Read Time:5 Minute, 45 Second
(ފޮޓޯ ކްރެޑިޓްސް: ރައީސް އޮފީސް)
ރާއްޖޭގެ ޖުޑީޝަރީގެ މިނިވަންކަމަށް ނުފޫޒު ނުފޯރުވާ ކަމަށާއި، މިއީ ޑިމޮކްރެޓިކް ވެރިކަމެއްކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ތަކުރާރުކޮށް ވިދާޅުވެއްޖެއެވެ. ރައީސް މިހެން ވިދާޅުވީ ރައީސް އޮފީހުގައި މިވަގުތު ކުރިއަށްދާ ނޫސްވެރިންގެ ބައްދަލުވުމުގައި ނޫސްވެރިޔަކު ކުރެއްވި ސުވާލަށް ޖަވާބު ދެއްވަމުންނެވެ. ނޫސްވެރިޔާ ފާހަގަކުރީ، ސުޕްރީމް ކޯޓުގެ ތިން ފަނޑިޔާރުން ސަސްޕެންޑްކޮށްފައި އޮތުމާއި، އެ ކޯޓަށް ދުސްތޫރީ މައްސަލަތައް ނުބެލޭ ހާލަތުގައި އޮތްތާ 60 ދުވަހަށްވުރެ ގިނަ ދުވަސްވެފައިވާކަމެވެ. އަދި އެ ހާލަތު ރަނގަޅުކުރުމުގެ ބާރު ރައީސްގެ އަތްޕުޅުގައި އޮތް ކަމަަށް ބުންޏެވެ.
މި ސުވާލަށް ޖަވާބު ދެއްވަމުން ރައީސް މުޢިއްޒު ވިދާޅުވީ، ރައީސްކަމުގެ ހުވާކުރެއްވި ދުވަހު ވެސް ޖުޑީޝަރިއަށް އަތް ނުބާނާނެ ކަމަށާއި މިނިވަންކަމާއެކު ޖުޑީޝަރީ ހިންގަން ފުރުސަތު ދެއްވާނެ ކަމަށް ވިދާޅުވެފައިވާ ކަމަށެވެ. އަދި މިހާރު ވެސް އެގޮތަށް އަމަލުކުރައްވަމުން ގެންދަވާ ކަމަށާއި ފަހުން ވެސް އަތް ނުބާނާނެ ކަމުގެ ޔަޤީންކަން އެމަނިކުފާނު ވަނީ ދެއްވާފައެވެ. “އަޅުގަނޑުގެ އެއްވެސް ޝައުގުވެރިކަމެއް ހުންނަ ކަމެއް ނޫން ކޯޓެއްގައި ޖުޑީޝަރީގައި ކަމެއް ހިނގާ ގޮތް، ހިންގާނެ ގޮތް، ވަކި ގޮތަކަށް ހިންގަން، ނިންމުން. އެއީ އަޅުގަނޑު ކުރާނެ ވެސް ކަމެއް ނޫން. ޖޭއެސްސީއަކީ އަޅުގަނޑު ކޮންޓްރޯލްކުރާ ތަނެއް ނޫން. ޖުޑީޝަރީއަކީ އަޅުގަނޑުގެ ކޮންޓްރޯލް ހިންގާނެ ވެސް ތަނެއް ނޫން. އެހެންވީމާ ޖުޑީޝަރީގެ ތެރެއިން ހިނގާ ކަންކަން ޖުޑީޝަރީން ޖަވާބު ދެއްވާނީ.” ރައީސް ވިދާޅުވިއެވެ.
ރައީސް ވިދާޅުވި ގޮތުގައި ޖުޑީޝަރީގެ ތެރޭގައި ހިނގާ ކަންކަމާ ގުޅޭގޮތުން ޖަވާބުދާރީވާން ޖެހޭނީ ޖުޑީޝަރީންނެވެ. ރައީސުލްޖުމްހޫރިއްޔާގެ ހައިސިއްޔަތުން ޖުޑީޝަރީގެ އެއްވެސް ކަމެއް އެގޮތަކަށް ނުކުރާނެ ކަމުގެ ޔަޤީންކަން ރައީސް ވަނީ ދެއްވާފައެވެ.
ރައީސް މުޢިއްޒު އިތުރަށް ވިދާޅުވީ މިއީ ޑިމޮކްރެޓިކް ވެރިކަމެއްކަމަށާއި، ސަރުކާރުން ކަންކަން ކުރަމުންދަނީ ޑިމޮކްރަސީގެ ނިޒާމުގެ ތެރެއިންކަމަށެވެ.
“އާދެ، ހަމަ ޔަޤީނުން ވެސް ޑިމޮކްރެޓިކް ވެރިކަމެއް. އެއީ ރައްޔިތުންގެ ވޯޓަކުން އިލެކްޝަނުގެ ހުރިހާ މަޤާމުތަކަށް މީހުން ނަގަނީ ވެސް، ހަމަ ޑިމޮކްރަސީގެ ނިޒާމުގެ ތެރެއިން ފުރިހަމަ ބާރު މިއޮންނަނީ ރައްޔިތުންނަށް އަދި މުވައްސަސާތަކަށް ވެސް މިއޮންނަނީ. ޤާނޫނުއަސާސީން ކަނޑައެޅިފައި އޮންނަ ބާރުގެ ތެރެއިން ފުރިހަމަ މިނިވަންކަން އެބައޮތް އެބޭފުޅުން ބޭނުންފުޅުވާ ގޮތަށް އެބޭފުޅުންގެ ޒިންމާ އަދާކުރެއްވުމަށް. އެއަކަށް އެއްވެސް ހުރަހެއް އަޅުގަނޑު ނާޅުއްވާނަން. މިހާތަނަށް ވެސް ނާޅަން ކުރިޔަށް އޮތްތާގައި ވެސް ނާޅާނަން،” ރައީސް ވިދާޅުވިއެވެ.
ރައީސް މުޢިއްޒު ވަނީ ޖުޑީޝަރީގެ މިނިވަންކަމަށް އިޙްތިރާމްކުރައްވާކަމާއި، ވަކިވަކި ބާރުތަކުގެ މިނިވަންކަން ދެމެހެއްޓުމަށް އަޒުމް ކަނޑައަޅުއްވާފައިކަމަށް ވިދާޅުވިއެވެ. ނަމަވެސް، ސުޕްރީމް ކޯޓުގެ މަސައްކަތްތައް ހުއްޓިފައިވާ މައްސަލައާ ގުޅޭގޮތުން ގިނަ ސުވާލުތަކެއް އަދިވެސް އުފެދިފައިވާކަން ފާހަގަކުރެވެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0