ލޭންޑިން ކްރާފްޓް ބަންޑުންޖަހާލައި ނިޔާވީ ސިފައިންގެ މީހެއް، އެކަކު އަދިވެސް ނުފެނޭ

Read Time:3 Minute, 49 Second

ލޭންޑިން ކްރާފްޓް ބަންޑުންޖަހާލި ހާދިސާގައި ނިޔާވި ވޮރަންޓް އޮފިސަ 2، އަލީ ހާމިދު

إِنَّا ِلِلَّٰهِ وَإِنَّا إِلَيْهِ رَاجِعُونَ
މިއަދު ހިނގި ކަނޑުމަތީގެ ހިތާމަވެރި ހާދިސާގައި ނިޔާވި، ދިވެހިރާއްޖޭގެ ޤައުމީ ދިފާޢީ ބާރުގެ ވޮރަންޓް އޮފިސަރ 2 ޢަލީ ޙާމިދު، މި ދުނިޔެއާއި ވަކިވެގެންދިއުމަކީ އަޅުގަނޑަށް ވަރަށް ފުން ހިތާމައެއް ކުރުވި ކަމެކެވެ. ވޮރަންޓް އޮފިސަރ 2 ޢަލީ… pic.twitter.com/eU0Eyxv0Aa

— Dr Mohamed Muizzu (@MMuizzu) June 25, 2025

ސިވެކްގެ ލޭންޑިން ކްރާފްޓެއް ޅ.އަތޮޅަށް ދަތުރުކުރަމުން ދަނިކޮށް، ބަންޑުން ޖަހާލި ހާދިސާގައި ނިޔާވީ ސިފައިންގެ މީހެއް ކަމަށް އެމްއެންޑީއެފް އިން ވިދާޅުވެއްޖެއެވެ. މާލެއިން ފުރައިގެން ޅ. އަތޮޅަށް ދަތުރުކުރި ސިވެކްގެ “އެލްސީ 308” ލޭންޑިން ކްރާފްޓުން ހަ މީހުން ދަތުރުކުރިއެވެ. އޭގެތެރޭގައި ހިމެނެނީ ތިން ސިފައިންނާއި ބަންގްލްދޭޝްއަށް ނިސްބަތްވާ ތިން މީހެކެވެ. އެ އުޅަނދު، މިއަދު ހެނދުނު 10:30 ހާއިރު ބަންޑުން ޖަހާލި ކަމުގެ މައުލޫމާތު ލިބުމާ އެކު، އެމްއެންޑީއެފުން ވަނީ ކަނޑުމަގުންނާއި ވައިގެމަގުން އެ އުޅަނދު ލޮކޭޓްކޮށް، އޭގެން ދަތުރުކުރި މީހުން ސަލާމަތްކުރުމުގެ މަސައްކަތް ފެށިއެވެ.

އެމްއެންޑީއެފް އިން ވިދާޅުވީ، އެ ލޭންޑިން ކްރާފްޓް ބަންޑުން ޖަހާލި ހާދިސާގައި ދެ މީހުން ގެއްލުނު ކަމަށެވެ. އަދި އޭގެ ތެރެއިން އެކަކު ފެނުނުއިރު، އޭނާ ވަނީ ނިޔާވެފައެވެ. އޭނާގެ ހަށިގަނޑު ހޯދާފައި ވަނީ އެމްއެންޑީއެފް ނޮދަން އޭރިއާ ކޮމާންޑް، ކޯސްޓްގާޑު ފަސްޓް ސްކޮޑްރަންގެ ޑައިވަރުންނެެވެ. ނިޔާވެފައި ވަނީ ވޮރަންޓް އޮފިސަރ 2 އަލީ ހާމިދެވެ. މި ހާދިސާގައި ސަލާމަތް ކުރި މީހުންނަށް ނަައިފަރު ހޮސްޕިޓަލުގައި ފަރުވާދެމުން އަންނައިރު، އެ ހޮސްޕިޓަލުގެ އޮފިޝަލަަކު “ވަގުތު”އަށް ވިދާޅުވީ، ލޭންޑިން ކްރާފްޓް ބަންޑުން ޖަހާލި ހާދިސާގައި ސަލާމަތް ކުރި ފަސް މީހަކު އެ ހޮސްޕިޓަލަށް ގެނެސްފައިވާ ކަމުގެ މައުލޫމާތު ލިބިފައިވާ ކަމަށެވެ. އޭގެ ތެރެއިން ހާމިދު ހޮސްޕިޓަލަށް ގެންދިޔައިރުވެސް އޮތީ ނިޔާވެފައެވެ.

މި ހާދިސާގައި ގެއްލިފައިވާ ބިދޭސީ މީހާ ހޯދުމުގެ މަސައްކަތް އެމްއެންޑީއެފުން އަދިވެސް ދަނީ ކުރިއަށެވެ.