ފިޝަރީޒް މެނޭޖްމަންޓް ކިޔެވުމަށް 45 ސްކޮލާޝިޕް ދެނީ

Read Time:6 Minute, 8 Second

(ފޮޓޯ ކްރެޑިޓްސް: ރައީސް އޮފީސް)

ފިޝަރީޒް މެނޭޖްމަންޓް ދާއިރާއިން ކުރިއަށް ދިއުމަށް 45 ފަރާތަކަށް ސަރުކާރުން ފުލް ސްކޮލާޝިޕް ދިނުމަށް ނިންމާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. ރައީސް މިހެން ވިދާޅުވީ “ރައްޔިތުންނާއެކު” ޕޮޑްކާސްޓްގެ ހަތަރުވަނަ އެޕިސޯޑްގައި ވާހަކަފުޅުދައްކަވަމުންނެވެ. ރައީސް ވިދާޅުވީ މަސްވެރިކަމުގެ ދާއިރާއިން ފުރިހަމަ ނަފާ ނެގިއްޖެނަމަ، ޓޫރިޒަމަށްވުރެ ތިންގުނައަށް ވެސް ޖީޑީޕީ އަށް އެ ދާއިރާއިން ކޮންޓްރިބިއުޓް ކުރެވޭނެ ކަމަށެވެ.

ރާއްޖޭގެ ކަނޑުގެ ސަރަހައްދު އިރާދަކުރެއްވީތީ ވަރަށްބޮޑު ކަމަށާއި އީއީޒެޑް ވަރަށްބޮޑުކަން ފަހަގަކުރައްވަމުން ރައިސް ވިދާޅުވީ، ސަރުކާރުން ބޭނުންވާ ގޮތަށް އީއީޒެޑްގެ ތެރެއިން އިގްތިސޯދީ ނަފައެއް އަދި ނުހޯދޭ ކަމަށާއި ޓެޕެއް ނުކުރެވޭ ކަމަށެވެ.

(ފޮޓޯ ކްރެޑިޓްސް: ރައީސް އޮފީސް)

“އަޅުގަނޑުމެން ކުރަނީ ވަރަށް ދެމެހެއްޓެނިވި މަސްވެރިކަމެއް. ހަމަ ކޮންމެ މަހެއް ވަކިން ހަމަ މި ބާނަނީ. އެއްގޮތަކަށްވެސް އަޅުގަނޑުމެންނެއް ބޭރު ގައުމުތަކުގައި ހަދާހެން ދާއަޅައިގެން ކަހައެއް ނުލަން. އެހެންވީމާ، މުޅި ދުނިޔެ ގަބޫލުކުރޭ އަޅުގަނޑުމެންގެ މަސްވެރިކަން. އެހެންވީމާ، އެ މަސްވެރިކަން އަޅުގަނޑުމެންނަށް ފުޅާކުރެވެން އެބައޮތް، މުޅި ކަނޑުގެ ސަރަޙައްދަށްވެސް. އެހެންވީމާ، އަދި އޭގެއިތުރަށްވެސް، އެހާދުރަށް ނުދިޔަސް ވެސް އަޅުގަނޑުމެންނަށް ކުރެވޭނެ އެތައް ކަމެއް އެބަހުރި. މަސްވެރިކަމާއި އަދި ކަނޑުގެ އެހެނިހެން މުއްސަނދިކަން އަޅުގަނޑުމެންނަށް ބޭނުންހިފޭނެ ކަންތައްތައް އެބަހުރި ކުރަން.”، ރައީސް ވިދާޅުވިއެވެ.

އެކިއެކި ދިމަދިމާއަށް މިހާރު އިންވެސްޓްމަންޓް ހޯދުމުގެ ކަންކަމާއި، މެރިކަލްޗާއާއި، މި ހުރިހާ ދިމާއެއްގައި އިންވެސްޓް ކޮށްދޭނެ ބޭރު ފަރާތްތަކަށް މިހާރު ފުރުސަތު ހުޅުވާލާފައިވާކަން ފާހަގަކުރައްވަމުން ރައީސް ވިދާޅުވީ ކަންތައްތަކަށް މަގުފަހިވަމުންދާ ކަމަށެވެ. އެހެންކަމުން ސަރުކާރުން ގެންގުޅެނީ ކަނޑުގެ ރިސޯސަސްތައް، އޯޝަން ރިސޯސްތައް، ކަނޑުގެ ވަސީލަތްތައް އެންމެ ފުރިހަމަގޮތުގައި އިގްތިސޯދީ ގޮތުން ފައިދާވާ ގޮތަށް ހެދުމުގެ ސިޔާސަތު ކަމަށް ވިދާޅުވިއެވެ.

” އަޅުގަނޑުމެން ވާނީ ޔުނިވާސިޓީގައި، ނޭޝަނަލް ގައުމީ ޔުނިވަރސިޓީގައި މޯލްޑިވްސް ކޮލެޖް ފޯ ފިޝަރީޒް އެންޑް އޯޝަން ސައިންސަސްގެ ނަމުގައި ކޮލެޖެއް އުފައްދާފައި އިނގޭތޯ. އެ ކޮލެޖުން ބެޗްލާޒް އޮފް ފިޝަރީޒް މެނޭޖްމަންޓް ކިޔެވުމަށް ފުލް ސްކޮލާޝިޕް ކުރިއަށް އޮތް ދުވަސްތަކުގައި އަޅުގަނޑުމެން ދެމުން ދާނަން. މިހާރު އެކަމަށް ހުރިހާ ތައްޔާރީތަކެއް ވެވިފައި އެވަނީ. ދެން އަޅުގަނޑުމެން މި އަންދާޒާ ކުރަނީ 45 ކުއްޖަކަށް، އަޅުގަނޑުމެންގެ ބަޖެޓް މިހާރު ހަމަޖައްސައިދެވިފައި އޮތްގޮތުން 45 ކުއްޖަކަށް ސްކޮލާޝިޕް ހަމަޖެއްސޭނެ ކަމަށް. ދެންވެސް ހަމަ އިތުރު ކުދިކުދި ކޯސްތައްވެސް އެބަ ހިންގަން އިނގޭތޯ.” ރައީސް ވިދާޅުވިއެވެ.

އެ ކޮލެޖް މިއީ އެ ދާއިރާއަށް މީހުން ބިނާކުރުމަށްޓަކައި ކުރެވިގެންދިޔަ ވަރަށްބޮޑު ކަމެއް ކަމަށާއި އޭގެއިތުރަށްވެސް ހަމަ އެކިއެކި ދާއިރާތަކުން، މަސްވެރިކަމާ ގުޅިފައި ހުރި އެކި ދާއިރާތަކުން ކޯސްތައް، ސްކޮލާޝިޕްތައް ހޯދައިދިނުމުގެ ކަންތަކަށް ސަރުކާރުން ހަޔާ އެޑިޔުކޭޝަންގެ ތެރެއިން މަގުފަހިކުރުމުގެ މަސައްކަތްވެސް ކުރަމުންދާ ކަމަށް ރައީސް ވިދާޅުވިއެވެ.