Read Time:5 Minute, 21 Second
ޕާކިސްތާނުގެ ވައިގެ ސަރަޙައްދުން ދަތުރުނުކުރެވޭނަމަ، އަހަރު ދުވަހުގެ ތެރޭގައި 600 މިލިއަން ޑޮލަރު އިތުރަށް ޚަރަދުވާނެކަމަށް ބުނެ، އެ ޚަރަދު ފޫބައްދަން އެއަރ އިންޑިޔާއިން އެ ޤައުމުގެ މައި ސަރުކާރުގައި އެދިފައިވާ ކަމަށް، ރޮއިޓަރސް ނޫހުން ރިޕޯޓުކޮށްފިއެވެ. އިންޑިޔާގެ ކަޝްމީރުގައި ޓޫރިސްޓުން ތިބޭ މައި ސަރަޙައްދަކަށް ހަތިޔާރު އެޅި ހަނގުރާމަވެރިންތަކެއް ދިން ޙަމަލާއަށްފަހު، އިންޑިޔާ އާއި ޕާކިސްތާނުގެ ނުތަނަވަސްކަން އިންތިހާއަށް ހޫނުވެފައިވާއިރު، ޕާކިސްތާނުން ވަނީ އިންޑިޔާގެ އެއަރލައިންތަކަށް އެ ޤައުމުގެ ވައިގެ ސަރަޙައްދަށް ވަނުން މަނާކޮށްފައެވެ.
އެއަރލައިނުން 27 އޭޕްރީލްގައި އިންޑިޔާގެ ވައިގެ އުދުހުންތަކާބެހޭ ވުޒާރާއަށް ފޮނުވި ސިޓީއަކާ ޙަވާލާދީ ރޮއިޓަރސް ނޫހުން ބުނީ، ޕާކިސްތާނުގެ ވައިގެ ސަރަޙައްދު ބޭނުންނުކުރެވޭ ކޮންމެ އަހަރަކަށް 600 މިލިއަން ޑޮލަރު އިތުރަށް ޚަރަދު ވާނެކަމަށް ލަފާކޮށް، އެ އެއަރލައިނުން ވަނީ ސަރުކާރުން ސަބްސިޑީއެއް ހަމަޖައްސައި ދިނުމަށް އެދިފައެވެ. ޚަރަދު އިތުރުވަނީ، ޕާކިސްތާނުގެ ވައިގެ ސަރަޙައްދު ވަށާލާފައި ދިޔުމުގެ ސަބަބުން ތެލާއި ފްލައިޓުތަކުގެ ކްރޫންނަށް ކުރަންޖެހޭ ހޭދަ ބޮޑުވާތީ ކަމަށް އެ ސިޓީގައި ވަނީ ބުނެފައެވެ. ނަމަވެސް، މިކަމާ ގުޅޭގޮތުން އިންޑިޔާގެ މައި ސަރުކާރުން އަދި އެއްޗެއް ބުނެފައެއް ނުވެއެވެ.
އިންޑިޔާގެ ނަން މަޝްހޫރު ޓާޓާ ގުރޫޕުން ހިންގާ އެއަރ އިންޑިޔާއިން ޔޫރަޕާއި އެމެރިކާ އަދި ކެނެޑާގެ މަންޒިލްތަކަށް ދަތުރުކުރެއެވެ. އެ އެއަރލައިނުން ދަނީ އިންޑިޔާގެ މާކެޓުގެ ގާތްގަނޑަކަށް 30 ޕަސެންޓަށް ޚިދުމަތް ދެމުންނެވެ. މި މަހުގެ 22 ވަނަ ދުވަހު، އިންޑިޔާގެ ކަޝްމީރުގައި ފަތުރުވެރިން ތިބި ސަރަޙައްދަކަށް ހަތިޔާރު އެޅި ބަޔަކު ވަދެ، ބަޑިން ޙަމަލާދީ 26 މީހުން ވަނީ މަރާލައިފައެވެ. އެ ޙަމަލާދިން ތިން މީހުން ހޯދުމަށް އިންޑިޔާއިން ވަރުގަދަ އަސްކަރީ ޙަރަކާތެއް ހިންގަމުންދާއިރު، އޭގެ ތެރެއިން ދެ މީހުންނަކީ ޕާކިސްތާނަށް ނިސްބަތްވާ މީހުން ކަމަށް އިންޑިޔާއިން ވަނީ ތުހުމަތުކޮށްފައެވެ.
މި ކަމާ ގުޅިގެން، ދެ ޤައުމުގެ ދެމެދުގައި ޒަމާނުއްސުރެ އޮންނަ ނުތަނަވަސްކަން އިތުރަށް ހޫނުވެފައިވާއިރު، ދެ ޤައުމުގެ ގުޅޭ ސަރަޙައްދީ ރޮނގު ކައިރިން ލުއި ހަތިޔާރު ބޭނުންކޮށްގެން ދެ ޤައުމުގެ ސިފައިން ދަނީ ކޮންމެ ރެއަކު ކަހަލަ ގޮތަކަށް ޙަމަލާތައް ބަދަލުކުރަމުންނެވެ. މި ޙަމަލާއާ ގުޅިގެން ދެ ޤައުމުގެ ގުޅުން ގޯސްވެ އިންޑިއާއިން މިހާރު ވަނީ ޕާކިސްތާނާ އެކު ފެން ޙިއްސާކުރުމަށް ވެފައި އޮތް މުހިންމު އެއްބަސްވުމަކަށް ޢަމަލުކުރުން މެދުކަނޑާލައިފައެވެ. އޭގެ ރައްދުގައި ޕާކިސްތާނުން ވަނީ އިންޑިޔަން އެއާލައިންސްގެ ފްލައިޓުތަކަށް ޕާކިސްތާނުގެ ވައިގެ ސަރަޙައްދަށް ވަނުން މަނާކޮށްފައެވެ.
މީގެއިތުރުން، ދެ ޤައުމުން ވެސް މިހާރު ވަނީ ޚާރިޖީ ގުޅުން ދަށްކޮށް، ދެ ޤައުމުގެ ރައްޔިތުންނަށް ވިސާ ދިނުން ވެސް ވަގުތީ ގޮތުން ހުއްޓާލައިފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0