މައުލޫމާތު ހިއްސާކުރުމަށް ހާއްސަ އިސްކަމެއް ދެން، މެއި 3 ގައި ނޫސްވެރިންނާ ބައްދަލުކުރާނަން: ރައީސް

Read Time:4 Minute, 25 Second

(ފޮޓޯ ކްރެޑިޓްސް: ރައީސް އޮފީސް)

މައުލޫމާތު ހިއްސާކުރެއްވުމަކީ ހާއްސަ އިސްކަމެއް ދެއްވާކަމެއް ކަމަށާއި، އަންނަ މެއި މަހުގެ ތިން ވަނަ ދުވަހު ނޫސްވެރިންނާ ބައްދަލުކުރައްވަން ނިންމަވާފައިވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. ނޫސްވެރިކަމުގެ މިނިވަންކަމުގެ ދުވަހުގެ ގޮތުގައި ބައިނަލްއަގްވާމީ ފެންވަރުގައި ފާހަގަކުރާ، މެއި މަހުގެ ތިން ވަނަ ދުވަހު، ނޫސްވެރިންނާ ބައްދަލުކުރައްވާނެކަން ރައީސް ހާމަ ކުރައްވާފައިވަނީ ރައްޔިތުންގެ ސުވާލުތަކަށް ޖަވާބުދެއްވުމަށް ކުރިއަށް ގެންދަވާ “ރައްޔިތުންނާއެކު” ސިލްސިލާ ޕޮޑްކާސްޓްގެ ހަތަރު ވަނަ އެޕިސޯޑްގައެވެ.

ރައީސް ވިދާޅުވީ މެއި މަހުގެ ތިން ވަނަ ދުވަހު އެމަނިކުފާނު ކުރިއަށް ގެންދަވާ ނޫސް ކޮންފަރެންސްގައި ކޮންމެ ކަހަލަ ސުވާލެއް ވެސް ކުރިމަތިކުރެއްވިދާނެ ކަމަށާއި، މިހާރުން ފަށައިގެން އެކަމަށް ތައްޔާރުވެވަޑައިގެންނެވުމަށް، ނޫސްވެރިންނަށް ދައުވަތު ދެއްވާ ކަމަށެވެ. “ޓީވީ ސްޓޭޝަނަކުން ދައުވަތު ދެއްވައިފިނަމަ، އެ ސްޓޭޝަނަކުން ކުރިއަށް ގެންދަވާ ޕްރޮގްރާމެއްގައި ބައިވެރިވެވަޑައިގެން، ސުވާލުތަކަށް ޖަވާބުދެއްވުމަށް ވެސް އަޅުގަނޑު މި ހުރީ ތައްޔާރަށް.” ރައީސް ވިދާޅުވިއެވެ.

އަމާޒަކީ ނަތީޖާ ނެރެދެއްވުން ކަމަށާއި، އެހެންކަމުން ގިނަ ވަގުތު ހޭދަކުރައްވަނީ މަސައްކަތުގެ ތެރޭގައި ކަމަށް ރައީސް ވިދާޅުވެފައެވެ. ނަމަވެސް، ވަގުތު ލިބިވަޑައިގެންނެވި މިންވަރަކުން، މައުލޫމާތު ހިއްސާ ކުރެއްވުމާ ގުޅުން ހުރި ކަންކަމަށް ވަގުތު ހުސްކުރައްވާނެ ކަމަށާ، ކުރިއަށް އޮތްތަނުގައި ސީދާ ނޫސްވެރިންނަށް ވެސް ވަގުތު ދެއްވާނެ ކަމުގައި ވިދާޅުވިއެވެ. ރައްޔިތުންނާ ވީހާ ވެސް ގާތުން މައުލޫމާތު ހިއްސާކުރައްވައި، ރައްޔިތުންގެ ހިޔާލުތަކާއި ކަންބޮޑުވުންތައް އަޑުއެއްސެވުމަކީ ރައީސް ހާއްސަ ސަމާލުކަމެއް ދެއްވައިގެން ކުރައްވަމުން ގެންދަވާ ކަމެކެވެ. އެ މަނިކުފާނުގެ ސަރުކާރުގެ އެކި ވުޒާރާތަކުންބވެސް ސިލްސިލާ ގޮތެއްގައި ނޫސްވެރިންގެ ބައްދަލުވުންތައް ކުރިއަށް ގެންދަވާއިރު، ރައީސް ވާހަކަފުޅުތައް ވެސް އެކި ވަސީލަތްތަކާއި މީސް މީޑިއާގެ އެކި މަންސަތަކުގައި ގެންދަވަނީ ހިއްސާ ކުރައްވަމުންނެވެ.

އެފަދައިން މައުލޫމާތު ހިއްސާ ކުރައްވާއިރު، ހުރިހާ އުމުރަކަށްވެސް ސަމާލުކަންދެއްވައިގެން، އެ އުމުރުފުރާތަކަށް ހާއްސަ ކުރައްވައިގެން ގުޅުންބަދަހިކުރައްވައެވެ.