Read Time:4 Minute, 49 Second
ދިވެހި އަސްކަރިއްޔާއަށް މިސައިލު ގަންނަން އުޅޭ ކަމަށް ދެކެވޭ ވާހަކަ ރައީސް ޑރ. މުހައްމަދު މުއިއްޒު މިއަދު ދޮގުކުރައްވައިފިއެވެ. ރައީސް އޮފީހުގައި ކުރިއަށްދިޔަ ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް ޑރ. މުއިއްޒު ވިދާޅުވީ “މިސައިލެއް ގަންނަން” ނުވަތަ “މިސައިލެއް ހޯދާކަށް” ވެސް ނޫޅޭ ކަމަށެވެ.
“އަޅުގަނޑާ ބައްދަލުކުރަން އައި ބޭރު ގައުމެއްގެ ސަފީރެއް ބައްދަލުކޮށްފައި ވަރަށް ކަންބޮޑުވެގެން ދެއްކި މިސައިލްގެ ވާހަކަ. އަޅުގަނޑު ބުނީ ނޫނެކޭ، ތިއީ ހުސް ދޮގު ވާހަކަތަކެކޭ. އަޅުގަނޑުމެން ނޫޅެމޭ މިސައިލު ގަންނާކަށް. ނުގަންނަން މިސައިލެއް، ހޯދާކަށް ވެސް ނޫޅެން،” ރައީސް ވިދާޅުވިއެވެ. ރައީސް ޑރ. މުއިއްޒު ވިދާޅުވީ ރާއްޖެ އާއި ތުރުކީއާ ދެމެދު އޮންނަ ގާތް ގުޅުމުގެ ތެރެއިން ތުރުކީން ރާއްޖެއަށް މަނަވަރެއް ހަދިޔާކުރަން ނިންމާފައިވާ ކަމަށެވެ. އެ އުޅަނދަކީ މިސައިލް ހަރުކޮށްފައި ހުންނަ އުޅަނދެއް ނޫން ކަމަށް ރައީސް ޑރ. މުއިއްޒު ވިދާޅުވިއެވެ.
“ރާއްޖޭގައި މިހާތަނަށް ނެތް ސައިޒެއް އެއީ. އެއްވެސް ހަރަދެއް އަޅުގަނޑުމެން ކުރަން ޖެހުނީއެއް ނޫން.” ރައީސް ވިދާޅުވިއެވެ. ތުރުކީގެ ނޫހެއް ކަމަށްވާ އަނަދޯލު އެޖެންސީން އެ ގައުމުގެ ދިފާއީ ވުޒާރާގެ އޮފިޝަލުންނާ ހަވާލާދީ ބުނި ގޮތުގައި ތުރުކީން ގެންނަނީ މިސައިލުން ހަމަލާދިނުމުގެ ގާބިލްކަން ލިބިފައިވާ ޑޯގަން-ކްލާސްގެ އުޅަނދެއް ކަމުގައިވާ ޓީސީޖީ ވޮލްކަން (ޕީ-343) މަނަވަރެކެވެ.
ރާއްޖޭގެ ދިފާއީ ވުޒާރާ އިން ވިދާޅުވީ ތުރުކީ އިން ހަދިޔާކުރާ އަސްކަރީ މަނަވަރު ގެނައުމަކީ ރާއްޖޭގެ ކަނޑުގެ ސަލާމަަތްތެރިކަން ކަށަވަރު ކުރުމަށާއި އިންޑިއާ ކަނޑުގެ ސަލާމަތާއި ރައްކާތެރިކަން ދެމެހެއްޓުމަށް ޓަކައި ބައިނަލްއަގްވާމީ މުޖުތަމައުގެ ޒިންމާދާރު ގައުމެއްގެ ހައިސިއްޔަތުން ރާއްޖެ އިން އަދާކުރަންޖެހޭ ދައުރު ފުރިހަމައަށް އަދާކުރުމުގެ ގާބިލްކަން ދިވެހި ސިފައިންގެ ގައިގައި ހަރުލެއްވުމަށް ރައީސް މުއިއްޒު ކަނޑައަޅުއްވާފައިވާ ލަނޑުދަނޑިއަށް ވާސިލްވުމުގެ ވަރަށް މުހިންމު ފިޔަވަޅެއް ކަމަށެވެ. މި އުޅަނދު ދިވެހިރާއްޖެއަށް ގެނެސް، ދިވެހިރާއްޖޭގެ ޤައުމީ ދިފާޢީ ބާރުގެ ޚިދުމަތަށް ނެރެ، އޮޕަރޭޓްކުރުމަށް ތައްޔާރުވުމުގެ ގޮތުން، ތުރުކީ ވިލާތުގައި ދިވެހި ސިފައިންގެ ޓީމެއް ދަނީ ތަމްރީންވަމުންނެވެ.
ދިފާޢީ ޒުވާރާއިން ވިދާޅުވީ ސިފައިންގެ ޚިދުމަތަށް އިތުރުކުރެވޭ މި ގާބިލުކަމަކީ، ގާނޫނުގައި ބަޔާންކުރާ ދިވެހިރާއްޖޭގެ ސަރަޙައްދާއި ޚާއްސަ އިގްތިސާދީ ސަރަޙައްދާއި، ރައްޔިތުންގެ ރައްކާތެރިކަން ކަށަވަރުކުރުމަށް ލިބޭ ވަރަށް ވަރަށް ބޮޑު ބާރަކަށް ވެގެންދާނެ ކަމަށެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0