މޮޅެތި އެތުލީޓުން ރިޓަޔާވުމަށްފަހު ކުރާނެ ކަމެއް ހޯދައިދިނުމަށް ޕްރޮގުރާމުތަކެއް ރާވަން: ވަޒީރު ރާފިޢު

Read Time:4 Minute, 2 Second

(ފޮޓޯ ކްރެޑިޓްސް: ޕީޢެސްއެމް ނިއުސް)

އެތުލީޓުން ރިޓަޔާވުމަށްފަހު ކުރާނެ ކަމެއް ހޯދައިދިނުމަށް ޕްރޮގުރާމުތަކެއް ރާވަމުންދާ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ. އޭސީސީ މެންސް އީސްޓް ޒޯން ކަޕުގައި ވާދަކުރާ 16 އަހަރުން ދަށުގެ ގައުމީ ކްރިކެޓް ޓީމާ ޖާރޒީ ހަވާލުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ކުޅިވަރު ވަޒީރު ވިދާޅުވީ އެތުލީޓުންނަށް ކުޅިވަރާ އެއްވަރަށް ތައުލީމުވެސް މުހިންމުކަމަށެވެ. އެހެންކަމުން ކުޅިވަރު ފަންޑުގެ ދަށުން އެތުލީޓުންނަށް ލިބިގެންދާ ސްކޮލާރޝިޕްތަކަކީ ކުޅިވަރާ އެއްވަރަށް ތައުލީމަށްވެސް އިސްކަންދެވިގެން ހޯދައިދެވޭ ފުރުސަތަކަށް މީގެ ފަހުން ވެގެންދާނެކަމުގެ ޔަގީންކަން ވަޒީރު ވަނީ ދެއްވާފައެވެ.

ވަޒީރުގެ ވާހަކައިގައި ވިދާޅުވީ އެތުލީޓުންނަށް ކުރިއެރުން ހޯދައިދިނުމަށް އެވުޒާރާގެ ފަރާތުން ގިނަގުނަ މަސައްކަތްތަކެއް ރާވާ ތަންފީޒުކުރަމުންދަކަމަށެވެ. އެގޮތުން މޮޅެތި އެތުލީޓުން ރިޓަޔަރވުމަށްފަހު ކުރާނެ ކަމެއް ހޯދައިދިނުމަށް ޕްރޮގްރާމުތަކެއް ރާވަމުންދާކަމަށް ކުޅިވަރު ވަޒީރު ވަނީ ހާމަކުރައްވާފައެވެ.

“ކެރިއަރ ނިންމާލާ ހިސާބުން، ރިޓަޔަރކުރާ ހިސާބުން ދެން ކުރާނީ ކޮންކަމެއްތޯ، އެހެންވީމަ އެކަމަށްޓަކައިވެސް އިރާދަކުރެއްވިއްޔާ އަޅުގަނޑުމެން ޕްރޮގްރާމެއް ހިންގަން އެބަ މަސައްކަތްކުރަން. އެއީ ރިޓަޔަރކުރުމުގެ ކުރިން އެކުއްޖެއްގެ ހުރި ޓްރާންސްފަރަބްލް ސްކިލްއަކަށް އިންވެސްޓް ކޮށްދިނުން، މާނައަކީ އެހެން އިތުރު އެއްޗެއް ކިޔަވަން ބޭނުންވިޔަސް އެއެއްޗެއް ކިޔަވައިގެން ކުޅުން ނިންމާލާފަ އެކަމެއްގަ އުޅުން. އެއީ ކޯޗިން ވިޔަސް، ލޯކަހަލަ އެއްޗެއް ހެދިކަމަށް ވިޔަސް” ވަޒީރު ރާފިޢު ވިދާޅުވިއެވެ. ވަޒީރު ވިދާޅުވީ މިފުރުސަތު ފަހިކޮށްދެވޭނީ ވަކި އުސޫލެއްގެ ދަށުންކަމަށެވެ. މިގޮތުން ވަކި ލެވެލްއަކަށް އެތުލީޓުން ކުޅެ، ކަނޑައެޅޭ ވަކި ކްރައިޓީރިއާއަކަށް ފެތުމުން ރިޓަޔަރކުރާ އެތުލީޓުންނަށް އެފުރުސަތު ފަހިވެގެންދާނެކަމަށެވެ. އެހެންކަމުން އެތުލީޓުން މޮޅަށް ކުޅެ، މި ފުރުސަތުތައް ހޯދުމަށް މަސައްކަތްކުރުމަށް ވަޒީރު ވަނީ އެތުލީޓުންނަށް އިލްތިމާސްކުރައްވާފައެވެ.