ކުލިނިކުތަކުގެ އަމާޒަކީ ބޮޑީބޯޑިންގެ ތެރެއަށް ކުދިން ވެއްދުން، ދެން އޮންނާނީ ޅޮހީގައި

Read Time:4 Minute, 34 Second

(ފޮޓޯ ކްރެޑިޓްސް: އެމްބީއޭ)

ހުދުފޮނު ޕްރޮގްރާމުގެ އެންމެ ބޮޑު ފޯކަސްއަކީ ކުޅިވަރުގެ ތެރެއަށް ކުދިން ވެއްދުން ކަމަށާއި ވަރަށް ބޮޑު ކުރިއެރުމެއް ލިބޭ ކަމަށް އުންމީދުކުރާ ކަމަށް ބޮޑީބޯޑިން އެސޯސިއޭޝަންގެ ރައީސް ހުސެއިން ނިޒާމް ބުނެފިއެވެ. ނ. ޅޮހީގައި ފަށާ ހުދުފޮނު ޕްރޮގްރާމް އާއި ގުޅޭ ގޮތުން ޕީއެސްއެމް ނިއުސްއަށް މައުލޫމާތު ދެމުން ނިޒާމް ބުނީ މި އަހަރު ފެއްޓުނު އިރު ކުލިނިކުތައް ހިންގަން ފެށީ މި ކުޅިވަރުގެ ތެރެއަށް އެތުލީޓުން ވެއްދުމަށްޓަކައި ކަމަށެވެ. އެގޮތުން ރާއްޖޭގެ އުތުރުން ދެކުނަށް ކުލިނިކްތައް ގެންދިއުމަށް ނިންމާ ހުދުފޮނު ޕްރޮގްރާމަށް ވަރަށް ބޮޑު އިސްކަމެއްދޭ ކަމަށްވެސް ބުންޏެވެ.

މިއަހަރު ކުލިނިކުތައް ފުރަތަމަ ޖެއްސީ އުތުރުގައިކަމަށާ ދެން އެންމެ އަވަހަށް އޮންނާނީ ނ. ޅޮހީގައި ކަމަށްވެސް ނިޒާމް ބުންޏެވެ. މި ކުލިނިކަކީ ނޫނު އަތޮޅު ހުރިހާ ކުދިންނަށް ބައިވެރިވެވޭ ގޮތަށް ބާއްވާ ކްލިނިކެކެވެ. ޅޮހީގައި ބާއްވާ ބޮޑީބޯޑިން ދަސްކޮށްދޭ ގައުމީ ޕްރޮގްރާމް “ހުދުފޮނު” ކްލިނިކަކީ މިއަހަރު ހިންގާ ތިންވަނަ ކުލިނިކެވެ. ޅޮހީގައި ކުލިނިކު ހިންގަނީ މިމަހުގެ 26-28 އަށެވެ. ޅޮހީގައި މި ޕްރޮގްރާމް ހިންގުމަށް ހަމަޖެހިފައިވަނީ ޅޮހީ ޖަމްއިއްޔާއެއް ކަމަށްވާ ސާފް ސްކޮއާ އާއި ގުޅިގެންނެވެ. މި ޕްރޮގްރާމުގައި ބައިވެރިވުމަށް 25 ޖޫން ވާ އާދިއްތަ ދުވަހު މެންދުރު 12ގެ ކުރިންނެވެ.

މި ކުލިނިކްތަކުގެ ސަބަބުން މުބާރާތްތަކަށް ބޮޑު ކުރިއެރުމެއް ލިބޭނެކަމަށް ގަބޫލުކުރާ ކަމަށްވެސް ނިޒާމު ބުންޏެވެ. ”ދެން އޮތް މުބާރާތް އެއީ ހާއްސަ މުބާރާތެއް. އަދި ފަހުން އެ މުބާރާތް އިއުލާނުކޮށްލާނަން. އެ މުބާރާތަށް ހަމަ އައު ގިނަ ކުދިން މީގެ ތެރެއަށް ވަދެގެންދާނެ ކަމަށް އަޅުގަނޑުގެ ވަރަށް ބޮޑު އުންމީދު އެބައޮތް“ ނިޒާމް ބުންޏެވެ. ނިމިގެން ދިޔަ ބުރުނު ޝިކާރު ބޮޑީ ބޯޑިން ޗެލެންޖުގައި އަލަށް ބައިވެރިވި ބައެއް އެތުލީޓުންނަކީ ހުދުފޮނު ޕްރޮގްރާމުގެ ބައިވެރިންކަން ފާހަގަކޮށް ނިޒާމް ބުނީ އެ ކުދިން ވަރަށް ހުނަރުވެރިކަމަށް ފާހަގަކުރެވުނު ކަމަށާއި ސެމީ ފައިނަލާ ހަމައަށްވެސް ދިޔަ ކަމަށެވެ.

އަދި އެކުދިންނަށް މިވަގުތު ރާއްޖޭގައި ތިބި އެންމެ ވަރުގަދަ ބޮޑީބޯޑަރުންނާއި އެކު މުބާރާތެއްގައި ވާދަކޮށްލަން ލިބުމަކީ ވަރަށް ރަނގަޅު ތަޖްރިބާއެއް ކަމަށް ނިޒާމް ބުންޏެވެ. ނިޒާމް ބުނީ އެމްބީބީއޭއިން މަސައްކަތް ކުރަނީ ހުދުފޮނު ޕްރޮގްރާމުގެ ތެރެއިން މުބާރާތްތަކަށް އަންނަ ކުދިންނަށް ފުރުސަތުދީ އެކުދިން އިތުރަށް ކުރިއެރުވުން ކަމަށެވެ.