Read Time:4 Minute, 19 Second
(ފޮޓޯ ކްރެޑިޓްސް: ރައީސް އޮފީސް)
އިސްރާއީލް ޕާސްޕޯޓު ރާއްޖޭގައި މަނާކުރަން ނިންމި ނިންމުމަކީ ޚާރިޖީ ސިޔާސަތުގެ ފަހުރުވެރި ނިންމުމެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. ރައީސް މިހެން ވިދާޅުވީ، ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ. ރައީސް ވިދާޅުވި ގޮތުގައި މިއީ ފަލަސްތީނުގައި ހިންގަމުންދާ ޤަތުލުއާންމާއި ދެކޮޅަށް އަޑުއުފުލައި ފަލަސްތީނުގެ ރައްޔިތުންގެ ހައްޤުގައި ރާއްޖެއިން ނިންމި ފަހުރުވެރި ނިންމުމެކެވެ.
“އިސްރާއީލް ޕާސްޕޯޓް މަނާކުރުމަކީ ޚާރިޖީ ސިޔާސަތުގެ ފަހުރުވެރި ނިންމުމެއް. އެއީ އަޅުގަނޑުމެން ފަޚުރުވެރިކަމާއެކީ ނިންމި ނިންމުމެއް. ޖެނޮސައިޑްއެއް ހިނގަމުންދާ، އެ އެކްސެސިޓީތަކާ ދެކޮޅަށް ފަލަސްތީނު ރައްޔިތުންގެ ހައްޤުގައި، ދިވެހި ހުރިހާ ރައްޔިތުންގެ ފަރާތުން ސަރުކާރުން ނިންމި މުހިންމު ނިންމުމެއް އެއީ.” ރައީސް ވިދާޅުވިއެވެ.
ރައީސް ވިދާޅުވީ، ރާއްޖެއަކީ އެހެން ގައުމުތަކާ އަޅާބަލާއިރު ކުދަ ގައުމަކަށް ވިޔަސް އިސްރާއީލުން ހިންގަމުންދާ ޖަރީމާތަކާއި ރާއްޖެއިން ދެކޮޅުކަން ހާމަކޮށްފައިވާ ކަމަށެވެ.ދިވެހިރާއްޖޭގެ އިމިގްރޭޝަންގެ ޤާނޫނަށް 3 ވަނަ އިޞްލާޙު ގެނައުމުގެ ބިލު މިދިޔަ އޭޕްރީލް މަހު 15 ވަނަ ދުވަހު މަޖިލީހުން ފާސްކުރުމާއެކު ހަމަ އެދުވަހު ރައީސް ވަނީ އެ ބިލް ތަސްދީގުކުރައްވާފައެވެ. މި ބިލުގެ މައިގަނޑު މަޤްޞަދަކީ އިސްރާއީލުގެ ރައްޔިތުން ރާއްޖެއަށް އެތެރެވުން މަނާކުރުމެވެ. މިއީ ފަލަސްތީނުގައި އިސްރާއީލުން ހިންގަމުންދާ އަނިޔާވެރި ޢަމަލުތަކާ ދެކޮޅަށް އެޅި ފިޔަވަޅެކެވެ.
(ފޮޓޯ ކްރެޑިޓްސް: ރައީސް އޮފީސް)
އިސްރާއީލުން ޣައްޒާއަށް ދެމުންދާ ހަމަލާތައް ފެށިފައިވަނީ 2023 ވަނަ އަހަރުގެ އޮކްޓޯބަރު 7 ވަނަ ދުވަހުއެވެ. މި ހަމަލާތަކުގައި މިހާތަނަށް 52،000 އަށް ވުރެ ގިނަ މީހުން ޝަހީދުވެ، 116,000 އަށް ވުރެ ގިނަ މީހުން ޒަޚަމްވެފައިވާ ކަމަށް ޣައްޒާގެ ޞިއްޙީ ވުޒާރާއިން ބުނެއެވެ. ދިވެހި ސަރުކާރުން ދަނީ ބައިނަލްއަޤްވާމީ މަންޞަތަކުގައި ފަލަސްތީނުގެ ޙައްޤުގައި މަސައްކަތްކުރަމުންނެވެ. އިރުމަތީ ޤުދުސް ހިމެނޭގޮތަށް 1967 ވަނަ އަހަރުގެ ކުރީގެ ބޯޑަރުތަކާ އެއްގޮތަށް ފަލަސްތީނުގައި މިނިވަން ދައުލަތެއް ޤާއިމުކުރުމަށް ރާއްޖެއިން އަބަދުވެސް ވަކާލާތުކުރެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0