ރާއްޖެއަށް މުދާ އިމްޕޯޓްކޮށް އެކްސްޕޯޓްކުރުގެ ޚިދުމަތްތައް ރަސްމީކޮށް “ޓްރޭޑިއަންގެ” ތެރެއަށް

Read Time:6 Minute, 1 Second

(ފޮޓޯ ކްރެޑިޓްސް: އެމްޕީއެލް)

ސަރުކާރުގެ ޑިޖިޓައިޒޭޝަން ސިޔާސަތުގެ ދަށުން، ރާއްޖެއަށް މުދާ އިމްޕޯޓްކޮށް އެކްސްޕޯޓްކުރާ ފަރާތްތަކަށް ފަސޭހަކަމާއެކު އެއް ޕްލެޓްފޯމަކުން ޚިދުމަތް ފޯރުކޮށްދިނުމަށް ފަރުމާކޮށްފައިވާ ނެޝަނަލް ސިންގަލް ވިންޑޯ “ޓްރޭޑިއަން” ރަސްމީކޮށް ބޭނުންކުރަން ފަށައިފިއެވެ. ނެޝަނަލް ސިންގަލް ވިންޑޯ “ޓްރޭޑިއަން” ޕްލެޓްފޯމަކީ ދިވެހި ވިޔަފާރިވެރިންނަށް ލުއި ގޮތްތަކެއް މަގުފަހިކޮށްދެއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ގެންގުޅުއްވާ ތަޞައްވުރުގެ ދަށުން، ފަރުމާކޮށްފައިވާ ޕްލެޓްފޯމެކެވެ. މިއީ އިމްޕޯޓް، އެކްސްޕޯޓް ވިޔަފާރީގެ ބޭނުންތަކަށް އެކި އިދާރާތަކުން ހޯދަމުން އަންނަ ޚިދުމަތްތައް، އޮންލައިންކޮށް އެއް ޕްލެޓްފޯމެއްގެ ތެރެއިން ހޯދޭނެގޮތަށް ފަރުމާކޮށްފައިވާ ޕްލެޓްފޯމެއް ކަމަށް ސަރުކާރުން ވިދާޅުވެއެވެ.

މިދިޔަ ފެބްރުއަރީ މަހުގެ 2 ވަނަ ދުވަހު ބޭއްވި ވަޒީރުންގެ މަޖިލީހުގެ ބައްދަލުވުމުގައިވަނީ އިމްޕޯޓް އެކްސްޕޯޓާއި ގުޅުންހުރި އިދާރާތައް އެއް ވިއުގައަކުން ގުޅާލުމަށް އުފައްދާފައިވާ ޓްރޭޑިއަން ޕްލެޓްފޯމް މިމަހުގެ 20 ވަނަ ދުވަހުން ފެށިގެން ބޭނުންކުރަން ނިންމަވާފައެވެ. އަދި އަންނަ ޖޫން މަހުގެ 1 ވަނަ ދުވަހުން ފެށިގެން އިމްޕޯޓް އެކްސްޕޯޓާއި ގުޅުންހުރި ޚިދުމަތްތައް ފޯރުކޮށްދެމުންދާނީ ހަމައެކަނި ޓްރޭޑިއަން ޕްލެޓްފޯމްގެ ތެރެއިންކަމަށް ސަރުކާރުންވަނީ ކަނޑައަޅާފައެވެ.

ޝިޕިންގ އޭޖެންޓުންނާއި، ފްރައިޓް ފޯވަރޑިންގެ ޚިދުމަތްދޭ ފަރާތްތައް ރަޖިސްޓްރީވުމާއި ކަސްޓަމްސްއަށް ހުށަހަޅަންޖެހޭ މަޢުލޫމާތު ހުށަހެޅުމަށްޓަކައި ނޭޝަނަލް ސިންގަލް ވިންޑޯ “ޓްރޭޑިއަން” ޕްލެޓްފޯމް ބޭނުންކުރަންފެށުން.

އިތުރު މަޢުލޫމާތު 🔗: https://t.co/xDlMBJambV pic.twitter.com/nWX9YJchQ4

— Maldives Customs Service (@CustomsMv) April 19, 2025

މިޕްލެޓްފޯމްގެ ތެރެއިން މޯލްޑިވްސް ކަސްޓަމް ސަރވިސްއިން އާދިއްތަ ދުވަހުން ފެށިގެން ފޯރުކޮށްދޭ ޚިދުމަތްތަކުގެ ތެރޭގައި، ޝިޕިންގ އޭޖެންޓުން ރަޖިސްޓްރީ ކުރުމާއި، ފްރައިޓް ފޯވަރޑަރުން ރަޖިސްޓްރީ ކުރުމާއި، ފޮރިން ގޮއިންގ ވެސަލް ރަޖިސްޓްރީކުރުމާއި، ވެސަލް އެރައިވަލް އިންފޮރމޭޝަން ހުށަހެޅުން (އީ.ޓީ.އޭ/އީ.ޓީ.ޑީ) އަދި ސީ ކާރގޯ މެނިފެސްޓް ހުށަހެޅުން ހިމެނެއެވެ. ކަސްޓަމްސްއިން ވިދާޅުވީ މިގޮތަށް ހަމަޖެއްސި ނަމަވެސް، ޓްރޭޑިއަން ޕްލެޓްފޯމްގައި ރަޖިސްޓްރީވެފައިނުވާ ފަރާތްތަކަށް، އަންނަ މެއި މަހުގެ 31 ވަނަ ދުވަހުގެ ނިޔަލަށް މިހާރެކޭ އެއްގޮތަށް ކާގޯ މެނިފެސްޓާއި “ވެސެލް އެރައިވަލް އިންފޮމޭޝަން (އީ.ޓީ.އޭ) ހުށައެޅުމުގެ ފުރުސަތު އޮންނާނެކަމަށެވެ.

މިޕްލެޓްފޯމްގެ ތެރެއިން މޯލްޑިވްސް ޕޯޓްސް ލިމިޓެޑްގެ ބައެއް ޚިދުމަތްތައް އޮންލައިން ނިޒާމުގެ ތެރެއިން މިހާރުވަނީ ދޭން ފަށާފައެވެ. އެގޮތުން ފޮރިން ވެސަލް ރަޖިސްޓްރީކުރުމާއި، ވެސަލް އެރައިވަލް އިންފޮމޭޝަން ހުށަހެޅުމާއި، ސީ ކާގޯ އިމްޕޯޓް މެނިފެސްޓް ހުށަހެޅުމުގެ ޚިދުމަތް ހިމެނެއެވެ. ޓްރޭޑިއަން ފަރުމާކޮށްފައިވަނީ އިޤްތިޞާދީ ދާއިރާގެ ތަޖުރިބާކާރުންނާއި، ރާއްޖޭގެ ވިޔަފާރިވެރިންގެ ޚިޔާލާއި މަޝްވަރާ ހޯދައިގެންކަމަށް ސަރުކާރުން ވިދާޅުވެއެވެ. މިކަމާއި ގުޅޭ ގިނަ ބައްދަލުވުންތަކެއް ޓްރޭޑް ނެޓްގެ ފަރާތުންވަނީ ބާއްވާފައެވެ. މި ޕްލެޓްފޯމް ރަސްމީކޮށް އިފްތިތާޙްކޮށްފައިވަނީ މިދިޔަ އަހަރުގެ ސެޕްޓެމްބަރު މަހުގައެވެ.