ތިނަދޫ އަދި ފެލިވަރު ކޯލްޑް ސްޓޯރޭޖުގެ މަސައްކަތް މިއަހަރު ތެރޭ ނިންމަނީ

Read Time:5 Minute, 25 Second

(ފޮޓޯ ކްރެޑިޓްސް: ރައީސް އޮފީސް)

ތިނަދޫ ސިޓީގައި ތަރައްގީ ކުރަމުންދާ 1،000 ޓަނުގެ ކޯލްޑް ސްޓޯރޭޖާއިި އިންޑިއާގެ އެގްޒިމް ބޭންކުގެ އެލްއޯސީގެ ދަށުން ކުރިއަށް ގެންދާ ފެލިވަރު ކޯލްޑް ސްޓޯރޭޖް އިތުރުކުރުމުގެ މަޝްރޫއު މިއަހަރުތެރޭ ނިންމާލެވޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. ރައީސް އޮފީހުން ކުރިއަށް ގެންދާ “ރައްޔިތުންނާ އެކު” ޕޮޑްކާސްޓުގައި ރައީސް ވިދާޅުވީ މިއީ ބޮޑު ދެ މަޝްރޫއު ސަރުކާރުން އަމާޒު ހިފާފައިވާ ގޮތަށް މިއަހަރުތެރޭ އެ މަސައްކަތްތައް ނިންމާލެވޭނެ ކަމަށެވެ.

“ބައެއް މަޝްރޫއުތަކަށް ބަލާއިރު ތިނަދޫގައި ފަށާފައި ހުރި ކޯލްޑް ސްޓޯރޭޖް ޕްރޮޖެކްޓު މިއަހަރުތެރޭގައި ނިންމާނަން. އެއީ ވަރަށް ބޮޑު މަޝްރޫއެއް. އަދި ހަމައެއާއެކީގައި ފެލިވަރުގައި އެބަހިނގާ 4،000 ޓަނުގެ ކޯލްޑް ސްޓޯރޭޖް ޕްރޮޖެކްޓެއް. އެ ޕްރޮޖެކްޓު އެއީ އިންޑިއާ ލޯނުގެ ދަށުން ހިންގާ ޕްރޮޖެކްޓެއް. އެ މަޝްރޫއުވެސް މިހާރު އެދަނީ ވަރަށް ބާރު ސްޕީޑުގައި، އަޅުގަނޑުމެންނަށް ޔަޤީންކަން އެބައޮތް މިއަހަރުތެރޭ، މި ބަލަނީ މެދުތެރެއަށް ނިންމާލެވޭތޯ.”، ރައީސް ވިދާޅުވިއެވެ.

(ފޮޓޯ ކްރެޑިޓްސް: ރައީސް އޮފީސް)

ތިނަދޫ ކޯލްޑް ސްޓޯރޭޖުގެ އަމަލީ މަސައްކަތް ފަށާފައިވަނީ 12 ޖުލައި 2023 ގައެވެ. މިހާރު ފެލިވަރުގައި ރައްކާ ކުރެވެނީ 750 ޓަނުގެ ގަނޑުމަސް ކަމަށާއި އެ ޕްރޮޖެކްޓް 2025 ވަނަ އަހަރުގެ އޭޕްރީލް މަހު ނިމޭއިރު ޖުމްލަ 4750 ޓަނުގެ ކޯލްޑް ސްޓޯރޭޖަކަށް ބަދަލުވެގެންދާނެ ކަމަށް ރައީސް ވަނީ ވިދާޅުވެފައެވެ.

މަސްވެރިންނަށް ބޭނުންވާ ކަންކަން ފުރިހަމަކޮށްދެއްވުމަށް ފައްޓަވާފައިވާ ގިނަ މަސައްކަތްތަކެއް މިއަހަރާއި އަންނަ އަހަރު ތެރޭ ނިމި، އަމަލީ ގޮތުން އޭގެ ފައިދާ ކުރަން ފަށާނެކަން ރައީސް ވަނީ ފާހަގަކުރައްވާފައެވެ. އެގޮތުން ގދ.ފިޔޯރީގައި 3،000 ޓަނުގެ މަޝްރޫއެއް ފަށާފައިވާއިރު، ފ.ނިލަންދޫގައި 1،500 ޓަނުގެ މަޝްރޫއެއް ފަށާފައިވަނީ ޕްރޮސެސިންއާ އެކީގައެވެ.

އޭގެ އިތުރުން

މުލަކުގައި 500 ޓަނުގެ މަޝްރޫއު
ކޫއްޑޫގައި 4،000 ޓަނުގެ މަޝްރޫއު
އިހަވަންދޫގައި 2،000 ޓަނުގެ ޕްރޮސެސިން ޕްލާންޓް އަދި ކޯލްޑް ސްޓޯރޭޖު ހިމެނޭ މަޝްރޫއެއްގެ ބިންގާ އެޅިފައި

(ފޮޓޯ ކްރެޑިޓްސް: ރައީސް އޮފީސް)

މީގެއިތުރުންވެސް ރާއްޖޭގެ ގިނަ ރަށްތަކުގައި ކޯލްޑްސްޓޯރޭޖުގެ މަޝްރޫއުތައް މިހާރު ފެށިގެން ކުރިއަށް ކަމަށް ރައީސް ވަނީ ވިދާޅުވެފައެވެ. “މި ހުރިހާ މަޝްރޫއުތަކެއްވެސް އަޅުގަނޑުގެ ރިޔާސީ ބަޔާނުގައި ވާނެ ބަޔާންކޮށްފައި ހުރިހާ މަޝްރޫއުތައް ކުރިޔަށްދާނެ ގޮތް. އެ އިއުލާންކުރި ގޮތަށް އެ މަޝްރޫއުތައް ކުރިޔަށްދާނެ.” ރައީސް ވިދާޅުވިއެވެ. މި ސަރުކާރުން ކުރިޔަށް ގެންދާ މަޝްރޫއުތަކުގެ ވާހަކަފުޅުދައްކަވަމުން ރައީސް ވިދާޅުވީ ބޮޑު ކަންނެލީގެ މަސްވެރިކަން ކުރިއެރުވުމަށް ހުޅުމާލޭގައި ފެސިލިޓީއެއް އެޅުމަށް ބޭނުންވާ ފައިސާ ހަމަޖެހިފައިވާ ކަމަށާއި ފެސިލިޓީ އެޅުމަށް ބޭނުންވާ 25،000 އަކަފޫޓުގެ ބިންވެސް ހަމަޖައްސާފައިވާ ކަމަށެވެ.