ރިސޯޓްތަކުން 214 މިލިއަން ޑޮލަރު ބޭންކްތަކަށް މާރުކޮށްފި: ރައީސް

Read Time:4 Minute, 24 Second

(ފޮޓޯ ކްރެޑިޓްސް: ރައީސް އޮފީސް)

ބޭރު ފައިސާ މާރުކުރުމާ ބެހޭ ގަވާއިދަށް ގެނެވުނު އިޞްލާޙާ އެއްގޮތަށް ރިސޯޓުތަކުން 214 މިލިއަން ޑޮލަރު ބޭންކުތަކަށް މާރުކޮށްފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ހާމަކުރައްވައިފިއެވެ. ރައީސް އޮފީހުގައި ކުރިއަށްދާ ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުން ރައީސް މުޢިއްޒު ވިދާޅުވީ، ފަތުރުވެރިކަމުގެ ދާއިރާއިން ދައުލަތަށް ވަރަށް ބޮޑު އެއްބާރުލުމެއް ލިބެމުންދާ ކަމަށާއި އޭގެ ނަތީޖާއެއްގެ ގޮތުން އެ ދާއިރާއިން ދައުލަތަށް 214 މިލިއަން ޑޮލަރު މިހާތަނަށް މާރުކޮށްފައިވާ ކަމަށެވެ. މި އެއްބާރުލުމުގެ ނަތީޖާއެއްގެ ގޮތުން ރައްޔިތުންނަށް ބޮޑެތި ފައިދާތަކެއް ކުރާނެކަން ރައީސް ފާހަގަކުރެއްވިއެވެ.

“އަޅުގަނޑުމެން އަލަށް ފާސްކުރި ބޭރުގެ ފައިސާއާ ބެހޭ ޤާނޫނުގެ ނަތީޖާއެއްގެ ގޮތުން އަމަލު ކުރަން ފެށުމާއެކީގައި ބޭންކުތަކުން މިހާރު މާރުކޮށްފި 214 މިލިޔަން ޑޮލަރު. މިއީ ވަރަށް ރަނގަޅު އެއްބާރުލުމެއް ލިބިގެން މިދަނީ ހާއްސަކޮށް ޓޫރިޒަމް އިންޑަސްޓްރީއިން ލިބޭ ވަރަށް ރަނގަޅު އެއްބާރުލުމެއް.” ރައީސް ވިދާޅުވިއެވެ.

މިދިޔަ އަހަރުގެ އޮކްޓޯބަރު މަހުން ފެށިގެން އަމަލުކުރަން ފެށި އިޞްލާޙުގައިވާ ގޮތުން، ރިސޯޓަށް އަންނަ ކޮންމެ ފަތުރުވެރިއަކަށް 500 ޑޮލަރުގެ މަގުން ޑޮލަރު މާރުކުރަން ޖެހެއެވެ. ނަމަވެސް، ފަހުން ރައްޔިތުންގެ މަޖިލީހުން ވަނީ ލިބޭ އާމްދަނީގެ 20 ޕަސެންޓް މާރުކުރުމުގެ އިޚްތިޔާރު ބޭނުންކުރެވޭ ގޮތަށް ޤާނޫނު ފާސްކޮށްފައެވެ. ރައީސް މުޢިއްޒު އިތުރަށް ވިދާޅުވި ގޮތުގައި 2026 ގެ ފުރަތަމަ ކުއާޓަރުގައި ރާއްޖެއިން ބޭރަށް ދާ ދިވެހިންނަށް އެއާޕޯޓުން 1,000 ޑޮލަރު މާރުކުރެވޭނެއެވެ. އަދި 2026 ގެ ފުރަތަމަ ކުއާޓަރު ނިމޭއިރު ކްރެޑިޓް ކާޑުގެ ލިމިޓް 1,400 ޑޮލަރަށް އިތުރުކުރެވޭނެ ކަމަށާއި 2025 ގެ މެދުތެރޭގައި ވިޔަފާރިވެރިންނަށް މުދާ އިމްޕޯޓްކުރުމަށް ބޭންކުތަކުން ޓީޓީ ހަދަން ދޫކުރާ ލިމިޓް އިތުރުކުރެވޭނެ ކަމަށް ވެސް ރައީސް ވަނީ ވިދާޅުވެފައެވެ.

ހަމައެއާއެކު ސަރުކާރު ކުންފުނިތަކަށް ކަޅު ބާޒާރުގެ ބަދަލުގައި ބޭންކު ރޭޓުގައި ޑޮލަރު ގަނެވޭނެކަން ވެސް އެމަނިކުފާނު ވަނީ ފާހަގަކުރައްވާފައެވެ. މި ފިޔަވަޅުތަކުގެ ސަބަބުން ރައްޔިތުންނަށާއި ވިޔަފާރިވެރިންނަށް ބޮޑެތި ލުއިފަސޭހަތަކެއް ލިބިގެންދާނެ ކަމަށް އުންމީދު ކުރައްވާ ކަމަށް ރައީސް މުޢިއްޒު ވިދާޅުވިއެވެ.