ސަރުކާރުގެ ސިޔާސަތަކީ ފްލެޓް ލިބުނު މީހުންނަށް އެ ލިބުނު ތަނަކުން ދޫކުރުން: ރައީސް

Read Time:3 Minute, 41 Second

(ފޮޓޯ ކްރެޑިޓްސް: ވަގުތު)

ސަރުކާރުގެ މައިގަނޑު ސިޔާސަތަކީ ފްލެޓް ލިބުނު މީހުންނަށް އެ ލިބުނު ތަނަކުން ތަންތަން ދޫކުރުން ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ. ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ ހުޅުމާލޭގައި އިމާރާތް ކުރަމުން އަންނަ 4،000 ފްލެޓު ލިސްޓަށް ލިބުނު ޝަކުވާތައް ބަލައި ނިންމަމުންދާ ކަމަށެވެ. އަދި ޝަކުވާގެ މުއްދަތުގައި އެ ފަރާތްތަކަށް ޖަވާބު ލިބިގެންދާނެ ކަމަށް ވިދާޅުވިއެވެ.

(ފޮޓޯ ކްރެޑިޓްސް: ރައީސް އޮފީސް)

“އަޅުގަނޑުގެ މަގްސަދަކީ ކޮންމެ ސަރުކާރަކުން ދީފައިވާ ފްލެޓެއް ވިޔަސް ގޯއްޗެއް ވިޔަސް އެ ދިންތާކުން އެ މީހަކަށް އެ އެއްޗެއް ދިނުން. އޭސީސީއިން ނުވަތަ ތަނަކުން މައްސަލައެއް ފާހަގަކޮށްފައިވާނަމަ ނުވަތަ ގަސްތުގައި އޮޅުވާލައިގެން މަކަރު ހަދައިގެން ފޯޖް ޑޮކިއުމެންޓް ލާފައިވާނަމަ އެއީ އާންމުކޮށް އޮންނަ އުސޫލުން އެ މީހަކު ބާތިލްވާ ކަމެއް.” ރައީސް ވިދާޅުވިއެވެ. ރައީސް ވިދާޅުވީ ޝަކުވާތައް ބަލާ ނިމޭއިރު މިދިޔަ ސަރުކާރުން އިއުލާނުކުރި ލިސްޓަށް މާބޮޑު އުނިކަމެއް ނައިސް ވީހާ ވެސް ގިނަ ބަޔަކަށް ފްލެޓް ލިބިގެންދާނެ ކަމަށެވެ. އަދި 4،000 ފްލެޓް ވަރަށް އަވަހަށް އޭގެ ހައްގުވެރިންނަށް ދެވިގެންދާނެ ކަމަށް އުންމީދުކުރައްވާ ކަމަށް ވިދާޅުވިއެވެ.

(ފޮޓޯ ކްރެޑިޓްސް: ވަގުތު)

4،000 ފްލެޓްގެ ލިސްޓު ނެރުނީ ފެބްރުއަރީ 27 ވަނަ ދުވަހެެވެ. ހުރިހާ ކަމެއް ވެރިފައި ކުރުމަށްފަހު ނެރުނު ލިސްޓަށް ބަލާއިރު ތިން ކޮޓަރީގެ ލިސްޓުގައި ހިމެނޭ 3،721 ފަރާތުގެ ތެރެއިން ޝަރުތު ހަމަވެ 75 ޕޮއިންޓަށްވުރެ މަތިން 1،423 ފަރާތަކަށް ވަނީ ޕޮއިންޓު ލިބިފައެވެ. އަދި ދެ ކޮޓަރީގެ ލިސްޓުގައި ހިމެނޭ 1،218 ފަރާތުގެ ތެރެއިން ޝަރުތު ހަމަވެ 73 ޕޮއިންޓަށްވުރެ މަތިން ލިބިފައިވަނީ 397 ފަރާތަކަށެވެ. އެހެންކަމުން ޖުމްލަ ޗެކްކުރި 4،939 ފޯމުގެ ތެރެއިން ފްލެޓް ލިބޭނެ ކަމަށް ކަނޑައަޅާފައިވަނީ 1،820 ފަރާތަކަށެވެ.