Read Time:3 Minute, 2 Second
ފުލުހުންގެ ސްޕެޝަލް ކޮންސްޓަބްލަރީ މުހައްމަދު ސާޖިދު އަހުމަދު، ވޭޕް ވިއްކުމުގެ ތުހުމަތުގައި ގދ. ތިނަދޫއިން ހައްޔަރުކުރި މައްސަލައާ ގުޅިގެން ހައިކޯޓުގައި ބުނީ، އޭނާ ފުލުހުންގެ ހުވާކުރުމުގެ ރަސްމިއްޔާތުގައި ބައިވެރިވިއަސް، ﷲ ގަންދީ ކުރަންޖެހޭ ހުވައެއް ވީމާ، ބިރުން އެ ހުވާ ނުކުރާ ކަމަށެވެ. ސާޖިދު ދިރިއުޅޭ ގެއާއި ސައިކަލު ފާސްކޮށް ގިނަ އަދަދެއްގެ ދުންފައްޗާއި ވޭޕް އަދި މަސްތުވާތަކެތި ފެނުނު ނަމަވެސް، ތިނަދޫ މެޖިސްޓްރޭޓް ކޯޓުން ވަނީ އޭނާ ދޫކޮށްލައިފައެވެ. ދައުލަތުން ބުނީ ވޭޕް ގެންގުޅުމަކީ ގާނޫނާ ހިލާފު ކަމެއް ކަމަށާއި، ސާޖިދަކީ ހުވާކޮށްފައިވާ ފުލުހެއް ކަމަށް ހުވާގެ އިގުރާރުގައި ސޮއިކޮށްފައިވާ ކަމަށެވެ.
ނަމަވެސް، ސާޖިދުގެ ދިފާއީ ވަކީލު ބުނީ އޭނާ ހުވާކޮށްފައި ނުވާ ކަމަށެވެ. ސާޖިދު އަމިއްލައަށް ކޯޓުގައި ބުނީ ހުވާކުރުމުގެ ރަސްމިއްޔާތަށް ދިޔަ ނަމަވެސް، ހުވާ ނުކިޔާ، ދެ އަތް ކުރިމައްޗަށް ލައިގެން ހަމަ ހުރީ ކަމަށެވެ. ނަމަވެސް އޭނާ މުސާރަ ނެގި ކަމަށް ވަނީ އެއްބަސްވެފައެވެ.
މައްސަލަ ބައްލަވާ ބެންޗުގެ އިސް ފަނޑިޔާރު މުހައްމަދު ނިޔާޒު ވަނީ ސާޖިދުގެ މި ވާހަކަތަކާ މެދު ވަރަށް ބޮޑަށް ހިތްހަމަޖެހިވަޑައިނުގެން ސުވާލުކުރައްވައި، ހުވައަކީ ގާނޫނީ މާނައެއް އޮންނަ ކަމެއް ކަމަށާއި، އެއީ ގަބޫލުކުރެވޭނެ ދޮގެއް ނޫން ކަމަށް ވިދާޅުވެފައެވެ. އަދި މިފަދަ ކަންކަމުން ފުލުހުންނާއި ސިފައިންނާއި ހުވާކޮށްގެން އުޅޭ މަގާމުތަކުގެ މީހުންނަށް އިތުބާރުކުރާނީ ކިހިނެއްތޯ ސުވާލު އުފައްދެވިއެވެ.
މި ބަހުސާ އެކު އަޑުއެހުންތައް ނިންމާލާފައިވާއިރު، ހުކުމް އިއްވުން ފަހުން އަންގާނެ ކަމަށް ކޯޓުން ވަނީ ބުނެފައެވެ.
Happy
0 %
Sad
0 %
Excited
100 %
Sleepy
0 %
Angry
0 %
Surprise
0 %
0
0