މައްސަލަ ކުރިމަތިވޭ، މާޙައުލަށް ނުފެތޭނަމަ. ރާއްޖޭގައި ވަރަށް ލުނުގެ އަސަރުކުރާނެ. އެހެންވީމަށް އެކަމަށް ބަލާ، އުޅަނދުތަކަށް ގެންޖެހޭ ބަދަލުތައް މި ގެންނަނީ. އެހެންވެސް ލަސްތަކެއް އުޅެނީ. ނަމަވެސް މިއަހަރު ނިމޭއިރު ނުވަތަ ޖެނުއަރީ މަހުގެތެރޭގައި ޚިދުމަތް ފަށާނަން.” ވަޒީރު ވިދާޅުވިއެވެ.

(ފޮޓޯ ކްރެޑިޓްސް: ރައްޔިތުންގެ މަޖިލިސް)

ސަރުކާރުގެ ޓެކްސީ ލައިންގައި ބޭނުންކުރާނީ %100 ތިމާވެއްޓާ ރައްޓެހި އުޅަނދުތަކެކެވެ. މީގެތެރޭގައި 3 ސައިޒެއްގެ އުޅަނދު ހިމެނޭއިރު، މި ޚިދުމަތަކީ 24 ގަޑިއިރު ދޭނެ ޚިދުމަތެކެވެ. މި ޚިދުމަތް ދިނުމަށް ދާއިމީ ވަޒީފާގައި ޑްރައިވަރުން ނަގާއިރު ޕާޓް ޓައިމްކޮށް ދުއްވަންވެސް ޑްރައިވަރުން ނަގާނެއެވެ. ސަރުކާރުން ފަށާ ޓެކްސީ ލައިންގެ ޚިދުމަތާއެކު، ޓެކްސީ ޚިދުމަތަކީ ބަރޯސާވެވޭ ލުއިފަސޭހަ ޚިދުމަތަކަށްވާނެކަމަށް ސަރުކާރުން ހާމަކުރައްވައެވެ.