އަމީން، ޝުޖާއުއަށް ގުޅި ސަބަބު ރިޔާސީ ކޮމިޝަނުން ސާފުކޮށްދީފި

Read Time:3 Minute, 17 Second

(ފޮޓޯ ކްރެޑިޓްސް: ވަގުތު)

މިދިޔަ އޭޕްރީލް މަހުގެ 18 ވަނަ ދުވަހުގެ ރޭ މާލޭގެ އިމާރާތެއްގެ މަތިން ހައްވާ ޔުމްނު ރަޝީދު ވެއްޓުނު މައްސަލާގައި، އޭރުގެ ޕޮލިސް ކޮމިޝަނަރު އަލީ ޝުޖާއު އަށް ޓްރާންސްޕޯޓް މިނިސްޓަރު މުހައްމަދު އަމީން ގުޅުއްވި ސަބަބު ހާދިސާ ތަހުގީގުކުރަން އުފެއްދި ހާއްސަ ކޮމިޝަނުގެ ރިޕޯޓުގައި ސާފުކޮށްދީފިއެވެ. ކޮމިޝަނުން އާންމު ކުރި ރިޕޯޓުގައި ވަނީ މިނިސްޓަރު އަމީން ދެއްވި ބަޔާން ވެސް ހިމަނުއްވައިފައެވެ. އެ ބަޔާނުގައި މިނިސްޓަރު އަމީން ވިދާޅުވީ ކުރީގެ ކޮމިޝަނާ ޝުޖާއުއަށް ނޫސްވެރިންގެ ބައްދަލުވުމުގައި އިންނަވަނިކޮށް ގުޅުއްވީ މައްސަލައާ ގުޅިގެން ބައެއް ތަންތަނާއި ގޭގެއަށް ވަންނަން ކޯޓު އަމުރު ހޯއްދެވުމަށް ވަގުތު ނަގާނެކަމަށް ވިދާޅުވެފައިވާތީ ކަމަށެވެ. އަދި މއ. މާންދޫގޭގެދެކުނުގެއަށް ގުޅުއްވީ އެގެއަށް ވަންނަން ކޯޓު އަމުރެއް ބޭނުންނުވާނެކަން ބަޔާން ކުރުމަށް ކަމަށް ވެސް އަމީން ވިދާޅުވިއެވެ.

މާލޭގެ އިމާރާތަކުން ޒުވާން އަންހެނަކު ވެއްޓުނު ހާދިސާގައި، ޓްރާންސްޕޯޓް މިނިސްޓަރު މުހައްމަދު އަމީންގެ އަމިއްލަ މަސްލަހަތު އޮތް މައްސަލައެއްގައި، ފުލުހުންގެ އެއްވެސް އޮފިސަރަކަށް ގުޅައި، މައްސަލައާ މެދު އެއްވެސް ވާހަކައެއް ދެއްކެވުމަކީ ބަލައިގަންނަން ދަތިކަމެއް ކަމަށް ކޮމިޝަނުން ވަނީ ވިދާޅުވެފައެވެ. ނަމަވެސް، މިނިސްޓަރު މުހައްމަދު އަމީންގެ ފޯނު ކޯލުގެ ސަބަބުން އެކަމާ ގުޅިގެން، މި މައްސަލައިގެ ތަހުގީގަށް އެއްވެސް އަސަރެއް ކޮށްފައިވާކަމަށް ކޮމިޝަނަށް ނުފެންނަ ކަމަށް ވެސް ރިޕޯޓުގައި ވަނީ ބަޔާންކޮށްފައެވެ.

އެ ކޮމިޝަނުން ވަނީ ޔުމްނު ވެއްޓުނު ރޭ އެންމެ ފުރަތަމަ ޒުވާނުންތަކެއް ޕާޓީކޮށްފައިވަނީ އަމީން ދިރިއުޅުއްވާ މއ. މާންދޫގޭދެކުނުގެ ޓެރެސްގައި ކަމަށް ވެސް ބުނެފައެވެ.