މަންދިއާއި ފައްޔާޒު ރައީސްގެ ދަރިކަލުންނާއި ގުޅުވައި ހަގީގަތެއް ނެތް ވާހަކަ ދެއްކި މައްސަލަ ކޯޓަށް ހުށަހަޅައިފި

Read Time:4 Minute, 36 Second

އެމްޑީޕީން ކުރިއަށް ގެންދިޔަ ބައްދަލުވުންތަކުގައި ރައީސުލްޖުމްހޫރިއްޔާގެ ޑރ. މުހައްމަދު މުއިއްޒުގެ ދަރިކަލުން އުމައިރު މުހައްމަދު މުއިއްޒާއި ގުޅުގައި ހަގީގަތާއި ހިލާފު ވާހަކަތައްދައްކާފައިވާތީ އެ ޕާޓީގެ ޗެއާޕާސަން ފައްޔާޒް އިސްމާއިލާއި އެ ޕާ އެކްޓިވިސްޓެއް ކަމަށްވާ މަރިޔަމް ޒުބައިރު (މަންދި) ގެ މައްސަލަ ސިވިލް ކޯޓަށާއި ފެމިލީ ކޯޓަށް ހުށަހަޅައިފިއެވެ.

ރައީސްގެ އަނބިކަނބަލުން ސާޖިދާ އަހުމަދުގެ ފަރާތުން ހުށަހެޅުއްވި އެ މައްސަލައިގައި ވިދާޅުވެފައިވަނީ އެމްޑީޕީން ފާއިތުވި މާރިޗް މަހުގެ ތެރޭގައި މާލޭގައި ބާއްވަމުން ގެންދިޔަ ސިލްސިލާ މުޒާހަރާތަކުގެ ތެރޭގައި އެ ޕާޓީގެ އެކްޓިވިސްޓެއްކަމަށްވާ މަންދީ ރައީސްގެ ދަރިކަލުން އުމައިރާއި ނިސްބަތްކޮށް ދައްކާފައިވާ ވާހަކަތަކުގެ ސަބަބުން އުމައިރުގެ ނަފްސަށާއި ފުރާނައަށް ނުރައްކާވާނޭ ހާލަތެއް މެދުވެރިކުރުވައި އުމައިރުގެ ކިޔެވުމާއި މުސްތަގްބަލަށް ބޮޑެތި ގެއްލުންތަކެއް ކުރިމަތިވާނޭ ހާލަތެއް މެދުވެރިކޮށްފައިވާ މައްސަލަ ހުށަހަޅާ ކަމަށެވެ.

އެގޮތުން ނަމާއި އަބުރު ރައްކާތެރިކުރެވިފައި އޮތުމުގެ ހައްގު ނިގުޅައިގެންފައިވާތީ ސިވިލް ކޯޓަށާއި ކުޑަކުދިންގެ ހައްގުތައް ރައްކާތެރިކަމުގެ ގާނޫނު އަދި ކުޑަކުދިންގެ ހައްގުތައް ރައްކާތެރިކޮށްދިނުމާބެހޭ ބައިނަލްއަގްވާމީ މުއާހަދާ އިން ކުޑަކުދިނަނަށް ކަށަވަރުކޮށްދީފައިވާ ކަރާމާތާއި ރައްކާތެރިކަން ނިގުޅައިގެންފައިވާތީ ފެެމެލީ ކޯޓަށް ފައްޔާޒާއި މަންދިއާއި ދެ މީހުންގެ މައްސަލަ ހުށަހަޅާފައިވާ ކަމަށެވެ. އެ މައްސަލަތައް ހުށަހަޅައިފައި ވަނީ ގާނޫނު އަސާސީއާިއ ގާނޫނުތަކުން ކުޑަކުދިންނަށް ކަށަވަރުކޮށްދީފައިވާ ކަރާމާތާއި ރައްކާތެރިކަމުގެ ހައްގު ސިޔާސީ ދެކޮޅުވެރިކަމާއި ވާދަވެރިކަމުގެ ތެރެއިން ވިޔަސް ނިގުޅައި ނުގަނެވޭނެކަން ކަށަވަރުކޮށް އެ ކުދިންގެ ތައުލީމާއި މުސްތަގްބަލު އަދި ނަފްސު ގަނާ ކުރުމާއި ފުރައްސާރަކުރުމާއި އަދި ނުރައްލުގެ ތެރެއަށް ހުށަހެޅުމަށްކުރެވޭ މަސައްކަތްތަކުން ސަލާމަތްކޮށް ރައްކާތެރިކަން ކަށަވަރުކުރުމުގެ މަގްސަދުގައި ކަމަށް ވެސް ވިދާޅުވިއެވެ.

އަދި މިއަދު އެ މަގާމުގައި ތިއްބެވި އެކަމަނާގެ ބޭފުޅުންނަށް ރައްކާތެރިކަން ހޯދުމަށް މަންމައެއްގެ ހައިސިއްޔަތުންނާއި މާދަމާ އެ މަގާމުތަކުގައި ތިބެދާނެ އެހެން ކުދިންނަށް ރައްކާތެރިކަން ޔަގީންވެފައި އޮތުމަކީ ކޮންމެހެން ބޭނުންކަމެއްކަމުގައި ދެކެވަޑައިގަންނަވާ ކަމަށް މެޑަމް ވިދާޅުވެފައިވެއެވެ.