އީރާނުން މުއްސަނދި ކޮށްފައިވާ ޔުރޭނިއަމްއާ ޙަވާލުވުމާމެދު ރަޝިޔާއިން ބަހެއް ނުބުނި

Read Time:7 Minute, 34 Second

(ފޮޓޯ ކްރެޑިޓްސް: ރޮއިޓާރސް)

އީރާނުގެ ނިއުކްލިޔަަރ މަޝްރޫޢުއާ ގުޅޭގޮތުން އެ ޤައުމާއި އެމެރިކާއާ ދެމެދު އެއްބަސްވުމެއް ޤާއިމު ކުރާ ޙާލަތެއްގައި އީރާނުން މުއްސަނދި ކޮށްފައިވާ ޔުރޭނިއަމާ ރަޝިޔާއިން ޙަވާލުވެދާނެތޯ ސުވާލު ކުރުމުން އެ ސުވާލަށް ޖަވާބު ދިނުމަށް ރަޝިޔާއިން އިންކާރު ކޮށްފިއެވެ. 2015އަހަރުގެ ތެރޭގައި އެމެރިކާގެ ކުރީގެ ރައީސް ބަރަކް އޮބާމާގެ ސަރުކާރާއި ވިލާތުގެ ބައިވެރިން ވަނީ އީރާނުގެ ނިއުކްލިޔަރ މަޝްރޫޢު ހުއްޓުވުމަށް އެ ޤައުމާ އެކު އެއްބަސްވުމެއް ޤާއިމު ކޮށްފައެވެ. ނަމަވެސް 2018ވަނަ އަހަރު އެމެރިކާގެ ރައީސްކަމުގެ މަޤާމާ ޓްރަމްޕް ފުރަތަމަ ޙަވާލުވެވަޑައިގެންނެވި ދައުރުގައި އޭނާ ވަނީ އެ އެއްބަސްވުމުން އެމެރިކާ ވަކި ކޮށް އީރާނާ ދެކޮޅަށް ވަރުގަދަ ދަތިކުރުމުގެ ފިޔަވަޅުތައް އަޅުއްވާފައެވެ. އެ ފިޔަވަޅުތަކުގެ ސަބަބުން އީރާނުގެ އިޤްތިޞާދު ވަނީ ފުނޑުފުނޑުވެފައެވެ. އެމެރިކާއިން އެ ފިޔަވަޅު އަޅާފައި ވަނީ ޔަހޫދީންގެ ނިރުބަވެރި ބޮޑުވަޒީރު ބެންޖަމިން ނަތަންޔާހޫގެ ހިތްވަރު ދިނުމާ އެކުގައެވެ. އޭގެ ފަހުން އީރާނުން ވަނީ އެ ޤައުމުގެ ނިއުކްލިޔަރ މަޝްރޫޢު އަލުން ފަށައި ޔުރޭނިއަމް މުއްސަނދި ކުރަން ފަށާފައެވެ. އެ ގޮތުން އީރާނުން ޔޫރޭނިއަމް ސާފު ކުރާ މިންވަރު ވަނީ 60 އިންސައްތައަށް އިތުރު ކޮށްފައެވެ. ހަތިޔާރު ގުރޭޑަށް ވާޞިލްވުމަށް ޔުރޭނިއަމް ސާފު ކުރަން ޖެހެނީ 90 އިންސައްތައަށެވެ. އީރާނުން ބުނަމުުން ދަނީ އެ ޤައުމުގެ ނިއުކްލިޔަރ މަޝްރޫޢުއަކީ ސުލްޙަވެރި މަޝްރޫޢުއެއް ކަމަށެވެ.

ހުސްވި ޖަނަވަރީ މަހުގެ 20ވަނަ ދުވަހު އެމެެރިކާގެ ރައީސްގެ މަޤާމާ ދެވަނަ ދައުރަކަށް ޙަވާލުވެވަޑައިގެންފައިވާ ޓްރަމްޕް ވަނީ އީރާނާއެކު އައު ނިއުކްލިޔަރ އެއްބަސްވުމެއް އަނެއްކާ ވެސް ޤާއިމު ކުރުމުގެ މަސައްކަތް ކުރައްވަން ބޭނުންފުޅުވާ ކަމަށް ވިދާޅުވެފައެވެ. އޭނާ އެހެން ވިދާޅުވީ އީރާނާ ދެކޮޅަށް ވެރިކަމުގެ ފުރަތަމަ ދައުރުގައި އޭނާ އެޅުއްވި ދަތިކުރުމުގެ ފިޔަވަޅުތަކަށް އެމެރިކާގެ ނިމުނު ސަރުކާރުން ލުއި ދީފައި ވަނިކޮށް, އަލުން ވެރިކަމާ ޙަވާލުވެވަޑައިގަންނަވާ އެ ފިޔަވަޅުތައް އިޢާދަ ކުރައްވާފައި ވެސް ވަނިކޮށެވެ. އީރާނާއެކު ރަނގަޅު އެއްބަސްވުމަކަށް އަންނަން ބޭނުންފުޅުވާ ކަމަށާއި އެއީ އެ އީރާނުގެ ރައްޔިތުން ދިރިއުޅުމައިގެން ކުރިއަށް ދެވޭނެ ފަދަ އެއްބަސްވުމަކަށް ވާން އެދޭ ކަމަށް އޭނާ ވަނީ ވިދާޅުވެފައެވެ. އީރާނުން އެމެރިކާއާއެކު އެއްބަސްވުމަކާ ހަމައަށް ނާންނަ ނަމަ އީރާނަށް ބޮން އަޅާނެ ކަމުގެ އިންޒާރު ޓްރަމްޕް ވަނީ ދެއްވައިފައެވެ. މިދިޔަ ހޯމަ ދުވަހު ޓްރަމްޕް ވަނީ އީރާނުން ނިއުކްލިޔަރ ހަތިޔާރެއް އުފެއްދުމާ ފުދޭވަރަކަށް ގާތްވެފައިވާ ކަމަށް ވެސް ވިދާޅުވެފައެވެ.

މިދިޔަ ހޮނިހިރު ދުވަހު ޢުމާން މެދުވެރިވެ އެ ޤައުމުގައި އެމެރިކާއާއި އީރާނާމެދު ނުސީދާ މަޝްވަރާއެއް ވަނީ ބާއްވާފައެވެ. އީރާނާއި އެމެރިކާއާ ދެ ޤައުމުން ވެސް ވަނީ އެދެވޭ މަޝްވަރާތަކެއް ކުރިއަށް ގޮސްފައިވާ ކަމަށް ބުނެފައެވެ. އަންނަ ހޮނިހިރު ދުވަހު މަޝްވަރާގެ ދެވަނަ ބުރު ބޭއްވުމަށް ވެސް ވަނީ ހަމަޖެހިފައެވެ. މަސްދަރުތަކުން ބުނީ އީރާނުން މުއްސަނދި ކޮށްފައިވާ ޔުރޭނިއަމް ރަޝިޔާ ފަދަ އެހެން ޤައުމަކާ ޙަވާލު ކުރުމަށް އެމެރިކާއިން ހުށަހަޅާފައިވާ ކަމަށާއި އެ ހުށަހެޅުމަށް އީރާނުން ދެކޮޅު ހަދާނެ ކަމަށް ބެލެވޭ ކަމަށެވެ. އީރާނުގެ ޔުރޭނިއަމް އިތުރު ޤައުމަކާ ޙަވާލު ކުރުމަށް އެ ޤައުމުން އެއްބަސްވާ ޙާލަތެއްގައި އެ ތަކެއްޗާ ރަޝިޔާއިން ޙަވާލުވެދާނެތޯ ސުވާލު ކުރުމުން ރަޝިޔާގެ ރިޔާސީ ގަނޑުވަރު ކްރެމްލިންގެ ތަރުޖަމާނު ދިމިތްރީ ޕެސްކޮވް ވިދާޅުވީ އެ ސުވާލަށް ޖަވާބެއް ނުދެއްވާ ދޫކޮށްލައްވަން ބޭނުންވާ ކަމަށެވެ.

މިދިޔަ ޖަނަވަރީ މަހުގެ ތެރޭގައި ރަޝިޔާއިން ވަނީ އީރާނާއެކު އިސްތިރާޖީ ބައިވެރިވުމުގެ މުއާހަދާއެއްގައި ސޮއި ކޮށްފައެވެ. ރަޝިޔާއިން ޤަބޫލު ކުރާ ގޮތުގައި ޞުލްޙަވެރި ނިއުލްލިޔަަރ މަޝްރޫޢުއެއް ކުރިއަށް ގެންދިޔުމުގެ ހައްޤު އީރާނަށް ލިބިގެންވެއެވެ. އެ ޤައުމާ ދެކޮޅަށް އެއްވެސް އަސްކަރީ ބާރެއް ބޭނުން ކުރުމަކީ ޤާނޫނާ ޚިލާފު ކަމަކަށް ވާނެ ކަމަށާއި އެއީ ބަލައިގަނެވޭނެ ކަމެއް ނޫން ކަމަށް ވެސް ރަޝިޔާއިން ވަނީ ބުނެފައެވެ.