ގެއްލުނު ކަނޑުގެ ބައި ހޯދުމަކީ މައި ސިޔާސަތެއް، ކުޑަ ވެސް ދުލެއް ނުދެން: ރައީސް

Read Time:7 Minute, 11 Second

(ފޮޓޯ ކްރެޑިޓްސް: ރައީސް އޮފީސް)

ދިވެހިރާއްޖޭގެ ކަނޑުން ގެއްލުނު ސަރަޙައްދު އަނބުރާ ހޯދުމަށް ކުޑަ ވެސް ދުލެއް ނުދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ. ރައީސް އޮފީހުގައި ކުރިއަށްދާ ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސް މުޢިއްޒު ވިދާޅުވީ، އެ މައްސަލައިގައި ކުރަންޖެހޭ މަސައްކަތްތައް ކުރިއަށްދާ ކަމަށާއި މިއަދާ ހަމައަށް އައިއިރު ކުރެވިފައި ހުރީ ވަރަށް އުނދަގޫ ދަތި އަދި ކަވި މަސައްކަތްތަކެއް ކަމަށެވެ. އަދި އެ މަސައްކަތްތަކުގައި ބޭރުގެ ހަބީރުންގެ ލަފާ އާއި އިރުޝާދު ހޯދާފައިވާނެ ކަމަށެވެ. އަދި ކަނޑުން ގެއްލުނު ބައި ހޯދުމުގައި ކުޑަ ތަންކޮޅެއް ވެސް ދޫ ނުކުރާނެ ކަމަށް އެމަނިކުފާނު ވިދާޅުވިއެވެ.

“”ނަމަވެސް ގެއްލިގެން ދިޔަ ކަނޑުގެ ބައި ހޯދުމަކީ އަޅުގަނޑުމެންގެ މައި ސިޔާސަތެއް. އެކަމުގައި އަޅުގަނޑުމެންގެ މަސައްކަތަކަށް ކުޑަނަމަވެސް ދުލެއް ނުދެން. ފަހަތަކަށް ނުޖެހެން،” ރައީސް ވިދާޅުވިއެވެ.

ރާއްޖެއާ ދެކޮޅަށް މޮރިޝަސްއިން ހުށަހެޅި މައްސަލައިގައި، ނިމިދިޔަ ސަރުކާރުން ޢަމަލުކޮށްފައިވާ ގޮތުން ރާއްޖޭގެ އެކްސްކްލޫސިވް އިކޮނޮމިކް ޒޯން (އީއީޒެޑް)ގެ ތެރެއިން ދެކުނު ކަނޑުގެ ޞަރަޙައްދުން ބޮޑު ބައެއް ގެއްލޭ ގޮތަށް ކަނޑުތަކާ ބެހޭ ބައިނަލްއަގުވާމީ ޓްރައިބިއުނަލް، އިޓްލޮސްއިން ނިންމާފައިވާ ނިންމުން ދިރާސާކޮށް، ގެއްލިފައިވާ ކަނޑުގެ ސަރަޙައްދު އަނބުރާ ހޯދުމަށް ކުރެވެން ހުރި މަސައްކަތް ކުރުމަކީ ރައީސް މުޢިއްޒުގެ ރިޔާސީ ވަޢުދުފުޅެކެެވެ.

(ފޮޓޯ ކްރެޑިޓްސް: ރައީސް އޮފީސް)

ރައީސް އިތުރަށް ވިދާޅުވި ގޮތުގައި މިހާތަނަށް ބޭރުގެ ހަބީރުންގެ އެހީ އާއި ލަފާ ހޯދާފައިވާއިރު، މިހާރު ކުރިއަށްދަނީ އެކަމާ ގުޅިގެން ދެން ހުރި މަރުޙަލާތަކުގެ މަސައްކަތްތަކެވެ. ޗާގޯސް މައްސަލައިގައި އިނގިރޭސިވިލާތުގެ ސިޔާސަތަށް އައި ކުޑަ ބަދަލަކާ ގުޅިގެން ކުރަންޖެހޭ މަޝްވަރާތައް ވެސް ހުންނާނެ ކަމަށް ރައީސް ވިދާޅުވިއެވެ.

“މިހާރު ދެން މިދަނީ އެކަމާ ގުޅިގެން ދެން ހުރި މަރުހަލާތަކުގެ މަސައްކަތްތައް ކުރަމުން. އެ މަސައްކަތްތައް ފަށާފައި ވަނީ،” ރައީސް ވިދާޅުވިއެވެ.

(ފޮޓޯ ކްރެޑިޓްސް: ރައީސް އޮފީސް)

ޗާގޯސްގެ ސިޔާދަތީ ބާރު މޮރިޝަސްއަށް ލިބޭނެ ކަމަށް ބައިނަލްއަޤްވާމީ ކޯޓުން ނިންމި ނިންމުމާ ގުޅިގެން، މޮރިޝަސް އާއި ރާއްޖެއާ ދެމެދު ފުށުއަރާ 95,000 އަކަ ކިލޯމީޓޯމީޓަރުގެ ސަރަޙައްދެއް ވަނީ މެދުން ބައިކޮށްފައެވެ. އިޓްލޮސްގެ ނިންމުން އިސްތިއުނާފު ކުރުމަކީ މި ސަރުކާރުގެ ވަޢުދެއް ކަމަށްވާއިރު، ޗާގޯސް މައްސަލަ ކުރިއަށްގެންދަން ސަރުކާރުން ކޮމިޓީއެއް އެކުލަވާލާފައިވެއެވެ. އެ ކޮމިޓީގައި އިސްކޮށް ހުންނެވީ ކުރީގެ ބަންޑާރަނައިބު މުޙައްމަދު އަނިލެވެ. ރައީސް މުޢިއްޒު އިތުރަށް ވިދާޅުވީ، ޗާގޯސްއަކީ ރާއްޖެއާ ގުޅިފައި އޮތް ތަނަކަށްވާ ކަމަށް ލިޔެކިޔުންތަކުން ފެންނަން ހުރުމުން އެތަން އެހެން ޤައުމަކަށް ލިބުމަށް ވުރެ ރާއްޖެއަށް ލިބުން އައުލާކަން ބޮޑު ކަމަށެވެ.

(ފޮޓޯ ކްރެޑިޓްސް: ރައީސް އޮފީސް)

ފާހަގަކޮށްލެވޭ ގޮތުގައި ޗާގޯސްގެ ރަށްތައް މޮރިޝަސްއަށް ދޭން އިނގިރޭސިވިލާތުން އެއްބަސްވުމާ ގުޅިގެން ރައީސް މުޢިއްޒު ވަނީ އިނގިރޭސި ސަރުކާރަށް ސިޓީފުޅެއް ފޮނުއްވާފައެވެ. ނަމަވެސް އެ ސިޓީފުޅުގެ ތަފްސީލު ހާމަނުކުރެވޭނެ ކަމަށް ސަރުކާރުން ވިދާޅުވެފައިވެއެވެ.

މި މައްސަލައިގެ ތާރީޚީ ފަސްމަންޒަރަށް ބަލާއިރު އިނގިރޭސިން ޗާގޯސްގެ ރަށްތަކަށް ވެރިވެގަތީ 1965 ވަނަ އަހަރު މޮރިޝަސް އެ ޤައުމުގެ އިސްތިޢުމާރުގެ ދަށުގައި އޮތް އިރެވެ. ޑިއެގޯ ގާސިއާގައި އެމެރިކާގެ އަސްކަރީ މަރުކަޒެއް ޤާއިމުކޮށް ހިންގުމަށް ކުއްޔަށް ދީފައި ވަނީ 2036 ގެ ނިޔަލަށެވެ. 2019 ގައި މޮރިޝަސްއިން ޗާގޯސްގެ މައްޗަށް ސިޔާދަތީ ބާރު ހޯދުމަށް އިންޓަނޭޝަނަލް ކޯޓް އޮފް ޖަސްޓިސްގައި ކުރި ދަޢުވާ މޮރިޝަސްއާ އެއްކޮޅަށް ނިމި، އެ ކޯޓުން ވަނީ ޗާގޯސް މޮރިޝަސްއާ ޙަވާލުކުރުމަށް އިނގިރޭސިވިލާތަށް އަންގާފައެވެ.