Read Time:6 Minute, 5 Second
ދިވެހި ސިފައިންގެ ޤާބިލްކަން އިތުރުކޮށް، ވަރުގަދަކުރުމަށް ސަރުކާރުން ކުރަމުންދާ މަސައްކަތާމެދު ޤައުމީ ލޯބި ހުންނަ ކޮންމެ މީހަކުވެސް ފަޚުރުވެރިވާންޖެހޭނެކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ ސިފައިންގެ 133 ވަނަ އަހަރީ ދުވަހުގެ ރަސްމީ ޖަލްސާ ޝަރަފުވެރިކޮށްދެއްވައި، ދެއްކެވި ވާހަކަފުޅުގައެވެ. ރައީސުލްޖުމްހޫރިއްޔާ ވިދާޅުވީ މިނިވަންކަމާއެކު ރާއްޖެ މިހާހިސާބަށް އައިސްފައި މިވަނީ ދިވެހި ސިފައިން ބޮޑެތި ގުރުބާނީތަކެއްވެގެންކަމަށެވެ. އެގޮތުން ރާއްޖެއަށް އެކިއެކި ފަހަރުމަތިން ކުރިމަތިވި އުދުވާނީ ނުރައްކާތަކުން އަދި އެކި ހާދިސާތަކުގެ ހާލަތްތަކުގައި އާއި، އަދި ދިވެހި ރައްޔިތުން އެދުނު ކޮންމެ ކަމެއްގައިވެސް ދިވެހި ފަހުރުވެރި ލަޝްކަރު ވަނީ ވަރުގަދަ މަސައްކަތްތަކެއްކޮށްފައިކަމަށެވެ.
ރާއްޖޭގެ މިނިވަންކަމާއި އިސްތިޤްލާލު ހިމާޔަތްކުރުމުގައި ސިފައިންގެ މުހިއްމު ދައުރު ފާހަގަކުރައްވަމުން ރައީސުލްޖުމްހޫރިއްޔާ ވިދާޅުވީ އަސްކަރިއްޔާގެ ތަރައްޤީއާއި ޤާބިލްކަން އިތުރުކުރުމަށް ވޭތުވެދިޔަ އަހަރުތަކުގައި މަސައްކަތްތަކެއް ކޮށްފައިނުވާއިރު، އެހާލަތަށް ދިޔައީ ކީއްވެތޯ ރައްޔިތުން ސުވާލުކުރަންޖެހޭކަމަށެވެ. ރައީސުލްޖުމްހޫރިއްޔާ ވިދާޅުވީ އެމަނިކުފާނު ރާއްޖޭގެ ޒަަޢާމަތާއި ހަވާލުވުމަށްފަހު އެންމެ އިސް ވާޖިބެއްކަމަށް ދެކެވަޑައިގެން މަސައްކަތްކުރައްވަނީ ދިވެހި ޤައުމުގެ މިނިވަންކަމާއި ސިޔާދަތާއި އިސްތިޤުލާލު ހިމާޔަތްކޮށް، އަންނާން އޮތް ޖީލުތަކަށް ވާސިލުކޮށްދެއްވުމުގެ މަސައްކަތްކަމަށެވެ. އަދި އެ މަސައްކަތުގެ އެންމެ މުހިއްމު ބައިވެރިންނަކީ ދިވެހި ސިފައިންކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ މިހާތަނަށް އައިއިރު މި ސަރުކާރުން އަސްކަރިއްޔާގެ ތަރައްޤީއަށް ގިނަ މަސައްކަތްތަކެއްކޮށް، ކުރިއެެރުންތަކެއް ހޯއްދަވައިދެއްވާފައިވާކަމަށެވެ. ނަމަވެސް ބައެއް ފަރާތްތަކުން އެ މަސައްކަތަށް ފާޑު ވިދާޅުވާކަން ފާހަގަކުރައްވަމުން ރައީސުލްޖުމްހޫރިއްޔާ ވިދާޅުވީ، ޤައުމީ ލޯބި ހުންނަ ކޮންމެ މީހަކުވެސް އަސްކަރިއްޔާއަށް އަންނަ ކުރިއެރުންތަކާމެދު ފަޚުރުވެރިވާންޖެހޭނެކަމަށެވެ. ” ދިވެހި ސިފައިންގެ ފެންވަރު މަތިކުރުމާއި ހޯދައިދޭންޖެހޭ ވަސީލަތްތައް ހޯދައިދިނުމާއި ސިފައިންނަށް ދޭންޖެހޭ ތަމްރީން ދިނުމާއި ސިފައިންގެ ބާރު ވަރުގަދަކުރުމާއި މިކަންކަމަކީ އަޅުގަނޑުމެން ފަހުރުވެރިވާންޖެހޭނޭ ކަންކަން، ސިފައިންނަށް އެކި ތަކެތި ހޯދައިދިނީމަ އެކަމާއި ލަދު ގަންނަންޏާ އެމީހެއްގެ އަމިއްލަ ނަފްސާއި އެބަޖެހޭ ސުވާލުކުރަން ތިމަންނާގެ ޤައުމީ ލޯބި އޮތީ ކިހާހިސާބެއްގައިތޯ” ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ އަސްކަރިއްޔާގެ ތަރައްޤީއަށް ކުރައްވާ މަސައްކަތް ފަޚުރުވެރިކަމާއެކު ކުރިއަށްގެންދަވާނެކަމަށާއި، އެއީ ވަށާޖެހިފައިވާ ސިޔާސަތެއްގެ ދަށުން ޤައުމަށްޓަކައި ކުރަމުންދާ މަސައްކަތްތަކެއްކަމަށެވެ. އަދި އެ މަސައްކަތަށް ފާޑުކިޔައި، މަލާމާތްކޮށް ހަދާ ފަރާތްތަކުގެ ވިސްނުންތަކުން ޤައުމު ސަލާމަތްކުރުމަކީ ޤައުމު ދެކެ ލޯބިވާ ކޮންމެ ރައްޔިތެއްގެ ވާޖިބެއްކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0