ކުރިއަށްއޮތް 24-36 ގަޑިއިރުގެ ތެރޭގައި އިންޑިޔާއިން ޕާކިސްތާނަށް ޙަމަލާދޭން ތައްޔާރުވާކަމުގެ ތުހުމަތު

Read Time:4 Minute, 53 Second

(ފޮޓޯ ކްރެޑިޓްސް: ރޮއިޓާރސް)

ކުރިއަށްއޮތް 24 ނޫނީ 36 ގަޑިއިރުގެ ތެރޭގައި، އިންޑިޔާގެ އަސްކަރިއްޔާއިން ޕާކިސްތާނަށް ޙަމަލާދޭން ތައްޔާރުވަމުންދާ ކަމަށް، ޕާކިސްތާނުގެ މަޢުލާމާތާއި ބްރޯޑްކާސްޓާގުޅޭ ވަޒީރު ތުހުމަތު ކުރައްވައިފިއެވެ. މި މަހުގެ 22 ވަނަ ދުވަހު، އިންޑިޔާގެ ކަޝްމީރުގައި ފަތުރުވެރިން ތިބި ސަރަޙައްދަކަށް ހަތިޔާރު އެޅި ބަޔަކު ވަދެ، ބަޑިން ޙަމަލާދީ 26 މީހުން ވަނީ މަރާލައިފައެވެ. އެ ޙަމަލާދިން ތިން މީހުން ހޯދުމަށް އިންޑިޔާއިން ވަރުގަދަ އަސްކަރީ ޙަރަކާތެއް ހިންގަމުންދާއިރު، އޭގެ ތެރެއިން ދެ މީހުންނަކީ ޕާކިސްތާނަށް ނިސްބަތްވާ މީހުން ކަމަށް އިންޑިޔާއިން ވަނީ ތުހުމަތުކޮށްފައެވެ.

މި ކަމާ ގުޅިގެން، ދެ ޤައުމުގެ ދެމެދުގައި ޒަމާނުއްސުރެ އޮންނަ ނުތަނަވަސްކަން އިތުރަށް ހޫނުވެފައިވާއިރު، ދެ ޤައުމުގެ ގުޅޭ ސަރަޙައްދީ ރޮނގު ކައިރިން ލުއި ހަތިޔާރު ބޭނުންކޮށްގެން ދެ ޤައުމުގެ ސިފައިން ދަނީ ކޮންމެ ރެއަކު ކަހަލަ ގޮތަކަށް ޙަމަލާތައް ބަދަލުކުރަމުންނެވެ. ޕާކިސްތާނުގެ މިނިސްޓަރު އަތައުﷲ ތަރާރު ސޯޝަލް މީޑިޔާގައި ކުރެއްވި ޕޯސްޓެއްގައި ވަނީ، ކަޝްމީރުގެ ޙަމަލާ ނިވާފަތްގަނޑަކަށް ހަދައިގެން އިންޑިޔާއިން ޕާކިސްތާނަށް ޙަމަލާދޭން އުޅޭކަމަށް ތުހުމަތު ކުރައްވައިފައެވެ. ނަމަވެސް، އެ ތުހުމަތުތަކަށް ބާރުލިބޭ އެއްވެސް ތަފްޞީލެއް އޭނާ ދެއްވާފައެއް ނުވެއެވެ.

އޭނާ ވިދާޅުވި ގޮތުގައި، އިންޑިޔާއިން ދޭ ޙަމަލާއެއްގެ ރައްދު ޕާކިސްތާނުން ދޭނެ ކަމާއި، އެފަދަ ޢަމަލަކާ ގުޅިގެން މުޅި ސަރަޙައްދުގައި އުފެދޭ ހަމަނުޖެހުންތަކެއްގެ ޒިންމާ އިންޑިޔާއިން އުފުލަންޖެހޭނެއެވެ. މިކަމާ ގުޅިގެން، އިންޑިޔާ ސަރުކާރުން ވެސް އަދި އަސްކަރިއްޔާއިން ވެސް އަދި މިހާތަނަށް އެއްޗެއް ބުނެފައެއް ނުވެއެވެ. ޕާކިސްތާނުގެ ދިފާޢީ ވަޒީރު ޚަވާޖާ މުޙައްމަދު އާޞިފް ވެސް ވަނީ އިންޑިޔާއިން ޕާކިސްތާނަށް ޙަމަލާދޭން ތައްޔާރުވަމުންދާކަމަށް “ރޮއިޓަރސް” ނޫހަށް ވިދާޅުވެފައެވެ. އެކަމާ ގުޅިގެން، ޕާކިސްތާނު ތައްޔާރީ ޙާލަތުގައި އޮތް ކަމަށާއި، ނަމަވެސް ނިޔުކްލިޔަރ ހަތިޔާރު ބޭނުންކުރުމުގެ ވިސްނުމެއް ނެތް ކަމަށް އޭނާ ވިދާޅުވިއެވެ.

މި ޙަމަލާއާ ގުޅިގެން ދެ ޤައުމުގެ ގުޅުން ގޯސްވެ އިންޑިއާއިން މިހާރު ވަނީ ޕާކިސްތާނާ އެކު ފެން ޙިއްސާކުރުމަށް ވެފައި އޮތް މުހިންމު އެއްބަސްވުމަކަށް ޢަމަލުކުރުން މެދުކަނޑާލައިފައެވެ. އޭގެ ރައްދުގައި ޕާކިސްތާނުން ވަނީ އިންޑިޔަން އެއާލައިންސްގެ ފްލައިޓުތަކަށް ޕާކިސްތާނުގެ ވައިގެ ސަރަޙައްދަށް ވަނުން މަނާކޮށްފައެވެ. މީގެއިތުރުން، ދެ ޤައުމުން ވެސް މިހާރު ވަނީ ޚާރިޖީ ގުޅުން ދަށްކޮށް، ދެ ޤައުމުގެ ރައްޔިތުންނަށް ވިސާ ދިނުން ވެސް ވަގުތީ ގޮތުން ހުއްޓާލައިފައެވެ.