ބޯންމަތު އަތުން އާސެނަލް ބަލިވެއްޖެ

Read Time:3 Minute, 36 Second

އިނގިރޭސި ޕްރިމިއާ ލީގުގައި ރޭ ބޯންމަތު އާއި ދެކޮޅަށް އާސެނަލް ކުޅުނު މެޗުން 2-1 ގެ ނަތީޖާއަކުން އާސެނަލް ބަލިވެއްޖެ އެވެ. އާސެނަލްގެ އެމިރޭޓްސް ސްޓޭޑިއަމްގައި ފަސްދޮޅަސް ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުން އާސެނަލް ބަލިވެފައިވާއިރު މިއީ ޔޫއެފާ ޗެމްޕިއަންސް ލީގުގެ ސެމީ ފައިނަލުގެ ދެވަނަ ލެގުގައި މި ހަފްތާގައި ޕީއެސްޖީ އާއި ދެކޮޅަށް ނިކުންނައިރު އެޓީމަށް ކުރިމަތިވި ނުތަނަވަސްކަމެކެވެ. މި މެޗަށް ނިކުތް އާސެނަލްގެ ޓީމަށް ކޯޗު މިކޭލް އާޓޭޓާ ވަނީ ބަދަލުތަކެއް ގެނެސްފަ އެވެ. އެއީ ޕީއެސްޖީ އާއި ދެކޮޅަށް ކުޅޭ މުހިންމު މެޗަށް ކުޅުންތެރިންނަށް އަރާމުކުރަން ފުރުސަތު ދިނުމުގެ ގޮތުންނެވެ.

މި މެޗުގެ 34 ވަނަ މިނިޓުގައި އާސެނަލްގެ ޑެކްލަން ރައިސް ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ. މިއީ އޭނާ އާސެނަލް އަށް ކުޅެދިން 100 ވަނަ މެޗެވެ. ފުރަތަމަ ހާފުގައި އާސެނަލް އިން ލަނޑެއް ޖަހާ ކުރި ހޯދި ނަމަވެސް މޯންމަތުއިން ވަނީ މި މެޗުގައި ރަގަޅު ކުޅުމެއް ދައްކާ ލަނޑު ޖަހާނެ ރަގަޅު ފުރުސަތުތަކެއް ތަނަވަސްކޮށްފަ އެވެ. އަދި ދެވަނަ ހާފުގެ ކުޚުން ފެށުނުތާ 22 ވަނަ މިނިޓުގައި ބޯންމަތުގެ ޑީން ހުއިސެން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފަ އެވެ. މި ލަނޑަކީ ސެމެންޔޯ އޭރިޔާ ތެރެއަށް އެއްލި ބޯޅައެއް ބޮލުން ޖަހާ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްފައިވާ ލަނޑެކެވެ.

މި މެޗުން ބޯންމަތު މޮޅުވި ލަނޑު މެޗުގެ 75 ވަނަ މިނިޓުގައި އެ ޓީމަށް ކާމިޔާބުކޮށްދީފައިވަނީ އެވަނިލްސަން ކާމިޔާބުކޮށްދިން ލަނޑުންނެވެ. ބޯންމަތު މި މެޗުން މޮޅުވެފައިވާއިރު މިއީ އެމިރޭޓްސް ސްޓޭޑިއަމްގައި އާސެނަލް އަތުން ބޯންމަތު މޮޅުވި ފުރަތަމަ ފަހަރެވެ. މި މެޗުން ބޯންމަތު މޮޅުވުމާއިއެކު އެ ޓީމަށް 35 މެޗުން ލިބިފައިވާ 53 ޕޮއިންޓާއެކު ވަނީ ތާވަލުގެ 8 ވަނަ މަގާމް ލިބިފަ އެވެ. އާސެނަލް އަށް ލިބިފައިވާ 67 ޕޮއިންޓާއެކު އަދިވެސް އެ ޓީމު އޮތީ ތާވަލުގެ ދެވަނައިގަ އެވެ.