ހަނގުރާމަ ހުއްޓާލިކަން ގަބޫލުކޮށް، ފޯކަސް އަލުން ޣައްޒާއަށް ބަދަލުކުރަނީ

Read Time:4 Minute, 38 Second

އީރާނާ އެކު ހަނގުރާމަ ހުއްޓާލުމުގެ އެއްބަސްވުން ގަބޫލުކޮށް “ފޯކަސް މިހާރު އެނބުރި ޣައްޒާއަށް ބަދަލުކުރަނީ” ކަމަށް އިސްރާއީލުގެ އަސްކަރިއްޔާ (އައިޑީއެފް)އިން ބުނެފިއެވެ. އީރާން އާއި އިސްރާއީލްއާ ދެމެދުގައި ހަނގުރާމަ ފެށުނީ މި މަހުގެ 13 ވަނަ ދުވަހު އިސްރާއީލުން އީރާންގެ ވައިގެ ސަރަހައްދައް ވަދެ، އީރާންގެ އަސްކަރިއްޔާގެ ވެރިންތަކެއް އަވަހާރަކޮށްލުމުންނެވެ. އޭގެ އިތުރުން އިސްރާއީލުން ވަނީ ނިއުކްލިއަ ފެސިލިޓީތަކާއި އަސްކަރީ މަރުކަޒުތަކާއި އާންމުން ދިރިއުޅޭ ތަންތަނަށް ވެސް ހަމަލާދީފައެވެ. އިސްރާއީލްގެ ހަމަލާތަކަށް ރައްދު ދިނުމުގެ ގޮތުން އީރާނުން ވެސް ވަނީ އިސްރާއީލްގެ ވެރިރަށް ތެލް އަވީވްއަށާއި އެހެނިހެން ސަރަހައްދުތަކަށް ބޮން އަޅައި ބޮޑެތި ގެއްލުންތަކެއް ދީފައެވެ. މި ހަމަލާ އިތުރަށް ހޫނުވެގެން ދިޔައީ މިކަމުގެ ތެރެއަށް އެމެރިކާ އިން ވަނުމުންނެވެ.

އެމެރިކާ އިން ވަނީ އީރާންގެ ތިން ނިއުކްލިއާ ފެސިލިޓީއަކަށް ބޮން އަޅައިފައެވެ. އެއާއެކު، އީރާނުން ރައްދުގައި ހަމަލާތައް ފޮނުވާލީ މެދުއިރުމަތީގައި ހުންނަ އެމެރިކާގެ އަސްކަރީ މަރުކަޒުތަކަށެވެ. އޭގެ ފަހުން ހަނގުރާމަ ހޫނުވެދާނެ ކަމަށް ބެލެވިފައި އޮތް ނަމަވެސް އެރޭ ވަނީ ހަނގުރާމަ ހުއްޓާލަން ދެ ގައުމުން އެއްބަސްވެފައިވާކަން އިއުލާންކޮށްފައެވެ. އިސްރާއީލުގެ ޗީފް އޮފް ދަ ޖެނެރަލް ސްޓާފް ލެފްޓިނެންޓް ޖެނެރަލް އިޔާލް ޒާމިރު ބުނީ އަސްކަރިއްޔާއިން “ވަރަށް ބޮޑު މަރުހަލާއެއް ނިމިފައިވާ ކަމަށާއި ނަމަވެސް އީރާނާ ދެކޮޅަށް ކެމްޕޭން ކުރިއަށް ދާ” ކަމަށެވެ.

“އަޅުގަނޑުމެން އާ މަރުހަލާއަކަށް ވަންނަނީ މިހާރު މި އޮތް މަރުހަލާގެ ކާމިޔާބީތަކަށް ބަލައިގެން. އީރާނުގެ ނިއުކްލިއާ ޕްރޮޖެކްޓް އަހަރުމެން ފަހަތަށް ޖައްސާލީ، އެ ގައުމުގެ މިސައިލް ޕްރޮގްރާމަށް ވެސް އެކަން ހިނގާ،” އޭނާ ބުނެފައި ވެއެވެ. އިސްރާއީލުގެ އަސްކަރިއްޔާއިން ހިންގަމުންދާ އަމަލުތަކަކީ ފާހަގަކޮށްލެވޭ ކާމިޔާބީއެއްގެ ގޮތުގައި ސިފަކުރަމުން އޭނާ ބުނީ، “މިހާރު ސަމާލުކަން އެނބުރި ދަނީ ޣައްޒާއަށް” ކަމަށެވެ. އަދި “ރަހީނު ކޮށްފައިވާ މީހުން މިނިވަންކުރުމަށާއި ހަމާސް ސަރުކާރު ވައްޓާލުމަށް” އެމީހުން މަސައްކަތް ކުރާނެ ކަމަށް ވެސް އޭނާ ވަނީ ބުނެފައެވެ.

އޮކްޓޯބަރު 7، 2023 އިން ފެށިގެން މިހާތަނަށް އައިއިރު، 56،000 އަށް ވުރެ ގިނަ މީހުން ޝަހީދުކޮށްލައި 120,000 އަށް ވުރެ ގިނަ މީހުން ވަނީ ޒަހަމްކޮށްލައިފައެވެ. އަދި މެދުކެނޑުމަކަށް ފަހު މާޗް 18 ގައި ގަތުލުއާންމު ފެށި ފަހުން ވެސް ފަލަސްތީނުގެ ގިނަ ބަޔަކު ވަނީ ޝަހީދުކޮށްލައިފައެވެ.