Read Time:6 Minute, 53 Second
އަހްލުއްސުންނާ ވަލްޖަމާޢާގެ އަސާސީ އުސޫލަކީ، ސުވަރުގެއަށް ނުވަތަ ނަރަކައަށް ދާނީ ކޮން ބައެއްކަމުގެ މައްސަލައަކީ ޤުރުއާނާއި ސުންނަތުގައި ބަޔާންވެގެންވާ ގޮތުގެ މަތިން ޢަޤީދާގެ މައްސަލައެއްކަމެވެ. އަދި މިކަމުގައި ވިސްނުމަށް ނުވަތަ އިޖްތިހާދަށް ޖާގައެއް ނެތެވެ. ޤުރުއާނުގައި ނުވަތަ ސުންނަތުގައި ވަކި މީހަކު ސުވަރުގޭގައި ނުވަތަ ނަރަކައިގައި ވާނެކަމަށް ބުނެފައިވާނަމަ، އަހަރެމެން އެކަމަށް ހެކިވާނަމެވެ. އެއާއެކު، ހެޔޮކަންތައް ކުރާ މީހުން ސުވަރުގެއަށް ދާނެކަމަށް އުއްމީދުކުރަމެވެ. އަދި ނުބައި ކަންތައް ކުރާ މީހުން ނަރަކައަށް ދާނެކަމަށް ބިރުގަނެއެވެ. އެހެނަސް މީސްތަކުންގެ ނިމުން އޮންނާނީ ކިހިނެއްިނެއްކަން އެންމެ މޮޅަށް ދެނެވޮޑިގެންވަނީ ﷲ އެވެ.
ސުވަރުގެއަށް ނުވަތަ ނަރަކައަށް ދާނެ މީހުންނާ ބެހޭގޮތުން ބުނުމުގެ މައްސަލަ ދެބަޔަކަށް ބެހިދާނެއެވެ:
ޢާންމު ބަޔާންތައް: މިއީ މީހުންގެ ސިފަތަކާ ބެހޭ ބަޔާންތަކެވެ. މިސާލަކަށް، “ﷲ އާއެކު އެއްވެސް އެއްޗެއް ބޮޑުޝިރުކުގެ ގޮތުގައި ބައިވެރިކުރާ މީހަކީ އިސްލާމްދީނުން ބޭރުވެފައިވާ ކާފިރެކެވެ. އަދި އޭނާ ނަރަކައިގައި ވާނެއެވެ.”
ހަމައެފަދައިން، އީމާންކަމާއެކު އަދި ސަވާބަށް އެދިގެން ރަމަޟާން މަހު ރޯދަ ހިފާ މީހާގެ ކުރީގެ އަދި ފަހުގެ ފާފަތައް ފުއްސެވޭނެކަމަށް ބުނަމެވެ. އަދި ޤަބޫލުވެގެންވާ ޙައްޖެއްގެ ޖަޒާއަކީ ހަމައެކަނި ސުވަރުގެކަމަށް ބުނަމެވެ. މިފަދަ ބަޔާންތައް ޤުރުއާނާއި ޞައްޙަ ސުންނަތުގައި ވަރަށް ގިނައެވެ.
މީހަކު އަހައިފިނަމަ، “ﷲ ފިޔަވައި އެހެން ފަރާތަކަށް ގޮވާ އަދި ﷲ ފިޔަވައި އެހެން ފަރާތެއްގެ އެހީއަށް އެދޭ މީހާ ވާނީ ސުވަރުގޭގައިތޯ ނުވަތަ ނަރަކައިގައިތޯ؟” އަހަރެމެން ބުނާނީ އޭނާއަކީ ނަރަކައިގައި ވާނެ ކާފިރެއް ކަމަށެވެ. އެއީ އޭނާއަށް އެކަން ކުރިކަން ސާފުކޮށް ބަޔާންކޮށްދެވުމަށްފަހު ވެސް އެކަމުގައި ދެމިހުރެ، އެ ޢަޤީދާގައި ހުރެ މަރުވެއްޖެނަމައެވެ. ޙައްޖުކޮށްފައި ދެން އެއްވެސް ބޭއަދަބީ ނުވަތަ ނުބައި ޢަމަލެއް ނުކޮށް، މިސާލަކަށް ޙައްޖަށްފަހު މަރުވެއްޖެ މީހާގެ ނިމުން އޮންނާނީ ކިހިނެއްތޯ؟ އަހަރެމެން ބުނާނީ އޭނާ ވާނީ ސުވަރުގޭގައި ކަމަށެވެ. ނުވަތަ ދުނިޔޭގައި އެންމެ ފަހުން ކިޔާ ބަސްފުޅަކީ “ލާ އިލާހަ އިއްލަﷲ” އެވެ. އޭނާ ވާނީ ސުވަރުގޭގައެވެ. މިފަދަ ގޮތްގޮތަށެވެ. މި ހުރިހާ ކަމެއްވެސް ގުޅިފައިވަނީ މީހުންގެ ސިފަތަކާއެވެ. އަދި މިއިން އެއްވެސް ކަމެއް ވަކި މީހަކަށް ނަން ކިޔައިގެން ނުބުނެވޭނެއެވެ.
ވަކި މީހުންނަށް ނަން ކިޔައިގެން ބުނާ ބަޔާންތައް: މިއީ ވަކި މީހަކު ސުވަރުގޭގައި ނުވަތަ ނަރަކައިގައި ވާނެކަމަށް ނަން ކިޔައިގެން ބުނުމެވެ. މިގޮތަށް ބުނުން ހުއްދަވެގެންވަނީ ހަމައެކަނި ﷲ ނުވަތަ އެކަލާނގެ ރަސޫލާ (ﷺ) އަންގަވާފައިވާ ޙާލަތްތަކުގައެވެ. ﷲ ނުވަތަ އެކަލާނގެ ރަސޫލާ (ﷺ) ނަން ގަނެ، ސުވަރުގޭގައި ވާނެކަމަށް ވިދާޅުވެފައިވާ މީހުންނަކީ ޔަޤީނުންވެސް ސުވަރުގޭގެ އަހުލުވެރިންނެވެ. މިސާލަކަށް ސުވަރުގޭގެ އުފާވެރި ޚަބަރު ދެވުނު ދިހަ ޞަޙާބީން (އަލްޢަޝަރަތުލް މުބައްޝަރާ)، އޭގެ ތެރެއިން އެންމެ އިސް ހަތަރު ޚަލީފާއިންކަމުގައިވާ އަބޫބަކުރު އައްޞިއްދީޤު، ޢުމަރު، ޢުޘްމާން އަދި ޢަލީ (ﷲ އެ ބޭކަލުންނަށް ރުއްސުންލައްވާށިއެވެ) ހިމެނެއެވެ.
ޤުރުއާނާއި ސުންނަތުގައި ނަން ގަނެ، ނަރަކައިގައި ވާނެކަމަށް ބަޔާންވެގެންވާ މީހުންނަކީ ޔަޤީނުންވެސް ނަރަކައިގެ އަހުލުވެރިންނެވެ. މިސާލަކަށް އަބޫލަހަބާއި އޭނާގެ އަނބިމީހާ، އަބޫޠާލިބު، ޢަމްރު ބިން ލަޙިއްޔު، އަދި އެހެން ބައެއް މީހުންނެވެ. އަޅުގަނޑުމެން ﷲ ގެ ޙަޟްރަތުން އެދެނީ އެކަލާނގެ ދަރުމަވަންތަކަމާއި ރަޙްމަތްފުޅުން އަޅުގަނޑުމެން ސުވަރުގޭގެ އަހުލުވެރިންގެ ތެރެއިން ލެއްވުމެވެ. ﷲ އަޅުގަނޑުމެންގެ ނަބިއްޔާ މުޙައްމަދުގެފާނަށް ބަރަކާތްލައްވާށިއެވެ.
(މިލިޔުމުގެ މަސްދަރު: islamqa.info)
Happy
0 %
Sad
100 %
Excited
0 %
Sleepy
0 %
Angry
0 %
Surprise
0 %
0
0