Read Time:6 Minute, 9 Second
(ފޮޓޯ ކްރެޑިޓްސް: އޭއެފްޕީ)
ސޫރިޔާގައި ހަރަކާތްތެރިވަމުންދާ އެމެރިކާގެ އިސްތިޢުމާރީ ސިފައިންގެ އަދަދު މަދު ކުރުމަށް ނިންމައިފިއެވެ. މި ކަން ހާމަ ކުރައްވަމުން އެމެރިކާގެ ދިފާޢީ އިދާރާ، ޕެންޓެގަންގެ ތަރުޖަމާނު ޝޯން ޕާނެލް ވިދާޅުވީ، ކުރިއަށް އޮތް ހަފުތާތަކާއި މަސްތަކުގެ ތެރޭގައި ސޫރިޔާގައި ތިބި އެމެރިކާ ސިފައިންގެ އަދަދު ދެބައިކުޅަ އެއްބަޔަށް މަދު ކުރުމަށް ނިންމާފައިވާ ކަމުގައެވެ. އެމެރިކާއިން އިސްތިޢުމާރީ ސިފައިންގެ ފައުޖެއް ސޫރިޔާއަށް ފޮނުވާފައި ވަނީ ނިރުބަވެރިކަމާ ދެކޮޅަށް ކަމަށް ބުނެ ކުރަމުންދާ ހަނގުރާމައިގެ ދަށުންނެވެ. ސޫރިޔާގައި މި ވަގުތު ތިބި އެމެރިކާގެ އިސްތިޢުމާރީ ސިފައިންގެ އަދަދު 2,000އަށް އަރައެވެ. އެ މީހުން މި ވަގުތު ހަރަކާތްތެރިވަމުން ދަނީ އެ ޤައުމުގެ އިރުއުތުރުގެ ސަރަޙައްދުތަކުގައި އޮތް އަސްކަރީ މަރުކަޒުތަކުގައެވެ. ނިރުބަވެރިކަމާ ދެކޮޅަށް ކުރަމުންދާ ކަމަށް ބުނާ ހަނގުރާމައިގެ ދަށުން އެމެރިކާގެ އިސްތިޢުމާރީ ސިފައިން ސޫރިޔާގެ އިތުރުން ޢިރާޤަށް ފޮނުވާފައި ވަނީ 2014ވަނަ އަހަރުއެވެ.
“ވަކި ގަސްދެއްގައި ފަށާފައިވާ މަސައްކަތްތަކުގެ ދަށުން ކުރިއަށް އޮތް މަސްތަކުގެ ތެރޭގައި ސޫރިޔާގައި ތިބި ސިފައިންގެ އަދަދު ހާހަކަށް ވުރެ މަދު ކުރެވޭނެ،” ޕާނެލް ވިދާޅުވިއެވެ. މި ގޮތަށް އަމަލު ކުރުމަށް ނިންމަވާފައި ވަނީ އެމެރިކާގެ ދިފާޢީ ވަޒީރު ޕީޓް ހެގްސެތު ކަމުގައި ވެސް އޭނާ ވިދާޅުވިއެވެ. ސޫރިޔާގައި ތިބި އެމެރިކާ ސިފައިންގެ އަދަދު މަދު ކުރަން ނިންމި ނަމަވެސް، އެ ޤައުމުގައި ހަރަކާތްތެރިވަމުންދާ ނިރުބަވެރި ޖަމާޢަތް، އައިއެސާ ދެކޮޅަށް ދެމުންދާ ޙަމަލާތަކާއި، ކުރަމުންދާ ހަނގުރާމަ ހުއްޓައިނުލާނެ ކަމުގައި ޕާނެލް ވިދާޅުވިއެވެ. އަދި، އައިއެސާ ދެކޮޅަށް ހަނގުރާމަ ކުރުމަށް އުފައްދާފައިވާ އަސްކަރީ އިއްތިޙާދާ ގުޅިގެން އެ ޖަމާޢަތުގެ އަމާޒުތަކާ ދެކޮޅަށް ޙަމަލާތައް އަމާޒު ކުރަމުންދާނެ ކަމުގައި ވެސް އޭނާ ވިދާޅުވިއެވެ.
ސޫރިޔާގައި ތިބި އެމެރިކާ ސިފައިންގެ އަދަދު މަދު ކުރުމަށް ނިންމާފައި މި ވަނީ، މެދުއިރުމައްޗާއި އިންޑިޔާ ކަނޑުގެ ސަރަޙައްދަށް އެމެރިކާއިން އިތުރު އަސްކަރީ ހަތިޔާރާއި ސިފައިން ފޮނުވަން ފަށާފައިވާ ދަނޑިވަޅެއްގައެވެ. މެދުއިރުމަތީގައި އެމެރިކާގެ އަސްކަރީ ޤާބިލުކަން އިތުރު ކުރުމުގެ ގޮތުން އެ ޤައުމުން ދާދި ފަހުން ވަނީ ބީ-2 މަރުކާގެ ބޮންއަޅާ މަތިންދާބޯޓާއި އެހެނިހެން ހަތިޔާރު އެ ސަރަޙައްދަށް ފޮނުވާފައެވެ. މިއީ، މެދުއިރުމަތީގެ މައި ބާރެއްގެ ގޮތުގައި ބެލެވޭ އީރާނަށް އިންޒާރެއްގެ ގޮތުގައި ރައީސް ޑޮނަލްޑް ޓްރަމްޕް އަޅުއްވާފައިވާ ފިޔަވަޅެކެވެ.
ޓްރަމްޕްގެ ނަޒަރު މި ވަގުތު ހުއްޓިފައި އޮތީ އީރާނާށެވެ. އެއީ، ޔަހޫދީންގެ ދެމިއޮތުމާއި ސަލާމަތަށް އޮތް ނުރައްކަލެއްގެ ގޮތުގައި އެ މީހުންގެ އެންމެ ބޮޑު މަދަދުގާރު ކަމުގައިވާ އެމެރިކާއިން، އަދި ޚާއްޞަކޮށް ޓްރަމްޕް ޤަބޫލު ކުރައްވައެވެ. ޓްރަމްޕްގެ އަމާޒަކީ އީރާނުގެ ނިއުކްލިޔަރ ޕުރޮގުރާމަށް ބާރާއި ނުފޫޒު ފޯރުވައި، އެ ޕުރޮގުރާމު އެމެރިކާގެ ކޮންޓުރޯލުގެ ދަށަށް ގެންދިޔުމެވެ. އީރާނުން ނިއުކްލިޔަރ ހަތިޔާރެއް އުފައްދަން މަސައްކަތް ކުރަމުންދާ ކަމުގައި އެމެރިކާއާއި ޒަޔަނިސްޓުން ޤަބޫލު ކުރެއެވެ. ނަމަވެސް، އީރާނުން އެ ކަން ދޮގު ކުރެއެވެ. ޓްރަމްޕާއި ޔަހޫދީންގެ ބޭނުމަކީ ނިއުކްލިޔަރ ހަތިޔާރެއް އުފެއްދުމަށް އީރާނުން ކުރަމުންދާ މަސައްކަތްތައް ހުއްޓުވުމެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0