މިހާތަނަށް 26،000 އަށްވުރެ ގިނަ ވޭޕްގެ އާލާތްތަކާއި، 14.5 މިލިއަން ސިނގިރޭޓު އަތުލައިގެންފި

Read Time:4 Minute, 59 Second

ރާއްޖޭގައި ދުންފަތުގެ އިސްތިއުމާލު ކުރުން ހުއްޓުވުމަށް ޓަކައި ސަރުކާރުން އަޅަމުންދާ ފިޔަވަޅުތަކުގެ ތެރެއިން މިހާތަނަށް 26،000 އަށްވުރެ ގިނަ ވޭޕްގެ އާލާތްތަކާއި 14.5 މިލިއަން ސިނގިރޭޓު އަތުލައިގަނެފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ހާމަކުރައްވައިފިއެވެ. ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސް މުޢިއްޒު ވިދާޅުވީ، މިހާރު ތަންފީޒުކުރަމުންދާ ޤާނޫނުގެ ދަށުން އެ ތަކެތި އަތުލައިގަނެވިފައިވާ ކަމަށެވެ. އަދި ދުންފަތުގެ އިސްތިއުމާލު ކުރުން ހުއްޓުވުމަށް ޓަކައި “ޖެނެރޭޝަނަލް ބޭން” އެއް ގެނައުމަށް ސަރުކާރުން ނިންމާފައިވާކަން ވެސް ތަކުރާރުކުރެއްވިއެވެ.

“ޖެނެރޭޝަނަލް ބޭން” ގެ ދަށުން، 2007 ވަނަ އަހަރުން ފެށިގެން އުފަންވެފައިވާ އަދި އުފަންވާ ކުދިންނަށް ދުންފަތުގެ އިސްތިއުމާލުކުރުން މަނާ ކުރެވޭނެއެވެ. މި ބަދަލު ގެނައުމަށް ޓަކައި ސަރުކާރުން ވަނީ ދުންފަތް ކޮންޓްރޯލް ކުރުމާބެހޭ ޤާނޫނަށް އިސްލާހެއް ހުށަހަޅާފައެވެ. ރައީސް މުޢިއްޒު އިތުރަށް ވިދާޅުވީ، މި އައު ޤާނޫނު ތަންފީޒުކުރަން ފެށުމާއެކު ދުންފަތުގެ އިސްތިއުމާލުކުރުމަށް ބޭނުންކުރާ ސިނގިރޭޓު އަދި ވޭޕްފަދަ އާލާތްތައް އަތުލުން އިތުރަށް ހަރުދަނާވެގެންދާނެ ކަމަށެވެ.

“ދެން އަޅުގަނޑުމެން މިހާރު މި ތަންފީޒުކުރާ ޤާނޫނުގެ ތެރެއިން ނުވަތަ އިމްޕްލިމެންޓޭޝަންގެ ތެރެއިން މިހާތަނަށް 26000 ވޭޕް ނުވަތަ އޭގެ އާލާތްތައް ވަނީ ހިފެހެއްޓިފައި. 14.5 މިލިޔަން ސިނގިރޭޓު ވަނީ އަތުލައިގެނިވިފައި ޤާނޫނު ތަންފީޒުކުރަން ފެށި ފަހުން.” ރައީސް ވިދާޅުވިއެވެ.

މި އިސްލާހުގެ ދަށުން، ދުންފަތުގެ ބާވަތްތައް ވިއްކޭނީ ލައިސަންސް އޮވެގެން ރަޖިސްޓްރީ ކޮށްފައިވާ ތަންތަނުގައި އެކަންޏެވެ. އަދި އޮންލައިންކޮށް ނުވަތަ ވެންޑިން މެޝިން ފަދަ ވަސީލަތްތައް ބޭނުންކޮށްގެން ދުންފަތުގެ ބާވަތްތައް ވިއްކުން މަނާ ކުރެވޭނެއެވެ. މީގެ އިތުރުން، އިލެކްޓްރޯނިކް ސިނގިރޭޓާއި ވޭޕްގެ ބާވަތްތައް އަތުލުމުގެ ބާރު ފުލުހުންނަށާއި ކަސްޓަމްސްއަށް ލިބިގެންދާނެއެވެ. ބިލު ފާސްވުމަށްފަހު އަމަލުކުރުމަށް 6 މަސްދުވަހުގެ މުއްދަތެއް ދެވޭނެ ކަމަށާއި، މި އަހަރުގެ ނޮވެންބަރު މަހުގެ 1 ވަނަ ދުވަހުން ފެށިގެން މި އައު ޤާނޫނަށް ޢަމަލުކުރަން ފެށުމަށް ވަނީ ނިންމާފައެވެ.

މިދިޔަ އަހަރުގެ ޑިސެމްބަރު 15 އިން ފެށިގެން އީ-ސިނގިރޭޓާއި ވޭފް ކުރުމަށް ބޭނުން ކުރާ އާލާތްތަކާއި އެ އެއްޗެއްސާއެކު ބޭނުން ކުރުމަށް ތައްޔާރުކޮށްފައިވާ އުފެއްދުންތައް ރާއްޖޭގައި ވިއްކުމާއި ހިލޭ ބެހުމާ އަދި ބޭނުން ކުރުން ވަނީ މަނާކޮށްފައެވެ. އަދި އެފަދަ ތަކެތި ބޭނުން ކުރާ ނަމަ، ބޮޑެތި އަދަދުތަކުން ދަނީ ޖޫރިމަނާ ކުރަމުންނެވެ.