ޔަހޫދީން އީދު ދުވަހު ޣައްޒާއަށް ބޮން އަޅައި، 16 މީހުން ޝަހީދުކޮށްލައިފި

Read Time:4 Minute, 54 Second

(ފޮޓޯ ކްރެޑިޓްސް: ރޮއިޓާރސް)

ފަލަސްޠީނުގެ ޣައްޒާގެ އެކި ސަރަޙައްދުތަކަށް ޔަހޫދީންގެ ނިރުބަވެރި ފައުޖުން އީދު ދުވަހު ވެސް ބޮން އަޅައި، މިހާތަނަށް 16 މީހުން ޝަހީދުކޮށްލާފައިވާ ކަމަށް ޣައްޒާގެ ސިއްޙީ އިދާރާއިން ބުނެފިއެވެ. އެ އިދާރާއިން ބުނީ، ޔަހޫދީންގެ ވައިގެ ޙަމަލާތައް އިއްޔެ އަމާޒުކޮށްފައިވަނީ ޖަބާލިޔާ، ތުއްފާޙް އަދި ޚާން ޔޫނުސް ސަރަޙައްދުތަކަށް ކަމަށެވެ. ފާއިތުވި ދުވަސްތަކުގައި ޣައްޒާގެ ޖަބާލިޔާއަށް ޔަހޫދީން ދެމުންދާ ލާއިންސާނީ ޢުދުވާނުތައް ވަނީ ވަރުގަދަކޮށްފައެވެ. ބޮން އެޅުމުގެ ކުޑަވަގުތުކޮޅެއް ކުރިން، އެ ސަރަޙައްދުތަކުގައި ދިރިއުޅޭ ރައްޔިތުން އެ ސަރަޙައްދުތައް ދޫކޮށް ދިޔުމަށް ޔަހޫދީންގެ ނިރުބަވެރި ފައުޖުން އެންގި ކަމަށް ވެސް ބައެއް ރިޕޯޓުތައް ބުންޏެވެ.

މި ޙަމަލާތަކުގެ ތެރެއިނ، ޣައްޒާގައި ނިކަމެތި ކޮށްލާފައިވާ 2.1 މިލިޔަނެއްހާ މީހުންނަށް ކާބޯތަކެތި ފޯރުކޮށްދިނުމުގެ ނަމުގައި ލާއިންސާނީ ޖަރީމާތައް ހިންގަމުންދާ ޣައްޒާ ހިޔުމެނިޓޭރިޔަން ފައުންޑޭޝަން (ޖީއެޗްއެފާ)އިން މިއަދު ކޮންމެވެސް ވަރަކަށް އެހީގެ ސަމާނު ބެހިކަމަށް ބުނެފައިވެއެވެ. ޣައްޒާގެ ރައްޔިތުންނަށް ކާބޯތަކެތި ފޯރުކޮށްދިނުމުގެ ނަމުގައި ޖީއެޗްއެފުން ދަނީ ލާއިންސާނީ ޖަރީމާތަކެއް ހިންގަމުންނެވެ. އެ ޖަރީމާތައް ހިންގުމުގެ އަޑީގައި ތިބީ ޔަހޫދީ ސިފައިން ކަމުގައި ބައިނަލްއަޤްވާމީ މުޖުތަމަޢުން ޤަބޫލު ކުރެއެވެ. ޖީއެޗްއެފުން ދަނީ، ކާބޯތަކެތި ބަހަމުންދާ ކަމަށް ބުނެ، ޢަައްޒާގައި ނިކަމެތިކޮށް ހައިހޫނުގައި ޖައްސާފައިވާ މީހުން އެކި ސަރަޙައްދުތަކަށް ޖަމާކުރަމުންނެވެ. އަދި، ޔަހޫދީ ފައުޖުން ދަނީ ޖީއެޗްއެފްގެ މަރުކަޒުތައް ކައިރިއަށް ޖަމާވާ މީހުންނަށް ޙަމަލާދީ، ގިނަ އަދަދެއްގެ ބަޔަކު ޝަހީދު ކުރަމުންނެވެ. ހުސްވި ހަފުތާއެއްހާ ދުވަހުގެ ތެރޭގައި ޖީއެޗްއެފްގެ މަރުކަޒުތައް ކައިރީގައި ޔަހޫދީ ފައުޖުން ހިންގާފައިވާ ޖަރީމާތަކުގައި 100އެއްހާ މީހުން ޝަހީދު ކޮށްލައި، އެތަކެއް ސަތޭކަ ބަޔަކު ޒަޚަމު ކޮށްލިއެވެ.

މި ފަދަ ޖަރީމާތަކާ ގުޅިގެން ޖީއެޗްއެފަށް ބައިނަލްއަޤްވާމީ މުޖުތަމަޢުގެ ފާޑު ކިޔުންތައް އަމާޒުވުމާ އެކު، އެ ޖަމުޢިއްޔާއިން ވަނީ ޖޫން 4ވަނަ ދުވަހު އެހީ ބެހުމުގެ މަސައްކަތްތައް ވަގުތީ ގޮތުން މެދުކަނޑައިލާފައެވެ. ނަމަވެސް، ޣައްޒާގެ އެންމެ ދެކުނުން އޮތް ރަފަޙްގައި އެހީ ބަހާ އިތުރު ދެ މަރުކަޒު ޤާއިމު ކުރުމަށް މަސައްކަތް ކުރަމުންދާ ކަމުގައި އެ ޖަމުޢިއްޔާއިން ބުންޏެވެ. އަލުން ކާބޯތަކެތި ބަހަން ފަށާނެ ވަކި ތާރީޙެއް އެ ޖަމާޢަތުން ހާމަކޮށްފައެއް ނުވެއެވެ. މި ވަގުތު ޣައްޒާއަށް ކާބޯތަކެތި އެތެރެ ކުރުމުގެ ފުރުޞަތު ޔަހޫދީ ފައުޖުން ހަމައެކަނި ދީފައި ވަނީ އެ ޖަމުޢިއްޔާއަށެވެ.